భారతీయులను బెదిరిస్తూ యుద్ధంలోకి దింపుతున్న రష్యా.. కారణాలివే..

పొట్ట తిప్పల కోసం విదేశాలకు వెళ్లేవారిలో భారతీయులే అధిక సంఖ్యలో ఉంటారనడంలో ఎలాంటి సందేహం లేదు.. ఎందుకంటే ఇక్కడ కార్మిక శక్తి అధికం. పైగా వారికి ఇచ్చే వేతనాలు కూడా ప్రపంచంతో పోలిస్తే తక్కువే కాబట్టి వెళ్తుంటారు. శత్రుదేశమైనా.. మిత్రదేశమైనా ట్రీట్ మెంట్ ఒకే విధంగా ఉంటుందనడంలో మహమ్మద్ అహ్మద్ ఉదంతం వివరిస్తుంది. ప్రపంచంలో బెస్ట్ ఫ్రెండ్స్ ఎవరంటే టక్కున చెప్పే సమాధానం రష్యా.. ఇండియా.. కానీ ఇండియన్స్ రష్యాలో కూడా కష్టాలు ఎదుర్కొంటున్నారంటే వినేందుకే కొంచెం ఇబ్బందిగా ఉంది కదా.. కానీ ఇది అక్షర సత్యం ఇండియా నుంచి వెళ్లిన ఒక యువకుడి కథ ఇదే సూచిస్తుంది. అయితే.. సదరు వ్యక్తి చేసిన ఒక వీడియో కంటెంట్ చూసి ప్రభుత్వం స్పందించి ఆయనను వెనుకకు తెచ్చేందుకు పూనుకుంది.

హైదరాబాద్ యువకుడి వేడుకోలు..

రష్యా-ఉక్రెయిన్ యుద్ధం ప్రపంచవ్యాప్తంగా మానవీయ సంక్షోభాలను సృష్టిస్తున్న సందర్భంలో, భారతీయ పౌరులు ఉద్యోగాల పేరుతో మోసపోయి బలవంతంగా యుద్ధంలోకి నెట్టబడడం ఒక దురదృష్టకరమైన వాస్తవం. హైదరాబాద్‌కు చెందిన మహమ్మద్ అహ్మద్ (37) ఈ ఏడాది ఏప్రిల్‌లో ఉన్నత విద్య, ఉద్యోగం కోసం రష్యాకు వెళ్లాడు. ముంబైకి చెందిన ఏజెంట్ సాయంతో వెళ్లగా.. ఆ ఏజెంట్ ఆయనను మోసం చేశాడు. అక్కడికి చేరిన తర్వాత నెల ఎలాంటి పని లేకుండా ఖాళీగా ఉండిపోయాడు. ఆ తర్వాత, అతన్ని ఇతర 30 మంది విదేశీయులను ఉక్రెయిన్ సరిహద్దుకు రష్యా తరలించింది. అప్పుడప్పుడే యుద్ధం మొదలవుతుండడంతో బలవంతంగా ఆయుధ శిక్షణ ఇచ్చి యుద్ధంలోకి దింపారు. పారిపోయే ప్రయత్నంలో అతని కాలికి గాయమైనా.. రష్యా సైన్యం అతన్ని బెదిరించి యుద్ధం చేయాల్సిందేనని ఆదేశించింది. ఈ పరిస్థితిని వివరిస్తూ అహ్మద్ తన భార్య అఫ్షా బేగంకు ఒక సెల్ఫీ వీడియో పంపించాడు. తనతో పాటు 26 మంది బలవంతంగా యుద్ధంలో పాల్గొనవలసి వచ్చిందని, అందులో నలుగురు భారతీయులు ఉన్నారని, 17 మంది మరణించారని (అందులో ఒక భారతీయుడు) చెప్పాడు. ఈ వీడియో ఆధారంగా అఫ్షా బేగం కేంద్ర విదేశాంగ శాఖకు లేఖ రాసింది. హైదరాబాద్ ఎంపీ అసదుద్దీన్ ఒవైసీని కలిసి సాయం చేయాలని కోరింది. దీంతో కేంద్రం ప్రయత్నాలు ముమ్మరం చేసి, మాస్కోలోని భారత రాయబార కార్యాలయం ద్వారా అహ్మద్‌ను విడిపించేందుకు చర్యలు చేపట్టింది.

