కమ్యూనిస్టులు.. చేతులు కాలాక ఆకులు పట్టుకోవడం అంటే ఇదేనా?

ఎవరినైనా తనకు ఉపయోగపడేట్టు వాడుకోవడంలో బీఆర్‌ఎస్‌ అధినేత, తెలంగాణ ముఖ్యమంత్రి కేసీఆర్‌ కు ఎవరు సరిరారని అంతా చెబుతుంటారు. తనకు అవసరమైనప్పుడు చేరదీయడం.. తర్వాత తరిమేయడం కేసీఆర్‌ కు వెన్నతో పెట్టిన విద్య అనే విమర్శలున్నాయి. ఇందుకు ఉదాహరణగా విజయశాంతి, ఆలే నరేంద్ర, ఈటెల రాజేందర్, తదితరులను ఉదాహరణగా చెబుతుంటారు.

ఇప్పుడు వీరి కోవలో కమ్యూనిస్టులు కూడా చేరిపోయారు. కాంగ్రెస్‌ ఎమ్మెల్యేగా ఉన్న కోమటిరెడ్డి రాజగోపాలరెడ్డి రాజీనామా చేసి బీజేపీలో చేరడంతో మునుగోడులో ఉప ఎన్నిక వచ్చింది. ఉమ్మడి నల్గొండ జిల్లాలో కమ్యూనిస్టులకు మొదటి నుంచి చాలా బలం ఉంది. అందులో మునుగోడు ఒకటి. దీంతో మునుగోడులో బీఆర్‌ఎస్‌ గెలవాలంటే ఉభయ కమ్యూనిస్టు పార్టీలు... సీపీఐ, సీపీఎం మద్దతు కావాలని తలచిన కేసీఆర్‌ ఆ రెండు పార్టీలను చేరదీశారు. ఆ రెండు పార్టీలపై ప్రశంసలు కురిపించారు. భవిష్యత్‌ లోనూ ఆ రెండింటిని కలుపుకుని ముందుకు సాగుతామన్నారు.

దీంతో కమ్యూనిస్టులు కూడా చాలా ఆశలు పెట్టుకున్నారు. కేసీఆర్‌ తమకు వచ్చే అసెంబ్లీ ఎన్నికల్లో సీట్లు కేటాయిస్తారని ఆశపడ్డారు. భద్రాచలం, కొత్తగూడెం, వైరా, మునుగోడు, దేవరకొండ, పాలేరు తదితర స్థానాలు కేటాయించాలని కోరుకున్నారు. సీపీఐ, సీపీఐ చెరో పార్టీకి కనీసం నాలుగు చొప్పున అసెంబ్లీ స్థానాలైనా కేసీఆర్‌ ప్రకటించాలని ఆకాంక్షించాయి.

అయితే కేసీఆర్‌ ఉభయ కమ్యూనిస్టు పార్టీలకు షాక్‌ ఇచ్చారు. పొత్తులు లేకుండా పోటీ చేస్తున్నారు. ఈ క్రమంలో ఇప్పటికే 115 స్థానాలకు అభ్యర్థులను ప్రకటించారు. కేవలం మరో నాలుగు స్థానాల్లో మాత్రమే అభ్యర్థులను ప్రకటించాల్సి ఉంది.

కమ్యూనిస్టు పార్టీలు మునుగోడు ఉప ఎన్నికప్పుడు బీఆర్‌ఎస్‌ కు మద్దతు ప్రకటించినప్పుడే రేవంత్‌ రెడ్డి ఆ పార్టీలను అప్రమత్తం చేశారు. కేసీఆర్‌ ను నమ్మొద్దన్నారు. అయినా సరే రేవంత్‌ మాటను పట్టించుకోని ఉభయ కమ్యూనిస్టు పార్టీలు తమ మద్దతు బీఆర్‌ఎస్‌ కేనని తేల్చిచెప్పాయి. ఇప్పుడు కేసీఆర్‌ ఇచ్చిన షాక్‌ తో బిత్తర చూపులు చూస్తున్నాయి.

ఇందులో భాగంగానే తమకు కాంగ్రెస్‌ పార్టీ శత్రువు కాదని సీపీఐ తెలంగాణ కార్యదర్శి కూనంనేని సాంబశివరావు, సీపీఎం కార్యదర్శి తమ్మినేని వీరభద్రం చెబుతున్నారు, కాంగ్రెస్‌ తో పొత్తుకు మొగ్గు చూపుతున్నారు. ఇలాగయినా కొన్ని సీట్లలో పోటీ చేసి అసెంబ్లీలో అడుగుపెట్టాలని ఆశపడుతున్నారు.

అయితే.. కమ్యూనిస్టులతో పొత్తు ముందు నుంచి లేకపోవడంతో కమ్యూనిస్టులు పోటీ చేయాలనుకుంటున్న స్థానాల్లో కాంగ్రెస్‌ అభ్యర్థులు కూడా దాదాపు ఫిక్స్‌ అయిపోయారు. ఈ సమయంలో తమకు సీట్లు కావాలని కమ్యూనిస్టులు అడిగినా కాంగ్రెస్‌ కేటాయించే పరిస్థితిలో లేదని అంటున్నారు.

అయితే కేసీఆర్‌ సంగతి కూడా వీళ్లకు తెలిసి కూడా ఆయన ట్రాప్‌ లో పడ్డారని విమర్శకులు అంటున్నారు. తెలిసి కూడా కేసీఆర్‌ మాయలో పడి ఇప్పుడు విమర్శించడం దేనికని నిలదీస్తున్నారు. దీంతో కాంగ్రెస్‌ పార్టీకి జైకొట్టకుండా మరో మార్గం లేదని అంటున్నారు. తమను మోసం చేసిన కేసీఆర్‌ ను, ఆయన పార్టీని ఓడించాలంటే కమ్యూనిస్టులు.. కాంగ్రెస్‌ తో చేతులు కలపకతప్పదు.