ప్రజలను భయపెడుతున్న కొత్త వ్యాధులు.. డబ్ల్యూహెచ్ఓ కీలక ప్రకటన
| అడవుల్లో ఉండే గబ్బిలాలు, చింపాంజీలు, గొరిల్లాలు, కోతులు వంటి జంతువుల రక్తం లేదా శారీరక ద్రవాల ద్వారా ఇది మొదట మనుషులకు సోకుతుంది.
ఇప్పుడు ప్రపంచవ్యాప్తంగా రకరకాల కొత్త వ్యాధులు, వైరస్‌లు ప్రజలను కలవరపెడుతూనే ఉన్నాయి. తాజాగా కాంగో, ఉగాండా దేశాల్లో ఎబోలా వైరస్ తీవ్ర రూపం దాల్చడం కలకలం రేపుతోంది. ఇప్పటికే 300కి పైగా అనుమానిత కేసులు, 88 మరణాలు నమోదు కావడంతో ప్రపంచ ఆరోగ్య సంస్థ దీనిని అంతర్జాతీయ పబ్లిక్ హెల్త్ ఎమర్జెన్సీగా ప్రకటించారు. ఈ ప్రమాదకర వైరస్ వ్యాప్తి, దాని లక్షణాలు మరియు డబ్ల్యూహెచ్ఓ చేసిన కీలక సూచనలను ఇప్పుడు చూద్దాం..
ఎమర్జెన్సీ ప్రకటించిన డబ్ల్యూహెచ్ఓ:
ఆఫ్రికా దేశాలైన కాంగో, ఉగాండాలలో ఎబోలా వైరస్ వేగంగా వ్యాపిస్తోంది. కాంగోలోని ఇటూరి ప్రావిన్స్‌లో 246 అనుమానిత కేసులు, 80 మరణాలు నమోదయ్యాయి. అలాగే ఉగాండా రాజధాని కంపాలాలో కూడా రెండు ల్యాబ్ కాన్ఫర్మ్డ్ కేసులు బయటపడటంతో డబ్ల్యూహెచ్ఓ అప్రమత్తమైంది. ఇక పరిస్థితి తీవ్రతను బట్టి దీనిని అంతర్జాతీయ అత్యవసర పరిస్థితిగా ప్రకటించినప్పటికీ.. ఇది కరోనా లాంటిది కాదని, కాబట్టి అంతర్జాతీయ సరిహద్దులను మూసివేయాల్సిన అవసరం లేదని స్పష్టం చేసింది.
అసలు ఏంటో ఈ 'బుండిబుగ్యో' వైరస్?:
ఎబోలా వైరస్‌లలో రకాలు ఉంటాయి. ప్రస్తుత సమాచారం ప్రకారం, ఇప్పుడు ప్రజలను భయపెడుతున్నది 'బుండిబుగ్యో' అనే అరుదైన ఎబోలా వేరియంట్. ఇక దీనికి ఇప్పటివరకు ఎలాంటి ప్రత్యేకమైన వ్యాక్సిన్లు లేదా ఆమోదించబడిన మందులు లేకపోవడం మరింత ఆందోళన కలిగిస్తోంది. ఇక సాధారణంగా ఎబోలా సోకిన వారిలో మరణాల రేటు 50 శాతం వరకు ఉంటుంది. ప్రస్తుతం ల్యాబ్ పరీక్షల్లో పాజిటివిటీ రేటు ఎక్కువగా ఉండటంతో, వైరస్ చాలా వేగంగా వ్యాపించే అవకాశం ఉందని నిపుణులు హెచ్చరిస్తున్నారు.
ఈ వైరస్ ఎలా వ్యాపిస్తుంది?:
ఎబోలా అనేది జంతువుల నుండి మనుషులకు సంక్రమించే ఒక జూనోటిక్ వ్యాధి. అడవుల్లో ఉండే గబ్బిలాలు, చింపాంజీలు, గొరిల్లాలు, కోతులు వంటి జంతువుల రక్తం లేదా శారీరక ద్రవాల ద్వారా ఇది మొదట మనుషులకు సోకుతుంది. ఇక ఆ తర్వాత ఒకరి నుండి ఒకరికి వారి రక్తం, వాంతులు, వీర్యం లేదా వారు వాడిన బట్టలు, పరుపుల ద్వారా చాలా సులభంగా వ్యాపిస్తుంది. ఇక పరిశుభ్రత లోపించడం వల్ల ఈ వైరస్ మరింత విజృంభిస్తుంది.
ప్రధాన లక్షణాలు ఇవే:
ఈ వైరస్ శరీరంలోకి ప్రవేశించిన 2 నుండి 21 రోజుల్లో లక్షణాలు బయటపడతాయి. మొదట అకస్మాత్తుగా తీవ్రమైన జ్వరం, అలసట, కండరాల నొప్పులు, తలనొప్పి, గొంతు నొప్పి వంటివి వస్తాయి. ఆ తర్వాత వాంతులు, విరేచనాలు, కడుపునొప్పి, కాలేయం మరియు మూత్రపిండాల పనితీరు దెబ్బతినడం వంటి తీవ్రమైన సమస్యలు ఎదురవుతాయి. ఇక కొందరిలో అంతర్గతంగా, బాహ్యంగా ముక్కు, చిగుళ్లు, మర్మాంగాల నుండి రక్తస్రావం కూడా జరగవచ్చు. ఇది సెంట్రల్ నెర్వస్ సిస్టమ్‌పై ప్రభావం చూపడం వల్ల రోగులలో గందరగోళం, కోపం ఎక్కువగా కనిపిస్తాయి.
పరీక్షలు మరియు నివారణ మార్గాలు:
సాధారణ వైరల్ జ్వరాల లక్షణాలే ఉండటం వల్ల దీనిని గుర్తించడానికి ప్రత్యేక ల్యాబ్ పరీక్షలు అవసరమవుతాయి. ఎబోలా నివారణకు ప్రస్తుతం ఎర్వెబో, జబ్డెనో వంటి కొన్ని వ్యాక్సిన్లు అందుబాటులో ఉన్నప్పటికీ.. ఈ కొత్త వేరియంట్‌పై వాటి ప్రభావంపై పరిశోధనలు జరగాల్సి ఉంది. వైరస్ సోకిన వారిని ఐసోలేషన్‌లో ఉంచడం, వారితో కాంటాక్ట్ అయిన వారిని 21 రోజుల పాటు పర్యవేక్షించడం మరియు చనిపోయిన వారి శరీరాలను సురక్షితంగా అంతక్రియలు చేయడం ద్వారా మాత్రమే దీనిని అరికట్టవచ్చు అని నిపుణులు తెలుపుతున్నారు.
ప్రస్తుతానికి ఈ కొత్త ఎబోలా వ్యాప్తి ఆఫ్రికా దేశాల్లోనే ఎక్కువగా ఉన్నప్పటికీ, అంతర్జాతీయ ప్రయాణాల వల్ల ఇతర దేశాలకు వ్యాపించే ముప్పు ఉంది. అందుకే ప్రపంచ దేశాలన్నీ సమన్వయంతో నిఘా పెంచాలని డబ్ల్యూహెచ్ఓ సూచించింది. ప్రజలు భయపడకుండా, వ్యక్తిగత పరిశుభ్రత పాటిస్తూ, లక్షణాలు ఉన్నవారికి దూరంగా ఉండటం ద్వారా ఇలాంటి ప్రాణాంతక వైరస్‌ల బారిన పడకుండా జాగ్రత్తపడవచ్చు.