80 ఏళ్ల తర్వాత కూడా మగబిడ్డ కోసం ఆడబిడ్డను చంపడమా?

80 ఏళ్ల స్వతంత్ర భారతంలోనూ కొడుకు పుట్టాలనే ఆకాంక్ష కోసం ఆడబిడ్డను హతమార్చే పరిస్థితి కొనసాగడం సమాజానికి తీవ్ర ఆందోళన కలిగించే అంశమని బాంబే హైకోర్టు వ్యాఖ్యానించింది. గడ్చిరోలి జిల్లాలో నెల వయసున్న చిన్నారిని హత్య చేశారన్న కేసులో నిందితుడైన తాతకు బెయిల్ నిరాకరిస్తూ కోర్టు చేసిన వ్యాఖ్యలు.. కేవలం ఒక కేసు గురించే కాకుండా సమాజంలో ఇంకా కొనసాగుతున్న లింగ వివక్షపై చర్చకు దారితీశాయి.

రెండో ఆడపిల్ల పుట్టిందని దారుణం

మహారాష్ట్రలోని గడ్చిరోలి జిల్లాలో 2023లో నమోదైన కేసులో గోపీనాథ్ జంకు ప్రధాన్ అనే వ్యక్తిపై తన నెల వయసున్న మనవరాలిని హత్య చేశారనే ఆరోపణలు ఉన్నాయి. కుటుంబంలో ఇప్పటికే ఒక ఆడపిల్ల ఉండగా.. రెండోసారి కూడా ఆడపిల్ల పుట్టడంతో కుటుంబ సభ్యులు అసంతృప్తికి గురయ్యారని ప్రాసిక్యూషన్ ఆరోపించింది.

చిన్నారిని నీటి తొట్టిలో ముంచి చంపారని, ఆమె కదలకుండా ఉండేందుకు ఇటుకను ఉంచినట్లు ఆరోపణలు వచ్చాయి. అనంతరం కుటుంబ సభ్యులు చిన్నారి కనిపించడం లేదంటూ హడావుడి చేశారని, ఏదైనా జంతువు తీసుకెళ్లి ఉంటుందని కథ అల్లారని దర్యాప్తు సంస్థలు పేర్కొన్నాయి.

అనుమానం రావడంతో వెలుగులోకి ఘటన

కుటుంబం చిన్నారిని తొందరగా అంత్యక్రియలు నిర్వహించినట్లు కూడా కోర్టు రికార్డుల్లో ప్రస్తావన ఉంది. అయితే స్థానికంగా పనిచేస్తున్న ఆశా కార్యకర్తకు అనుమానం రావడంతో పోలీసులకు సమాచారం అందింది. అనంతరం చిన్నారి మృతదేహాన్ని వెలికితీసి పోస్టుమార్టం నిర్వహించగా.. నీటిలో మునిగిపోవడం వల్ల ఊపిరాడక మరణించినట్లు వైద్య నివేదికలో తేలింది.

ఈ కేసులో చిన్నారి తల్లి సహా కుటుంబంలోని ఇతర సభ్యులపై కూడా ఆరోపణలు నమోదయ్యాయి. తల్లి ఇప్పటికే బెయిల్ పొందిన విషయాన్ని నిందితుడి తరఫు న్యాయవాది కోర్టు దృష్టికి తీసుకెళ్లినప్పటికీ.. అదే ఆధారంగా తాతకు కూడా బెయిల్ ఇవ్వడానికి న్యాయస్థానం అంగీకరించలేదు.

80 ఏళ్ల తర్వాత కూడా ఇదే పరిస్థితా?

బెయిల్ పిటిషన్‌ను తిరస్కరిస్తూ జస్టిస్ ఎం.ఎం. నెర్లికర్ నేతృత్వంలోని నాగ్‌పూర్ బెంచ్ కీలక వ్యాఖ్యలు చేసింది. స్వాతంత్ర్యం వచ్చి దాదాపు 80 ఏళ్లు గడిచినా దేశంలో ఇంకా మగ బిడ్డకే ప్రాధాన్యత ఇవ్వడం దురదృష్టకరమని కోర్టు పేర్కొంది. ఈ ఘటన ఆడబిడ్డ రెండో సంతానంగా పుట్టిందనే కారణంతో జరిగిన హత్యకు ఉదాహరణగా ఉందని వ్యాఖ్యానించింది.

