ట్రంప్ టారిఫ్ల వేళ.. భారత్-రష్యా వ్యూహాత్మక బంధం
రష్యా నుంచి చమురు కొనుగోలు చేస్తున్న భారత్పై ట్రంప్ అసహనం వ్యక్తం చేస్తూ సుంకాలను పెంచినా, న్యూఢిల్లీ వెనకడుగు వేయలేదు.;
అమెరికా అధ్యక్షుడు డొనాల్డ్ ట్రంప్ విధించిన భారీ సుంకాలు భారత్పై తాత్కాలిక ఒత్తిడిని సృష్టించినా, ఇది అంతర్జాతీయ సంబంధాల దృష్ట్యా న్యూఢిల్లీ తన స్వతంత్ర విదేశాంగ విధానాన్ని బలంగా ప్రదర్శించడానికి ఒక అవకాశంగా మారింది. ముఖ్యంగా రష్యాతో భారత్ బంధం కేవలం ఆర్థిక లావాదేవీలకే పరిమితం కాకుండా, వ్యూహాత్మక, రక్షణ, భౌగోళిక రాజకీయ మైత్రీగా మరింత బలోపేతం అవుతోంది.
భారత్-రష్యా సంయుక్త విన్యాసాలు.. ఒక సందేశం
సెప్టెంబర్ 10 నుంచి 16 వరకు జరిగిన ఎక్సర్సైజ్ జాపడ్లో భారత్-రష్యా బలగాల భాగస్వామ్యం కేవలం రక్షణ సహకారం మాత్రమే కాదు, ప్రపంచానికి ఒక దౌత్య సందేశం. ఈ విన్యాసాల ద్వారా రెండు దేశాలు సంప్రదాయ యుద్ధ పద్ధతులతో పాటు ఉగ్రవాద వ్యతిరేక వ్యూహాలను పంచుకున్నాయి. ఇది భవిష్యత్తులో ఉమ్మడి సవాళ్లను కలిసి ఎదుర్కొనేందుకు ఒక బలమైన సంకేతం. ఈ తరహా సహకారం అమెరికా ఆధిపత్యానికి లొంగకుండా, తమ ప్రయోజనాలను తామే నిర్ణయించుకుంటామనే భారత్ దృఢ వైఖరిని స్పష్టం చేస్తుంది.
అమెరికా ఒత్తిడిపై భారత్ ప్రతిస్పందన
రష్యా నుంచి చమురు కొనుగోలు చేస్తున్న భారత్పై ట్రంప్ అసహనం వ్యక్తం చేస్తూ సుంకాలను పెంచినా, న్యూఢిల్లీ వెనకడుగు వేయలేదు. పీటర్ నవారో వంటి అమెరికా ప్రతినిధుల మాటలకు కూడా భారత్ గట్టి ప్రతిస్పందన ఇచ్చింది. "మా ప్రయోజనాలు మేమే నిర్ణయించుకుంటాం" అనే స్పష్టమైన సందేశాన్ని ఇచ్చింది. ఇది ఒక స్వతంత్ర దేశంగా భారత్ ఆత్మవిశ్వాసాన్ని, అమెరికా ఒత్తిడికి లొంగబోమనే నిబద్ధతను తెలియజేస్తుంది.
పుతిన్-మోదీ భేటీ ప్రాధాన్యం
ఎస్సీఓ సదస్సులో భారత ప్రధాని నరేంద్ర మోదీ, రష్యా అధ్యక్షుడు వ్లాదిమిర్ పుతిన్ కలిసి ప్రయాణించడం, ఆలోచనలు పంచుకోవడం రష్యాతో ఉన్న స్నేహం చిహ్నం మాత్రమే కాదు, ట్రంప్కు ఒక ప్రత్యక్ష సమాధానం. చైనా అధ్యక్షుడు జిన్పింగ్తో కలిసి ఒకే వేదికపై ముగ్గురు నేతలు కనిపించడం అమెరికాకు ఒక రకమైన అసౌకర్యం కలిగించింది. ఈ భేటీలు, అంతర్జాతీయ వేదికలపై భారత్ తన స్థానాన్ని బలంగా ప్రదర్శించడానికి తోడ్పడుతున్నాయి.
ట్రంప్ వ్యూహం – ఐరోపా ప్రభావం
భారత్ను కట్టడి చేయడం ద్వారా రష్యాపై ఒత్తిడి తెచ్చి ఉక్రెయిన్ సమస్యను పరిష్కరించాలనే ట్రంప్ ప్రయత్నం ఆచరణలో సాధ్యం కానిది. భారత్ లాంటి ఎదుగుతున్న శక్తి కేవలం ఒక దేశం ఒత్తిడితో తన విదేశాంగ విధానాన్ని మార్చుకోదని ఇప్పటికే నిరూపితమైంది. ఐరోపా దేశాలను కూడా తోడుచేసి సుంకాల మోత మోగించడం కేవలం వాణిజ్య విభేదాలను మరింత తీవ్రం చేయడమే కాకుండా, స్వతంత్ర విదేశాంగ విధానం కలిగిన దేశాలను మరింత దగ్గర చేస్తుంది.
ప్రస్తుత పరిణామాల ద్వారా రెండు విషయాలు స్పష్టంగా అర్థమవుతున్నాయి. భారత్ తన జాతీయ ప్రయోజనాల విషయంలో రాజీపడదు. అది రష్యా చమురు అయినా, రక్షణ సహకారం అయినా, వ్యూహాత్మక మైత్రి అయినా ముందుకే వెళుతుంది.. అమెరికా ఒత్తిడి పెంచితే భారత్-రష్యా బంధం మరింత బలపడే అవకాశం ఉంది.
మొత్తానికి ట్రంప్ సుంకాలు తాత్కాలికంగా భారత్కు ఇబ్బంది కలిగించినా, దీర్ఘకాలంలో అవి న్యూఢిల్లీకి ఒక అవకాశాన్ని కల్పించాయి. స్వతంత్ర విదేశాంగాన్ని బలంగా ప్రదర్శించడానికి.. ఇది భారత్కు, రష్యాకు మధ్య వ్యూహాత్మక బంధాన్ని మరింతగా బలోపేతం చేసింది.