అమెరికాను ముంచేస్తాం.. ఇరాన్ సరికొత్త హెచ్చరిక

పశ్చిమాసియాలో ఉద్రిక్తతలు మరోసారి గరిష్ఠ స్థాయికి చేరుకున్నాయి. అమెరికా-ఇరాన్ మధ్య దౌత్యపరమైన చర్చలు దాదాపు విఫలమైన నేపథ్యంలో, ఇరు దేశాల అగ్రనేతల మధ్య మాటల యుద్ధం తారాస్థాయికి చేరింది. ముఖ్యంగా పర్షియన్ గల్ఫ్, హర్మూజ్ జలసంధి వేదికగా ఇరాన్ తన పట్టును నిరూపించుకునేందుకు సిద్ధమవుతుండగా అమెరికా తన ఆంక్షల పదును పెంచుతోంది.

"అమెరికన్లకు గల్ఫ్‌లో చోటు లేదు": మొజ్తాబా ఖమేనీ

ఇరాన్ సుప్రీం లీడర్ మొజ్తాబా ఖమేనీ తాజాగా సంచలన వ్యాఖ్యలు చేశారు. పర్షియన్ గల్ఫ్ దినోత్సవం సందర్భంగా ఆయన స్పందిస్తూ "వేల కిలోమీటర్ల దూరం నుంచి దుర్బుద్ధితో వచ్చే అమెరికన్లకు పర్షియన్ గల్ఫ్‌లో నీటి అడుగున సముద్రంలో మునిగిపోవడం తప్ప మరెక్కడా చోటు ఉండదు" అని హెచ్చరించారు. అమెరికాను 'పెద్ద సైతాను'గా అభివర్ణించిన ఆయన.. హర్మూజ్ జలసంధిపై తమ పూర్తి నియంత్రణ కొనసాగుతుందని స్పష్టం చేశారు.

ఇరాన్ అణు, క్షిపణి సామర్థ్యాలను జాతీయ సంపదగా అభివర్ణిస్తూ వాటిని ప్రాణాలకు తెగించి రక్షించుకుంటామని మొజ్తాబా ఉద్ఘాటించారు. అణ్వస్త్ర తయారీ ప్రణాళికలను వదులుకోవాలన్న ట్రంప్ డిమాండ్‌ను ఆయన పూర్తిగా తోసిపుచ్చారు.

ట్రంప్ కొత్త వ్యూహం.. ఆకాశాన్నంటుతున్న చమురు ధరలు

మరోవైపు అమెరికా అధ్యక్షుడు డొనాల్డ్ ట్రంప్ ఇరాన్ ఓడరేవుల దిగ్బంధనాన్ని మరింత కఠినతరం చేస్తున్నారు. అయితే అంతర్జాతీయంగా చమురు ధరలు ఆందోళన కలిగిస్తున్నాయి. బ్రెంట్ క్రూడ్ ఆయిల్ ధర బ్యారెల్‌కు 126 డాలర్లకు చేరడంతో అమెరికాపై ఒత్తిడి పెరుగుతోంది. దీనిని అధిగమించేందుకు హర్మూజ్ జలసంధిని తెరిచేలా ట్రంప్ ఒక కొత్త ప్రణాళికను ప్రతిపాదించారు. ఇరాన్ ఇంధన సరఫరాకు విఘాతం కలిగిస్తే భారీ మూల్యం చెల్లించాల్సి ఉంటుందని.. దీని కోసం మిత్రపక్షాలను సమన్వయం చేసుకుంటున్నామని వాషింగ్టన్ వర్గాలు వెల్లడించాయి.

రంగంలోకి సరికొత్త ఆయుధం

ఇరాన్ నేవీ కమాండర్ రేర్ అడ్మిరల్ షారమ్ ఇరానీ మాట్లాడుతూ.. త్వరలోనే ఒక సరికొత్త ఆయుధాన్ని ప్రయోగిస్తామని, అది అమెరికాకు 'గుండెపోటు' తెప్పిస్తుందని వ్యాఖ్యానించారు. అమెరికా దిగ్బంధనం చేస్తున్నప్పటికీ తమ నౌకలు రాకపోకలు సాగిస్తున్నాయని.. తమ ప్రజల ప్రాణత్యాగాలకు ప్రతీకారం తీర్చుకుంటామని ఆయన హెచ్చరించారు.

అంతర్జాతీయ మద్దతు.. హెచ్చరికలు

ఈ ఉద్రిక్తతల మధ్య కీలక పరిణామాలు చోటుచేసుకున్నాయి. రష్యా అధ్యక్షుడు పుతిన్ ట్రంప్‌తో ఫోన్‌లో మాట్లాడుతూ ఇరాన్‌పై భూతల దాడులు చేయడం ఆమోదయోగ్యం కాదని, దాని పర్యవసానాలు తీవ్రంగా ఉంటాయని హెచ్చరించారు. అమెరికా దిగ్బంధనంతో ఇబ్బంది పడుతున్న ఇరాన్ కోసం పాకిస్థాన్ తన ఆరు అత్యవసర భూ మార్గాలను తెరిచింది. దీనివల్ల ఇరాన్‌కు సరకు రవాణా సులభతరం కానుంది. ఇక ఇరాన్‌పై మళ్లీ దాడులు చేసేందుకు తాము సిద్ధంగా ఉన్నామని ఇజ్రాయెల్ రక్షణ మంత్రి కట్జ్ ప్రకటించారు.

మొత్తానికి ఇరాన్ తన అణు సత్తా చాటుకునేందుకు.. అమెరికా తన ఆధిపత్యాన్ని నిలబెట్టుకునేందుకు ప్రయత్నిస్తుండటంతో గల్ఫ్ ప్రాంతం యుద్ధ భూమిని తలపిస్తోంది. ఈ ఉద్రిక్తతలు ప్రపంచ ఆర్థిక వ్యవస్థపై ముఖ్యంగా ఇంధన ధరలపై తీవ్ర ప్రభావం చూపే అవకాశం ఉంది.