కరోనా కష్టాలు మళ్లీ తప్పవా.? మోడీ హింట్ ఇచ్చాడా?

ప్రపంచం ఒక సంక్షోభం నుండి కోలుకోకముందే మరో పెను ప్రమాదం ముంగిట నిలుచుంది. పశ్చిమాసియాలో రగులుతున్న యుద్ధ జ్వాలలు కేవలం ఆ ప్రాంతానికే పరిమితం కాకుండా ప్రపంచ ఆర్థిక వ్యవస్థను అతలాకుతలం చేసేలా కనిపిస్తున్నాయి. ఈ నేపథ్యంలో భారత ప్రధానమంత్రి నరేంద్ర మోదీ చేసిన వ్యాఖ్యలు "కొవిడ్ కష్టకాలాన్ని ఎదుర్కొన్నట్టే ఈ సంక్షోభాన్ని కూడా ఎదుర్కోవాలి" అంటూ చేసిన వ్యాఖ్యలు దేశ ప్రజల్లో అప్రమత్తతతో పాటు కొంత కలవరాన్ని కూడా రేకెత్తించాయి. ఇది కేవలం హెచ్చరిక మాత్రమేనా లేక రాబోయే గడ్డు కాలానికి సంకేతమా అన్నది ఇప్పుడు మిలియన్ డాలర్ల ప్రశ్న.

ఇంధన సెగ.. సామాన్యుడి భయం

భారత ఆర్థిక వ్యవస్థకు పశ్చిమాసియా వెన్నెముక వంటిది. మన దేశ చమురు అవసరాల్లో సింహభాగం అక్కడి నుంచే తీరుతోంది. యుద్ధం కారణంగా సరఫరా గొలుసు దెబ్బతింటే అది నేరుగా పెట్రోల్, డీజిల్ ధరలపై ప్రభావం చూపుతుంది. చమురు ధరలు పెరిగితే రవాణా ఖర్చులు పెరిగి, కూరగాయల నుండి నిత్యావసర వస్తువుల వరకు అన్నింటి ధరలు ఆకాశాన్ని తాకుతాయి. కొవిడ్ సమయంలో లాక్‌డౌన్ల వల్ల ఉపాధి కోల్పోయిన సామాన్యుడు.. ఇప్పుడు 'ద్రవ్యోల్బణం' అనే మరో మహమ్మారి బారిన పడే ప్రమాదం పొంచి ఉంది.

పరిశ్రమలు.. ఉపాధిపై నీలి నీడలు

కరోనా కాలంలో చిన్న, మధ్య తరహా పరిశ్రమలు తీవ్రంగా దెబ్బతిన్నాయి. ఇప్పుడిప్పుడే కోలుకుంటున్న తరుణంలో ఎగుమతులు-దిగుమతుల నిలిచిపోవడం ఆ పరిశ్రమల నడ్డి విరిచే అవకాశం ఉంది. ఐటీ, తయారీ రంగాల్లో ఉపాధి అవకాశాలు తగ్గిపోవడం, అసంఘటిత రంగ కార్మికులు మళ్లీ వలసల బాట పట్టడం వంటి పరిస్థితులు తలెత్తకుండా చూడటం ప్రభుత్వానికి పెద్ద సవాలు. ఆర్థికవేత్తలు హెచ్చరిస్తున్నట్లుగా ఉత్పత్తి తగ్గిపోవడం వల్ల దేశ జీడీపీ వృద్ధి రేటుపై ప్రతికూల ప్రభావం పడే అవకాశం ఉంది.

ప్రభుత్వం ముందున్న మార్గాలు

ప్రధాని మోదీ మాటల్లోని అంతరార్థం 'ముందస్తు సంసిద్ధత'. ప్రభుత్వం కేవలం హెచ్చరికలతో సరిపెట్టకుండా ప్రత్యామ్నాయ ఇంధన వనరుల అన్వేషణను వేగవంతం చేయాలి. స్ట్రాటజిక్ పెట్రోలియం రిజర్వులను పెంచుకోవడం, దౌత్యపరమైన సంబంధాల ద్వారా చమురు దిగుమతులకు అంతరాయం కలగకుండా చూడటం అత్యవసరం. అలాగే సామాన్యుడిపై ధరల భారం పడకుండా పన్నుల తగ్గింపు వంటి ఉపశమన చర్యలను కూడా పరిగణనలోకి తీసుకోవాలి.

సంక్షోభాలు కొత్తేమీ కావు, కానీ అవి తెచ్చే పాఠాలు విలువైనవి. పశ్చిమాసియా యుద్ధం భారత్‌ను మరోసారి స్వయం సమృద్ధి దిశగా ఆలోచింపజేస్తోంది. కొవిడ్ కాలంలో చూపిన సహనం, ఐక్యత మళ్లీ అవసరమయ్యే రోజులు దగ్గరపడ్డాయి. అయితే ప్రభుత్వం కేవలం ప్రజల సహకారాన్ని కోరడమే కాకుండా పటిష్టమైన ఆర్థిక రక్షణ కవచాన్ని నిర్మించాల్సిన బాధ్యతను కూడా తీసుకోవాలి. అప్పుడే మనం ఈ 'యుద్ధ సెగ' నుండి క్షేమంగా బయటపడగలం.