వెనక్కి తెచ్చేందుకు చూస్తున్న భారత ప్రభుత్వం..

భారత విదేశాంగ శాఖ (MEA) ప్రకారం.. రష్యా ఆర్మీలో 27 మంది భారతీయులు ఉన్నారు. వారిని రక్షించే ప్రయత్నాలు జరుగుతున్నాయి. కానీ తాజా నివేదికల ప్రకారం, 2025, జనవరి నాటికి 126 మంది భారతీయులు రష్యా సైన్యంలో చేరారు. అందులో 96 మంది విడుదలయ్యారు. ఇటీవల హైదరాబాద్ మ్యాన్ మహమ్మద్ అహ్మద్ డిస్ట్రెస్ వీడియోలు విడుదల చేశాడు, ఉద్యోగం పేరుతో మోసపోయి యుద్ధంలో చిక్కుకున్నానని చెప్పాడు. అక్టోబర్, 2025లో ఒక భారతీయుడు ఉక్రెయిన్ ఫోర్సెస్‌కు సరెండర్ చేశాడు. రష్యా సైన్యంలో బలవంతంగా చేర్పించారని చెప్పాడు.

బలవంతంగా యుద్ధంలోకి..

రష్యా అధ్యక్షుడు పుటిన్ ఈ యుద్ధంతో ఆర్థికంగా నష్టాలు చవిచూస్తున్నందున, విదేశీయులను రిక్రూట్ చేస్తోంది. అందులో భారతీయులు, నేపాలీలు, ఆఫ్రికన్లు ఉన్నారు. X ప్లాట్‌ఫాం పోస్టుల ప్రకారం, 12 మంది భారతీయులు చనిపోయారు, 16 మంది మిస్సింగ్, 96 మంది తిరిగి వచ్చారు. ఈ సమస్య భారత పౌరులకు మాత్రమే పరిమితం కాదు నేపాల్ నుంచి 15 వేల మంది రిక్రూట్ అయ్యారని CNN నివేదికలు చెబుతున్నాయి. భారత ప్రభుత్వం ఈ సమస్యను సీరియస్ తీసుకొని, రష్యాతో డిప్లొమాటిక్ చర్చలు జరుపుతోంది. భారత ప్రధాని మోడీ పుటిన్‌తో సమావేశంలో ఈ అంశాన్ని లేవనెత్తి, విడుదల చేయాలని కోరారు. దీంతో కొందరు విడుదలయ్యారు. కానీ, ఇంకా 27 మంది చిక్కుకున్నారని MEA చెబుతోంది.

ఏజెంట్లపై కన్నేయాల్సిందే..

ఏజెంట్ల లైసెన్సింగ్‌ను కఠినతరం చేయాలి. పౌరులు కూడా విదేశాలలో ఉద్యోగం చేసేందుకు వెళ్లిన సందర్భంలో ఎంబసీలను సంప్రదించాలి. అంతర్జాతీయంగా, భారతదేశం రష్యా, ఉక్రెయిన్‌తో సహకరించి మానవ ట్రాఫికింగ్‌ను అరికట్టాలి. భారతీయులను రష్యా ఆర్మీలో చేరకుండా ఇండియన్ గవర్నమెంట్ గట్టి హెచ్చరికలు జారీ చేసింది. కేంద్రం డిప్లొమాటిక్ ప్రయత్నాలను మరింత ముమ్మరం చేసి, చిక్కుకున్న భారతీయులను సురక్షితంగా తిరిగి తీసుకురావాలి. ఇది మానవ హక్కులు, అంతర్జాతీయ సహకారం యొక్క ప్రాముఖ్యతను గుర్తుచేస్తుంది. ఇలాంటి దుర్గతులు మరలా జరగకుండా చూడడం మన బాధ్యత.