కోర్టు దృష్టిలో ఈ కేసులో మరో కీలక అంశం నిందితుల ప్రవర్తన. ఇంట్లోనే చిన్నారి మృతి చెందినందున అసలు ఏం జరిగిందనే విషయం కుటుంబ సభ్యులకే ప్రత్యేకంగా తెలిసి ఉండే అవకాశం ఉందని ఘటన తర్వాత కుటుంబం వ్యవహరించిన తీరు కూడా బెయిల్ మంజూరుకు అనుకూలంగా లేదని కోర్టు అభిప్రాయపడింది.

ఇది ఒక్క కుటుంబం సమస్య కాదు

ఈ ఘటనను కేవలం ఒక క్రిమినల్ కేసుగా చూడటం సరిపోదు. ‘కొడుకు కావాలి’ అనే సామాజిక ఆలోచన ఎంత ప్రమాదకర స్థాయికి వెళ్లగలదో ఈ కేసు చూపిస్తోంది. ఆడపిల్ల పుట్టడాన్ని భారంగా చూడటం, కుటుంబ వారసత్వం కోసం మగబిడ్డ అవసరమని భావించడం.. వృద్ధాప్యంలో కొడుకే అండగా ఉంటాడనే అభిప్రాయాలు.. తరతరాలుగా కొనసాగుతున్న లింగ వివక్షకు కారణాలుగా నిపుణులు, సామాజిక సంస్థలు చర్చిస్తుంటాయి.

ఒక శిశువు పుట్టిన వెంటనే ఆమెను ‘ఆడపిల్ల’ అనే గుర్తింపుతో తక్కువగా చూడటం మొదలైతే.. సమాజం ఎంత అభివృద్ధి చెందినా ఆలోచనల్లో మాత్రం వెనుకబడినట్టే. విద్య, ఆర్థికాభివృద్ధి, సాంకేతిక పురోగతి పెరుగుతున్నా.. ఆడబిడ్డ విషయంలో పాతకాలపు వివక్ష కొనసాగితే అభివృద్ధి అసంపూర్ణంగానే మిగులుతుంది.

చట్టం కంటే ముందు మారాల్సింది ఆలోచనే

ఆడశిశువులపై హింస, లింగ ఆధారిత వివక్షను అరికట్టేందుకు చట్టపరమైన చర్యలు అవసరమే. కానీ ప్రతి కుటుంబంలో పుట్టబోయే బిడ్డను ‘కొడుకా? కూతురా?’ అనే లెక్కతో కాకుండా ఒక మనిషిగా కుటుంబ సభ్యుడిగా చూడాలనే ఆలోచన ఏర్పడాలి.

బాంబే హైకోర్టు చేసిన వ్యాఖ్యల అసలు ప్రాధాన్యత కూడా ఇక్కడే ఉంది. ఒక చిన్నారి ప్రాణాలు కోల్పోయిన కేసులో బెయిల్‌పై నిర్ణయం తీసుకుంటూనే.. సమాజం ఇంకా ఎందుకు మగబిడ్డకే ప్రాధాన్యత ఇస్తోందనే ప్రశ్నను న్యాయస్థానం ముందుకు తెచ్చింది.

స్వాతంత్ర్యానికి ఎనిమిది దశాబ్దాలు పూర్తవుతున్న సమయంలోనూ ఆడపిల్ల పుట్టడం ‘అవాంఛనీయమనే’ భావన ఎక్కడైనా ఉంటే.. అది కేవలం ఒక కుటుంబం వైఫల్యం కాదు.. సమాజం ఆలోచనా విధానాన్ని మరోసారి పరిశీలించాల్సిన అవసరానికి సంకేతం.