ఇకపై అద్దె ఇల్లు వెతకడం చాలా ఈజీ.. Google కొత్త 'ఏజెంట్ మోడ్' వచ్చేసింది!

ఆర్టిఫిషియల్ ఇంటిజినెన్స్ (AI) రోజురోజుకూ అద్భుతాలు సృష్టిస్తోంది. ఏఐ యాంకర్లు, ఏఐ డాక్టర్లు.. ఇలా ప్రతీ రంగంలో ఏఐ కొత్త ఆవిష్కరణలకు నాంది పలుకుతోంది. ఈ టెక్నాలజీతో సేవలను మరింత సులభతరం చేసేందుకు గూగుల్ ఎప్పుడూ ముందుంటుంది. తాజాగా గూగుల్ సీఈఓ సుందర్ పిచాయ్ సరికొత్త 'ఏఐ ఏజెంట్ మోడ్'ను ప్రవేశపెట్టారు. దీని ద్వారా ఇకపై అద్దె ఇల్లు వెతకడం, షాపింగ్ చేయడం వంటి పనులు మరింత సులభతరం కానున్నాయి.

సాధారణంగా అద్దె ఇల్లు వెతకాలంటే చాలా ఇబ్బందులు పడాల్సి వస్తుంది. ఎన్నో వెబ్‌సైట్లు చూడాలి, బ్రోకర్లను సంప్రదించాలి, కొన్నిసార్లు ప్రాంతం, ధరల విషయంలో రాజీ పడాలి. కానీ ఇప్పుడు ఏఐ ఏజెంట్ మోడ్‌తో ఈ తలనొప్పి తప్పింది. యూజర్లు కేవలం జెమిని ఏఐకి తమ అవసరాలను చెబితే చాలు. ఇది నిర్దిష్ట ప్రాంతంలో, నిర్దిష్ట ధరలో అద్దెకు ఉన్న ఇళ్లను వెతికిస్తుంది. ఈ సాధనం వెబ్‌లో స్వయంగా శోధించి, మీ అవసరాలకు సరిపోయే ఫలితాలను అందిస్తుంది. అంతేకాదు, ప్రాజెక్ట్ మారినర్ ద్వారా ఆ ఇళ్లను బుక్ చేసుకోవడం కూడా సులభం అవుతుంది. అంటే, AI కేవలం సమాచారం ఇవ్వడమే కాదు. లావాదేవీలను కూడా పూర్తి చేయగలదు.

ఇక షాపింగ్ విషయానికి వస్తే, Google కొత్త ఫీచర్లను ప్రకటించింది. AI సహాయంతో మీరు మీ ఫోటోలలో దేనినైనా ఉపయోగించి ఒక డ్రెస్ మీపై ఎలా కనిపిస్తుందో చూడవచ్చు. ఇది వర్చువల్ ట్రై-ఆన్‌ను సాధ్యం చేస్తుంది. దీనివల్ల డ్రెస్ కొనే ముందు అది మీకు సరిపోతుందో లేదో తెలుసుకోవచ్చు. అంతేకాదు, మీ అవసరాలు, బడ్జెట్ ప్రకారం గూగుల్ సెర్చ్ అన్ని వెబ్‌సైట్‌లను ట్రాక్ చేసి, మీకు సమాచారాన్ని అందిస్తుంది. అంటే, మీకు నచ్చిన ప్రొడక్ట్ ను, మీ బడ్జెట్‌లో, అందుబాటులో ఉన్న అన్ని సైట్‌ల నుండి వెతికిపెట్టి, కొనుగోలు ప్రక్రియలో కూడా సహాయం చేస్తుంది. ఇది వినియోగదారులకు సమయాన్ని ఆదా చేయడమే కాకుండా ఉత్తమ డీల్‌ను పొందడంలో కూడా సహాయపడుతుంది.

వీడియో క్రియేషన్ రంగంలో కూడా గూగుల్ వినూత్న ఫీచర్లను తీసుకొచ్చింది. Google Veoలో అనేక కొత్త ఫీచర్లను చూడొచ్చు. దీని సహాయంతో మీరు మీ ఫోటోలను జోడించడం ద్వారా వీడియోలను క్రియేట్ చేయవచ్చు. అంతేకాదు, మీరు ఫోటోలు, ప్రాంప్ట్‌లను ఉపయోగించి వీడియోలను క్రియేట్ చేయగల సామర్థ్యాన్ని కూడా ఇది అందిస్తుంది. అంటే, కొన్ని ఫోటోలు, కొన్ని కీలక పదాలు ఇస్తే చాలు, AI వాటి ఆధారంగా ఒక ఆకర్షణీయమైన వీడియోను తయారు చేస్తుంది. కంటెంట్ క్రియేటర్లకు, సాధారణ యూజర్లకు ఇది ఒక గొప్ప సాధనం.

సుందర్ పిచాయ్ ప్రవేశపెట్టిన ఈ AI ఏజెంట్ మోడ్ భవిష్యత్తులో మనం టెక్నాలజీతో ఎలా ఇంటరాక్ట్ అవుతామో స్పష్టం చేస్తోంది. కేవలం సమాచారం పొందడమే కాకుండా, AI మన రోజువారీ పనులను కూడా పూర్తి చేయగలదు. AI మరింత అభివృద్ధి చెందుతున్న కొద్దీ, మన జీవితం మరింత సులభతరం అవుతుంది.