రోజువారీ ట్రాఫిక్ యుద్ధంలో ఓడిపోతున్న సాఫ్ట్‌వేర్ వర్గాలకు ఓ 'ప్రత్యామ్నాయ రహదారి'

హైదరాబాద్ ఐటీ ఉద్యోగులు ఆఫీసులకు వెళ్లేందుకు గంటల తరబడి కార్లు.. బైక్‌లలో కూర్చుని చేసే "ధ్యానం" ముగిసే రోజులు వచ్చేశాయట.. రోజువారీ ట్రాఫిక్ నరకంలో నలిగిపోతూ స్టీరింగ్ పట్టుకుని బోర్ కొట్టి ఐటీ మేనేజర్లు కాస్తా "ట్రాఫిక్ అనలిస్ట్‌లు"గా మారిపోతున్న తరుణంలో.. మన ట్రాఫిక్ పోలీసులు ఒక తీపి వార్త పట్టుకొచ్చారు. జేఎన్‌టీయూ నుంచి రాయదుర్గం వెళ్లే దారికి ఒక ప్రత్యామ్నాయ రహదారిని వెతికే పనిలో పడ్డారట..

పీక్ అవర్స్‌లో రోడ్డు మీదకు వస్తే చాలు.. సిగ్నల్ దగ్గర ఎరుపు రంగు లైటు పడిన ప్రతిసారీ "జీవితం అంటే ఏమిటి?" అనే వేదాంతం గుర్తొస్తుంటుంది. అలాంటిది అధికారులు స్వయంగా క్షేత్రస్థాయిలోకి దిగి ఏ జంక్షన్ దగ్గర వాహనాలు ఎంతలా "పార్కింగ్" అవుతున్నాయో ఏ యూటర్న్ దగ్గర ఐటీ ఉద్యోగులు ఎంత సమయం వృథా చేసుకుంటున్నారో సూక్ష్మంగా పరిశీలించారట.

నగరంలోని అత్యంత రద్దీగా ఉండే ఐటీ కారిడార్‌లలో ఒకటైన జేఎన్‌టీయూ నుంచి రాయదుర్గం వరకు ఉన్న మార్గానికి ప్రత్యామ్నాయంగా ప్రత్యేక రహదారి ఏర్పాటు చేసే అవకాశాలను అధికారులు పరిశీలిస్తున్నారు. ముఖ్యంగా సోమవారం నుంచి శుక్రవారం వరకు ఉదయం సాయంత్రం పీక్ అవర్స్‌లో ఈ మార్గంలో భారీగా వాహనాల రాకపోకలు ఉంటాయి. ఐటీ ఉద్యోగుల ప్రయాణం కారణంగా ట్రాఫిక్ ఒత్తిడి మరింత పెరుగుతోంది.

ఈ నేపథ్యంలో ట్రాఫిక్ పోలీసుల బృందం సంబంధిత కారిడార్‌లో వాహనాల కదలికను క్షేత్రస్థాయిలో పరిశీలించింది. ట్రాఫిక్ ఎక్కువగా నిలిచే ప్రాంతాలు, వాహనాల రాకపోకల తీరు, జంక్షన్ల వద్ద ఏర్పడుతున్న ఇబ్బందులను అధికారులు సమీక్షించారు. ఐటీ ఉద్యోగుల ప్రయాణాన్ని సులభతరం చేయడంతో పాటు సాధారణ వాహనదారులకు కూడా ట్రాఫిక్ ఇబ్బందులు తగ్గించేలా కొత్త మార్గం ఏర్పాటు చేయడంపై దృష్టి సారించారు.

