విద్యుత్ ను వెదజల్లే చట్లు.. చైనా అద్భుత సృష్టి.. ఇక వీధుల్లో కరెంట్ లేకుండా లైట్లు..

‘అవతార్’ సినిమాలో కనిపించే పండోరా గ్రహం మీది వింత లోకం ఇప్పుడు మన కళ్ల ముందుకు రాబోతోంది. చీకట్లో వాటంతట అవే వెలుగులు చిమ్మే మొక్కలను చైనా శాస్త్రవేత్తలు సృష్టించడం విజ్ఞాన శాస్త్రంలోనే ఒక అద్భుతం. బాహ్యంగా విద్యుత్ అవసరం లేకుండా, కేవలం ప్రకృతి సిద్ధంగా వెలిగే ఈ ‘బయోల్యూమినిసెంట్’ మొక్కలు భవిష్యత్తులో మన వీధి దీపాల స్థానాన్ని భర్తీ చేస్తాయనడంలో ఎలాంటి సందేహం లేదు.

జన్యు మార్పిడితో సాధ్యం..

ప్రకృతిలో మిణుగురు పురుగులు, కొన్ని రకాల శిలీంధ్రాలు చీకట్లో మెరుస్తుంటాయి. చైనా అగ్రికల్చరల్ యూనివర్సిటీకి చెందిన డాక్టర్ లి రెన్హాన్ బృందం, మిణుగురు పురుగుల్లో ఉండే ‘ల్యూసిఫెరేస్’ ఎంజైమ్, శిలీంధ్రాలలోని కాంతినిచ్చే జన్యువులను సేకరించారు. ఈ జన్యువులను ఆర్కిడ్లు, పొద్దుతిరుగుడు, చామంతి వంటి సుమారు 20 రకాల మొక్కల కణాల్లోకి ప్రవేశపెట్టారు. దీనివల్ల ఆ మొక్కల కణాలు సహజంగానే కాంతిని ఉత్పత్తి చేయడం మొదలుపెట్టాయి.

విద్యుత్ లేని వెలుగులు

ఈ మొక్కల ప్రత్యేకత ఏంటంటే, వీటికి ఎలాంటి వైర్లు లేదా బ్యాటరీల అవసరం లేదు. సాధారణ మొక్కల్లాగే వీటికి నీరు, సూర్యరశ్మి, ఎరువులు అందిస్తే సరిపోతుంది. కిరణజన్య సంయోగ క్రియ ద్వారా ఇవి శక్తిని పొందుతూ, రాత్రి సున్నితమైన వెలుగును ప్రసరిస్తాయి. ఇవి గాలిలోని కార్బన్ డయాక్సైడ్ (CO2) ను పీల్చుకుంటూ ఆక్సిజన్‌ను విడుదల చేస్తాయి. అంటే ఒకే సమయంలో ఇటు వెలుగును, అటు స్వచ్ఛమైన గాలిని అందిస్తాయన్నమాట.

స్ట్రీట్ లైట్ల స్థానంలో..

ఈ సాంకేతికత కేవలం అందం కోసమే కాదు.., భారీ స్థాయిలో విద్యుత్ ఆదా చేయడానికి ఉపయోగపడుతుంది. భవిష్యత్తులో పార్కులు, తోటలు, వీధుల వెంట ఈ మొక్కలను నాటడం ద్వారా విద్యుత్ దీపాల అవసరం తగ్గుతుంది. ఒక్కో మొక్కను తయారు చేయడానికి కేవలం $1.4 (సుమారు రూ. 120) మాత్రమే ఖర్చవుతుందని పరిశోధకులు చెబుతున్నారు. ఇది దీర్ఘకాలంలో ప్రభుత్వాలకు విద్యుత్ బిల్లుల భారాన్ని తగ్గిస్తుంది.

ప్రయోగ దశలోనే..

ప్రస్తుతం శాస్త్రవేత్తలు కేవలం ఆకుపచ్చ రంగులోనే కాకుండా, ఎరుపు, నీలం వైలెట్ రంగుల్లో వెలిగే మొక్కలను కూడా అభివృద్ధి చేశారు. కొన్ని మొక్కల్లోకి ఫాస్ఫర్ కణాలను ఇంజెక్ట్ చేయడం ద్వారా సూర్యరశ్మిని నిల్వ చేసుకొని రాత్రిపూట వెలిగేలా చేస్తున్నారు. ప్రస్తుతం వీటి కాంతి ఇంకా తక్కువగానే ఉంది. ఒక పుస్తకాన్ని చదవడానికి లేదా స్పష్టంగా వస్తువులను చూడటానికి సరిపోయేంత కాంతిని ఉత్పత్తి చేసే దిశగా ప్రయోగాలు జరుగుతున్నాయి.

చైనా శాస్త్రవేత్తల ఈ సృష్టి పర్యావరణ హితమైన జీవనశైలికి బాటలు వేస్తోంది. మన వీధులు విద్యుత్ దీపాలతో కాకుండా, మెరిసే చెట్లతో కాంతి వంతంగా మారే రోజులు దగ్గరలోనే ఉన్నాయి. ఇవి పూర్తయితే.. విద్యుత్ సంక్షోభానికి శాశ్వత పరిష్కారం దొరకడమే కాకుండా, మన భూమి మళ్లీ పచ్చదనంతో కళకళలాడుతుంది.