మోడీ కీలక ప్రకటన.. బంగారం, వెండి ధరల్లో ఊహించని మార్పు!

సామాన్యుడికి బంగారం అంటే కేవలం ఆభరణం మాత్రమే కాదు, ఒక భరోసా. కానీ ఇప్పుడు ఆ భరోసా అందనంత ఎత్తుకు వెళ్ళిపోతోంది. కేంద్ర ప్రభుత్వం తీసుకున్న సంచలన నిర్ణయంతో పసిడి ధరలు ఒక్కసారిగా అగ్నిపర్వతంలా పేలాయి. నిన్నటి వరకు ఒక రేటు ఉంటే, ఈరోజు మరో రేటు చూసి సామాన్యులు షాక్ అవుతున్నారు. అసలు ధరలు ఎందుకు పెరిగాయి? మార్కెట్‌లో పరిస్థితి ఏంటి? మోదీ చెప్పింది నిజమేనా? ఈ వివరాలన్నీ మీకోసం..

కేంద్రం నిర్ణయంతో ఆకాశానికి పసిడి:

కేంద్ర ప్రభుత్వం తాజాగా బంగారంపై దిగుమతి సుంకాలను 6 శాతం నుంచి ఏకంగా 15 శాతానికి పెంచుతూ బాంబు పేల్చింది. దీని ప్రభావం నేరుగా మార్కెట్‌పై పడింది. కేవలం బంగారం మాత్రమే కాదు వెండి, ప్లాటినం వంటి లోహాల ధరలు కూడా భారీగా పెరిగాయి. ఇక నోటిఫికేషన్ వచ్చిన నిమిషాల్లోనే రేట్లు ఆకాశాన్ని తాకాయి. ఈ సుంకాల పెంపు నేటి నుంచే అమల్లోకి రావడంతో కొనుగోలుదారులు బెంబేలెత్తిపోతున్నారు.

రికార్డు స్థాయికి చేరిన ధరలు:

మల్టీ కమోడిటీ ఎక్స్ఛేంజ్‌లో బంగారం ధర ఈ మధ్య కాలంలో ఎప్పుడూ లేనంతగా 6 శాతానికి పైగా పెరిగింది. 10 గ్రాముల బంగారం రూ. 1,53,962 వద్ద మొదలై, కొద్దిసేపటికే రూ. 1,63,243 గరిష్ట స్థాయిని తాకింది. అంటే ఇంట్రాడేలోనే దాదాపు రూ. 13,500 కంటే ఎక్కువ లాభాన్ని నమోదు చేసింది. అంతర్జాతీయ మార్కెట్‌లో కూడా ఇదే ట్రెండ్ కొనసాగుతుండటంతో ధరలు తగ్గేలా కనిపించడం లేదు.

ప్రధాన నగరాల్లో నేటి రేట్లు:

మన హైదరాబాద్, విజయవాడ, విశాఖపట్నంలో 24 క్యారెట్ల బంగారం ధర సుమారు రూ. 1,67,890 పలుకుతోంది. అదే 22 క్యారెట్ల తులం బంగారం ధర రూ. 1,53,900గా ఉంది. చెన్నై, ఢిల్లీ లాంటి నగరాల్లో అయితే 24 క్యారెట్ల పసిడి ఏకంగా రూ. 1,68,000 మార్కును తాకింది. ఇక వెండి పరిస్థితి చెప్పక్కర్లేదు, కిలో వెండి ధర హైదరాబాద్‌లో రూ. 3,00,100కి చేరుకుంది. ఈ రేట్లు చూస్తుంటే సామాన్యులు బంగారం షాపు వైపు వెళ్లాలంటేనే భయపడే పరిస్థితి వచ్చింది.

మోదీ మాట గుర్తొస్తోంది:

మొన్న ప్రధాని మోదీ "ఒక్క ఏడాది పాటు బంగారం కొనకండి" అని చెప్పిన మాటలను ఇప్పుడు నెటిజన్లు గుర్తు చేసుకుంటున్నారు. ధరలు ఇంతలా పెరుగుతుంటే అప్పుడు మోదీ చెప్పింది కరెక్టే కదా అని సోషల్ మీడియాలో చర్చ నడుస్తోంది. ఇప్పుడున్న పరిస్థితుల్లో బంగారం కొనడం కంటే వెయిట్ చేయడం మంచిదా? లేక ఇంకా పెరుగుతుందేమో అని ఇప్పుడే కొనేయాలా? అనే అయోమయంలో ప్రజలు ఉన్నారు.

బంగారం ధరలు పెరగడం వల్ల సామాన్యుల పెళ్లిళ్ల బడ్జెట్ తలకిందులవుతోంది. ఒకవైపు పెట్టుబడిదారులకు ఇది లాభసాటిగా ఉన్నా, మధ్యతరగతి వారికి మాత్రం భారంగా మారింది. ప్రభుత్వం సుంకాలను తగ్గించే వరకు లేదా అంతర్జాతీయంగా మార్కెట్ స్థిరపడే వరకు ఈ పసిడి మంటలు తప్పేలా లేవు. ప్రస్తుతానికి మాత్రం బంగారం కొనాలంటే జేబుకు పెద్ద చిల్లు పడాల్సిందే..