బంగ్లాదేశ్ గగనతలానికి పాక్ రెక్కలు: రక్షణ రంగంలో సరికొత్త సమీకరణాలు!
| 1971 విముక్తి యుద్ధం తర్వాత బంగ్లాదేశ్-పాక్ సంబంధాలు ఎప్పుడూ ఒడిదుడుకులతోనే సాగాయి. ముఖ్యంగా షేక్ హసీనా హయాంలో యుద్ధ నేరస్థులపై విచారణలు జరగడం పాకిస్థాన్‌కు మింగుడుపడలేదు.
దక్షిణ ఆసియా భౌగోళిక రాజకీయాల్లో పెను మార్పులు సంభవిస్తున్నాయి. దశాబ్దాల వైరం.. చేదు జ్ఞాపకాలను పక్కనపెట్టి బంగ్లాదేశ్-పాకిస్థాన్ దేశాలు రక్షణ రంగంలో చేతులు కలుపుతున్నాయి. బంగ్లాదేశ్‌లో షేక్ హసీనా ప్రభుత్వం పతనం తర్వాత ఏర్పడిన రాజకీయ మార్పులు.. ఇరు దేశాల మధ్య సైనిక సంబంధాలకు సరికొత్త బాటలు వేస్తున్నాయి.
జేఎఫ్‌-17 యుద్ధ విమానాలపై కన్ను
పాకిస్థాన్, చైనాలు సంయుక్తంగా అభివృద్ధి చేసిన జేఎఫ్‌-17 యుద్ధ విమానాలను కొనుగోలు చేసేందుకు బంగ్లాదేశ్ ఆసక్తి చూపుతోంది. పాక్ సైనిక మీడియా విభాగం (ఐఎస్.పీఆర్) సమాచారం ప్రకారం.. ఈ విమానాల సరఫరాపై ఇరు దేశాల మధ్య ప్రాథమిక చర్చలు విజయవంతంగా సాగుతున్నాయి. ఇదే గనుక కార్యరూపం దాల్చితే బంగ్లాదేశ్ వైమానిక దళం (బీఏఎఫ్) చరిత్రలో ఇది ఒక కీలక మలుపు కానుంది.
కీలక నేతల భేటీ.. లోతైన చర్చలు
ఇటీవల ఇస్లామాబాద్‌లో జరిగిన ఉన్నత స్థాయి సమావేశం ఈ పరిణామాలకు ప్రాధాన్యతను చేకూర్చింది. బంగ్లాదేశ్ ఎయిర్ ఫోర్స్ చీఫ్ మార్షల్ హసన్ మహమూద్ ఖాన్, పాక్ ఎయిర్ ఫోర్స్ చీఫ్ మార్షల్ జహీర్ అహ్మద్ బాబర్ ఈ సమావేశంలో పాల్గొన్నారు. కేవలం యుద్ధ విమానాల కొనుగోలు మాత్రమే కాకుండా, పైలట్ల శిక్షణ, సాంకేతిక పరిజ్ఞాన బదిలీ, విమానాల నిర్వహణ , గ్రౌండ్ సపోర్ట్ సిస్టమ్స్‌పై విస్తృతంగా చర్చించారు. బంగ్లాదేశ్ పైలట్లకు అత్యాధునిక శిక్షణ ఇచ్చేందుకు తమ సైనిక కేంద్రాల్లో అన్ని వసతులు కల్పిస్తామని పాక్ హామీ ఇచ్చింది.
చారిత్రక నేపథ్యంలో పెను మార్పు
1971 విముక్తి యుద్ధం తర్వాత బంగ్లాదేశ్-పాక్ సంబంధాలు ఎప్పుడూ ఒడిదుడుకులతోనే సాగాయి. ముఖ్యంగా షేక్ హసీనా హయాంలో యుద్ధ నేరస్థులపై విచారణలు జరగడం పాకిస్థాన్‌కు మింగుడుపడలేదు. అయితే ప్రస్తుతం బంగ్లాలో ఏర్పడిన తాత్కాలిక ప్రభుత్వం పాక్‌తో సత్సంబంధాల పునరుద్ధరణకు మొగ్గు చూపుతోంది.
ఈ రక్షణ ఒప్పందం అమలైతే దక్షిణాసియాలో రక్షణ సమీకరణాలు వేగంగా మారిపోతాయి. బంగ్లాదేశ్‌కు తక్కువ ఖర్చుతో కూడిన అధునాతన యుద్ధ విమానాలు లభిస్తాయి. పాకిస్థాన్‌కు తమ రక్షణ ఉత్పత్తులకు అంతర్జాతీయ మార్కెట్‌లో గుర్తింపు దక్కడంతో పాటు, వ్యూహాత్మక మిత్రదేశం లభిస్తుంది. ఇది పొరుగున ఉన్న భారత్ వంటి దేశాల వ్యూహాలపై కూడా ప్రభావం చూపే అవకాశం ఉందని విశ్లేషకులు భావిస్తున్నారు.దశాబ్దాల నాటి శత్రుత్వాన్ని వీడి ఆయుధాల సాక్షిగా ఇరు దేశాలు దగ్గరవ్వడం ఇప్పుడు అంతర్జాతీయ స్థాయిలో చర్చనీయాంశంగా మారింది.