యూటర్న్ లు, ఫ్రీ లెఫ్ట్‌లపై ప్రత్యేక దృష్టి

రాయదుర్గం, గచ్చిబౌలి ప్రాంతాల్లో ఉన్న ప్రస్తుత యూటర్న్ లు, ఫ్రీ లెఫ్ట్‌లను కూడా ట్రాఫిక్ అధికారులు పరిశీలించారు. ఎక్కడ వాహనాలు ఎక్కువగా నిలుస్తున్నాయి? ఏ జంక్షన్‌లో ఎక్కువ సమయం వృథా అవుతోంది? వంటి అంశాలను విశ్లేషించి ట్రాఫిక్ ప్రవాహాన్ని మరింత మెరుగుపరిచే మార్గాలను గుర్తించే ప్రయత్నం చేశారు. అలాగే ప్రజా రవాణాకు ప్రాధాన్యం కల్పించే అంశంపైనా అధికారులు దృష్టి పెట్టారు. యూటర్న్లు, జంక్షన్లు, వాహనాల మళ్లింపు విధానాలను అవసరానికి అనుగుణంగా ఆప్టిమైజ్ చేయడం ద్వారా ట్రాఫిక్ ఆలస్యాలను తగ్గించాలని భావిస్తున్నారు.

ఐటీ ఉద్యోగులకు ఎంతవరకు ఉపయోగం?

కొత్తగా ప్రతిపాదిస్తున్న ప్రత్యేక క్యారేజ్‌వే లేదా ప్రత్యామ్నాయ రహదారి అందుబాటులోకి వస్తే ఐటీ ఉద్యోగులకు గణనీయమైన ప్రయోజనం కలిగే అవకాశం ఉంది. ప్రస్తుతం ట్రాఫిక్ రద్దీ కారణంగా తక్కువ దూరం ప్రయాణించడానికి కూడా ఎక్కువ సమయం పడుతోంది. కొత్త మార్గం అందుబాటులోకి వస్తే ప్రధాన కారిడార్‌పై వాహనాల ఒత్తిడి తగ్గడంతో పాటు ఉద్యోగులు తమ గమ్యస్థానాలకు వేగంగా చేరుకునే అవకాశం ఉంటుంది.

అయితే ఈ ప్రతిపాదన ఎంత త్వరగా కార్యరూపం దాలుస్తుందన్నదే కీలకం. రహదారి నిర్మాణం, అవసరమైన మౌలిక వసతులు, భూసేకరణ, ట్రాఫిక్ మళ్లింపులు వంటి అనేక అంశాలు దీనిపై ప్రభావం చూపే అవకాశం ఉంది. కాబట్టి ప్రణాళికను ప్రకటించడంతో పాటు దానిని వేగంగా అమలు చేయగలిగితేనే హైదరాబాద్ ఐటీ కారిడార్‌లో ట్రాఫిక్ సమస్యకు కొంతమేర పరిష్కారం లభించే అవకాశం ఉంది.

అయితే ఐటీ ఉద్యోగులకు ఒక చిన్న సందేహం! "ప్లాన్ వినడానికి భలే ఉంది గానీ.. ఈ భూసేకరణలు, రోడ్డు నిర్మాణాలు, పర్మిషన్లు పూర్తయ్యేసరికి మాకిక రిటైర్మెంట్ ఏజ్ వచ్చేస్తుందా?" అని మనస్సులోనే నవ్వుకుంటున్నారు. ఏది ఏమైనా రోజువారీ ట్రాఫిక్ యుద్ధంలో ఓడిపోతున్న సాఫ్ట్‌వేర్ వర్గాలకు ఈ 'ప్రత్యామ్నాయ రహదారి' వార్త ఒక చిన్న హ్యాపీ పిల్‌ లాంటిదే. ప్రకటనలు సరే గానీ ఈ కొత్త రోడ్డు కాస్త త్వరగా అందుబాటులోకి వస్తే.. ఆఫీస్ లాగిన్ టైమ్‌కి, ఇంటికి వెళ్లే డిన్నర్ టైమ్‌కి మధ్య ఉన్న డిస్టెన్స్ కాస్త తగ్గుతుంది..

మొత్తంగా చూస్తే.. హైదరాబాద్ ఐటీ ఉద్యోగులకు ప్రత్యేకమైన, వేగవంతమైన ప్రయాణ మార్గం అందుబాటులోకి వస్తే నగర ట్రాఫిక్ నిర్వహణలో ఇది కీలక మార్పుగా మారే అవకాశం ఉంది.