ఎవరీ ఎల్ మెన్చో.. మెక్సికో ఎందుకు తగలబడుతోంది? భారతీయులకు ఎందుకు వార్నింగ్

మెక్సికో డ్రగ్ మాఫియా సామ్రాజ్యంలో ఒక శకం ముగిసింది. దశాబ్దాలుగా వెతుకుతున్న మోస్ట్ వాంటెడ్ డ్రగ్ లార్డ్.. జాలిస్కో న్యూ జనరేషన్ కార్టెల్ ( సీజేఎన్.జీ) అధినేత నెమేసియో ఒసెగేరా సెర్వాంటెస్ (ఎల్ మెన్చో) ఎట్టకేలకు హతమయ్యాడు. ఫిబ్రవరి 22న అమెరికా-మెక్సికో గూఢచారి సంస్థలు సంయుక్తంగా చేపట్టిన భారీ ఆపరేషన్‌లో అతను మరణించడంతో మెక్సికో వ్యాప్తంగా యుద్ధ వాతావరణం నెలకొంది.

ఎవరీ 'ఎల్ మెన్చో'? రక్తపాతంతో కూడిన చరిత్ర

మిచోకాన్ రాష్ట్రంలో జన్మించిన ఎల్ మెన్చో సాధారణ నేరస్థుడిగా మొదలై ప్రపంచంలోనే అత్యంత భయంకరమైన డ్రగ్ సామ్రాజ్యానికి అధిపతిగా ఎదిగాడు. 1994లో అమెరికాలో హెరాయిన్ స్మగ్లింగ్ చేస్తూ పట్టుబడి జైలు శిక్ష అనుభవించాడు. 2009లో సీజేఎన్.జీని స్థాపించి, మెక్సికోలోని 32 రాష్ట్రాలకు తన అరాచకాలను విస్తరించాడు. డ్రోన్లతో బాంబు దాడులు చేయడం సైనిక హెలికాప్టర్లను కూల్చివేయడం వంటి సాహసాలతో ప్రభుత్వానికే సవాలు విసిరాడు.

రగులుతున్న మెక్సికో: 'నార్కో టెర్రరిజం' భయం

ఎల్ మెన్చో మృతి వార్త బయటకు రాగానే అతని అనుచరులు మెక్సికోను రణరంగంగా మార్చారు. ప్రస్తుతం అక్కడ నెలకొన్న పరిస్థితులు భీతావహంగా ఉన్నాయి. గ్వాడలహారా వంటి ప్రధాన నగరాల్లో వందలాది వాహనాలకు నిప్పంటించి రహదారులను దిగ్బంధించారు. హింసకు భయపడి ప్రజలు ఇళ్లకే పరిమితమయ్యారు. పాఠశాలలు, వ్యాపార సముదాయాలు మూతపడ్డాయి. దేశవ్యాప్తంగా భద్రతా బలగాలను మోహరించారు. గ్వాటెమాలా సరిహద్దుల్లో హై-అలర్ట్ ప్రకటించారు.

భారతీయులకు ఇండోర్‌లో ఉండాలని హెచ్చరిక

మెక్సికోలో పరిస్థితులు ఉద్రిక్తంగా మారడంతో అక్కడ నివసిస్తున్న భారతీయులకు ఇండియన్ ఎంబసీ అత్యవసర సూచనలు జారీ చేసింది. దేశవ్యాప్తంగా భారీ నిరసనలు, హింసాత్మక ఘటనలు చోటుచేసుకుంటున్న నేపథ్యంలో బయటకు వెళ్లకుండా ఇండ్లలోనే ఉండాలని సూచించింది. ప్రస్తుతం పరిస్థితులు ఉద్రిక్తంగా ఉండటంతో మెక్సికోలోని భారతీయులు అప్రమత్తంగా ఉండాలని ఎంబసీ మరోసారి హెచ్చరించింది.

అమెరికా వ్యూహం.. $15 మిలియన్ల వేట

ఎల్ మెన్చో తల మీద అమెరికా ప్రభుత్వం $15 మిలియన్ల (సుమారు రూ. 125 కోట్లు) బహుమతిని ప్రకటించింది. అమెరికాలోకి భారీగా ఫెంటనిల్, కొకైన్ సరఫరా చేస్తున్న ఈ కార్టెల్‌ను "విదేశీ ఉగ్రవాద సంస్థ"గా అమెరికా గతంలోనే గుర్తించింది. ఈ ఆపరేషన్ విజయంతో మెక్సికో ప్రభుత్వం తన ఉక్కుపాదాన్ని చాటిచెప్పినట్లయింది.

భవిష్యత్తులో ఏం జరగవచ్చు?

ఎల్ మెన్చో మరణం ఒక విజయమే అయినా విశ్లేషకులు కొన్ని ఆందోళనలను వ్యక్తం చేస్తున్నారు. నాయకత్వం కోసం కార్టెల్ లోపల ముఠా తగాదాలు మొదలై మరిన్ని హత్యలకు దారితీయవచ్చు. ఎల్ మెన్చో వారసులు తమ ఉనికిని చాటుకోవడానికి మరింత భయంకరమైన దాడులకు పాల్పడే అవకాశం ఉంది. 1990లలో కొలంబియాలో పాబ్లో ఎస్కోబార్ మరణం తర్వాత జరిగినట్లే ఇక్కడ కూడా పౌరులను లక్ష్యంగా చేసుకునే ప్రమాదం ఉంది.

ఇది శాంతికి నాందినా?

ఒక గ్యాంగ్‌స్టర్ మరణంతోనే వ్యవస్థాగతమైన డ్రగ్ నెట్‌వర్క్ అంతం కాదు. అయితే ఎల్ మెన్చో వంటి అజేయమైన నేరగాడిని హతం చేయడం ద్వారా ప్రభుత్వం తన పట్టును నిరూపించుకుంది. మెక్సికో వీధుల్లో మంటలు ఆరి శాంతి నెలకొంటుందా లేదా అనేది రాబోయే కొద్ది రోజుల్లో తేలనుంది.