టీవీకే విజయ్ ఆఫీసుకు సీబీఐ.. హీటెక్కిన తమిళ పాలిటిక్స్.. ఏం జరుగుతోంది.?

నటుడు విజయ్ పార్టీ తమిళగ వెట్రి కళగం (TVK) నిర్వహించిన సభలో జరిగిన కరూర్ తొక్కిసలాట కేసు దర్యాప్తును కేంద్ర దర్యాప్తు సంస్థ (CBI) మరింత వేగవంతం చేసింది. ఈ కేసులో విచారణ కోసం సీబీఐ ఏకంగా 306 మందికి సమన్లు జారీ చేసింది.

కరూర్ తొక్కిసలాట కేసు: సీబీఐ దర్యాప్తు వేగం పెంపు

తమిళనాడులోని కరూర్‌లో సెప్టెంబర్ 27న టీవీకే అధ్యక్షుడు, సినీ నటుడు విజయ్ ప్రచార సభలో జరిగిన విషాదకరమైన తొక్కిసలాటపై సీబీఐ దర్యాప్తు ఉధృతం చేసింది. ఈ ఘటనలో 41 మంది మరణించగా, 60 మందికి పైగా గాయపడ్డారు. మద్రాస్ హైకోర్టు ఆదేశాల మేరకు తొలుత ప్రత్యేక దర్యాప్తు బృందం (SIT) విచారణ ప్రారంభించినప్పటికీ, SITపై తమకు నమ్మకం లేదని టీవీకే సుప్రీంకోర్టును ఆశ్రయించింది. దీనిపై విచారణ జరిపిన సుప్రీంకోర్టు, దర్యాప్తును సీబీఐకి అప్పగిస్తూ ఆదేశాలు జారీ చేసింది.

కీలక చర్యలు, కీలక ఆధారాలు

సీబీఐ అధికారులు సోమవారం (నవంబర్ 3, 2025) నాడు తమిళగ వెట్రి కళగం (TVK) ప్రధాన కార్యాలయాన్ని సందర్శించారు. పార్టీ ప్రచార సభకు సంబంధించిన ముఖ్యమైన ఆధారాలను సేకరించారు. పార్టీ నేత నిర్మల్ కుమార్ తెలిపిన వివరాల ప్రకారం, సీబీఐ అధికారులు కార్యాలయంలోని పలు పత్రాలు, వీడియో ఫుటేజ్‌లు, కార్యక్రమ నిర్వాహకుల వివరాలను స్వాధీనం చేసుకున్నారు. ఈ క్రమంలో పలువురు నేతలను కూడా విచారించినట్లు సమాచారం.

3D లేజర్ స్కానింగ్ టెక్నాలజీ:

తొక్కిసలాటకు గల అసలు కారణాలను, సభా స్థలి పరిస్థితులను కనుగొనడానికి సీబీఐ అధికారులు ఆధునాతన 3D లేజర్ స్కానింగ్ టెక్నాలజీని ఉపయోగిస్తున్నారు. దీని ద్వారా సభా స్థలి కొలతలు, రద్దీ సామర్థ్యాన్ని అంచనా వేస్తున్నారు. విచారణలో భాగంగా మొత్తం 306 మందికి సీబీఐ సమన్లు జారీ చేసింది. ఇందులో బాధిత కుటుంబాలు, ప్రత్యక్ష సాక్షులు, కార్యక్రమ నిర్వాహకులు, స్థానిక అధికారులు ఉన్నారు. ఈవెంట్‌కు అనుమతి ఇచ్చిన కరూర్ సిటీ పోలీస్ ఇన్‌స్పెక్టర్ మణివణ్ణన్‌ను కూడా సీబీఐ అధికారులు సుదీర్ఘంగా ప్రశ్నించారు. భద్రతా ఏర్పాట్లు, ఉన్నతాధికారులతో సమన్వయంపై ఆయన్ని విచారించారు.

సుప్రీంకోర్టు మాజీ న్యాయమూర్తి జస్టిస్ అజయ్ రస్తోగి నేతృత్వంలోని త్రిసభ్య కమిటీ మొత్తం దర్యాప్తును పర్యవేక్షిస్తోంది. కార్యక్రమ నిర్వాహకులు, స్థానిక అధికారుల నిర్లక్ష్యం, రద్దీ నియంత్రణలో లోపాలు, ఈవెంట్ ప్లానింగ్‌లో జరిగిన తప్పిదాలపై కీలక ఆధారాలు సేకరించి, బాధ్యులను గుర్తించడంపై సీబీఐ దృష్టి సారించింది.

రాజకీయ ప్రభావం:

తమిళనాడు రాజకీయ వర్గాల్లో ఈ ఘటన, దర్యాప్తు మరింత చర్చనీయాంశంగా మారాయి. నటుడు విజయ్ కొత్తగా స్థాపించిన టీవీకే పార్టీ భవిష్యత్తు రాజకీయ దిశపైనా ఈ కేసు ప్రభావం చూపే అవకాశం ఉందని రాజకీయ విశ్లేషకులు అభిప్రాయపడుతున్నారు. పార్టీ అధినేత విజయ్ నవంబర్ 5న పార్టీ ప్రత్యేక సాధారణ మండలి సమావేశం ఏర్పాటు చేయనున్నట్లు ప్రకటించారు.దీంతో తమిళ పాలిటిక్స్ హీటెక్కాయి.