బిహార్ సీఎంగా సామ్రాట్ చౌదరి..! రేపు ప్రమాణ స్వీకరానికి ఏర్పాట్లు..

బిహార్ రాజకీయాలు ఎప్పుడూ ఒక పట్టాన ఎవరికీ అర్థం కావు. నిన్నటి వరకు ముఖ్యమంత్రిగా ఉన్న నితీశ్ కుమార్ రాజీనామా చేయడం, వెంటనే ప్రస్తుత ఉప ముఖ్యమంత్రి సామ్రాట్ చౌదరిని నూతన ముఖ్యమంత్రిగా బీజేపీ శాసన సభాపక్షం ఎన్నుకోవడం దేశ రాజకీయాల్లో ఒక సంచలన మార్పు.

భారతదేశ రాజకీయ ముఖచిత్రంలో బిహార్ రాష్ట్రానికి ప్రత్యేక స్థానం ఉంది. ఎప్పుడు ఎవరు ఏ పార్టీతో పొత్తు పెట్టుకుంటారో.., ఎవరు ఎప్పుడు రాజీనామా చేస్తారో తెలియని ఉత్కంఠకు నిలయమైన బిహార్‌లో మరోసారి రాజకీయ భూకంపం సంభవించింది. సుదీర్ఘ కాలం ముఖ్యమంత్రిగా పనిచేసిన నితీశ్ కుమార్ పదవికి రాజీనామా చేయడంతో, బీజేపీ రాష్ట్ర అధ్యక్షుడు, ప్రస్తుత ఉప ముఖ్యమంత్రి సామ్రాట్ చౌదరిని కొత్త ముఖ్యమంత్రిగా ఖరారు చేశారు. రేపు ఆయన ప్రమాణ స్వీకారం చేయనుండడంతో బిహార్‌లో బీజేపీ పూర్తిస్థాయి ఆధిపత్యం దిశగా అడుగులు వేస్తోంది.

రాజకీయ నేపథ్యం

సామ్రాట్ చౌదరి 1990లలో క్రియాశీల రాజకీయాల్లోకి ప్రవేశించారు. ఆయనది రాజకీయ కుటుంబ నేపథ్యం. ఆయన తండ్రి శకుని చౌదరి కూడా బిహార్ రాజకీయాల్లో కీలక నేతగా ఉండేవారు. 1999, మే 19న మొదటిసారిగా బిహార్ వ్యవసాయ శాఖ మంత్రిగా బాధ్యతలు చేపట్టి తన పరిపాలనా దక్షతను నిరూపించుకున్నారు. ఆర్జేడీ, జేడీయూ వంటి పార్టీల్లో పనిచేసిన అనుభవం ఉన్నప్పటికీ, బీజేపీలో చేరిన తర్వాత ఆయన గ్రాఫ్ వేగంగా పెరిగింది. 2021లో నితీశ్ కుమార్ నేతృత్వంలోని ఎన్డీయే ప్రభుత్వంలో పంచాయతీ రాజ్ శాఖ మంత్రిగా పనిచేసి, గ్రామీణ స్థాయిలో పార్టీని బలోపేతం చేయడంలో సక్సెస్ అయ్యారు.

రాజీనామా వెనుక నితీశ్ వ్యూహం ఏంటి..?

నితీశ్ కుమార్ ను రాజకీయాల్లో 'పల్టీ రామ్' అని పిలుస్తుంటారు. ఆయన ఎప్పుడు ఏ వైపు ఉంటారో ఊహించడం కష్టం. అయితే ఈసారి ఆయన రాజీనామా చేసి, సామ్రాట్ చౌదరికి మార్గం సుగమం చేయడం వెనుక కేంద్ర బీజేపీ నాయకత్వ బలమైన వ్యూహం ఉన్నట్లు కనిపిస్తోంది. వచ్చే సార్వత్రిక ఎన్నికల దృష్ట్యా, బిహార్‌లో బలమైన ఓటు బ్యాంక్ ఉన్న 'కుష్వాహ' (ఓబీసీ) సామాజిక వర్గానికి చెందిన సామ్రాట్ చౌదరిని సీఎం చేయడం ద్వారా బీజేపీ సామాజిక సమీకరణాలను తన వైపు తిప్పుకోవాలని చూస్తోంది.

బీజేపీ శాసనసభాపక్ష నేతగా ఎంపిక

నితీశ్ కుమార్ రాజీనామా చేసిన కాసేపటికే బీజేపీ ఎమ్మెల్యేలంతా సమావేశమై సామ్రాట్ చౌదరిని తమ నేతగా ఏకగ్రీవంగా ఎన్నుకున్నారు. ఈ నిర్ణయానికి భాగస్వామ్య పార్టీల అధినేతల నుంచి కూడా మద్దతు లభించింది. సామ్రాట్ చౌదరికి శుభాకాంక్షలు తెలుపుతూ చిరాగ్ పాశ్వాన్ వంటి యువ నేతలు ట్వీట్ చేయడం గమనిస్తే, ఎన్డీయే కూటమిలో ఆయనకు ఉన్న ఆదరణ అర్థం అవుతుంది. అటు పార్టీ క్యాడర్‌లోనూ ఆయన పట్ల ఉన్న సానుకూలత ఇప్పుడు ప్రభుత్వ నిర్వహణకు పెద్ద ప్లస్ పాయింట్ కానుంది.

పరిపాలనలో ఎదురయ్యే సవాళ్లు

ముఖ్యమంత్రిగా సామ్రాట్ చౌదరికి పూలపాన్పు ఉండదు. బిహార్‌లో నిరుద్యోగం, వెనుకబాటుతనం, శాంతిభద్రతల వంటి సమస్యలు జఠిలంగా ఉన్నాయి. పైగా నితీశ్ కుమార్ వంటి సీనియర్ నేత నీడలో కాకుండా, స్వతంత్రంగా నిర్ణయాలు తీసుకొని బీజేపీ మార్కును చూపించాల్సి ఉంటుంది. 2029 ఎన్నికల నాటికి బిహార్‌ను అభివృద్ధి పథంలో నడిపించి, ప్రజల నమ్మకాన్ని చూరగొనడమే ఆయన ముందున్న తక్షణ లక్ష్యం.

సామ్రాట్ చౌదరి ముఖ్యమంత్రిగా బాధ్యతలు చేపట్టడం అనేది బిహార్‌లో ఒక తరగతి రాజకీయాల ముగింపుగా, మరో నూతన శకం ప్రారంభంగా విశ్లేషకులు భావిస్తున్నారు. దూకుడుగా ఉండే ఆయన శైలి, క్షేత్ర స్థాయిలో ఉన్న పట్టు బిహార్ రాజకీయాలను ఎటువైపు నడిపిస్తాయో చూడాలి. రేపటి ప్రమాణ స్వీకారంతో బిహార్ జాతకం మారుతుందో లేదో కాలమే నిర్ణయించాలి.