ఆ ఊర్లో ఒకటే కిడ్నీ.. అసలు స్టోరీ తెలిస్తే షాక్!

కడుపు కోతను మించిన బాధ లేదు. కానీ, కట్టుకున్న పిల్లల ఆకలి కేకలు వినలేక, చేతిలో చిల్లిగవ్వ లేక, అప్పుల ఊబిలో కూరుకుపోయిన ఆ అభాగ్యులు ఒక షాకింగ్ నిర్ణయం తీసుకున్నారు. బతకడం కోసం తమ శరీరంలోని ఒక ముఖ్యమైన అవయవాన్ని అమ్మేసుకుంటున్నారు. అఫ్గానిస్తాన్‌లోని ఒక పల్లెటూరు ఇప్పుడు ప్రపంచవ్యాప్తంగా "ఒక మూత్రపిండం గ్రామం" (వన్ కిడ్నీ విలేజ్) గా పిలవబడుతోంది. అక్కడ జరుగుతున్న గుండెను పిండేసే నిజాలు ఇప్పుడు తెలుసుకుందాం.

ఆకలి తెచ్చిన అపసోపాలు:

అఫ్గానిస్తాన్‌లోని హెరాత్ నగరం శివార్లలో ఉండే ఒక చిన్న ప్రాంతం 'సైషాన్బా బజార్'. ఇక్కడి ప్రజల పరిస్థితి చాలా దారుణం. ఇక 2021లో అక్కడ జరిగిన రాజకీయ మార్పుల వల్ల అంతర్జాతీయ సాయం ఆగిపోయింది. దేశ ఆర్థిక వ్యవస్థ పూర్తిగా కుప్పకూలిపోయింది. ఇక దీంతో ఇక్కడి జనాభా అంతా ఒక్కసారిగా కటిక పేదరికంలోకి జారిపోయింది. తిండికి కూడా డబ్బులు లేని దుస్థితి ఏర్పడింది.

బతకడానికి అవయవాల అమ్మకం:

కుటుంబంలో అందరూ ఆకలితో అలమటిస్తుంటే చూడలేక, పేరుకుపోయిన అప్పులు తీర్చలేక అక్కడి నివాసితులు ఒక ప్రమాదకరమైన దారిని ఎంచుకున్నారు. ఇక తమ ప్రాణాలను పణంగా పెట్టి అయినా సరే, పిల్లలను సాకాలని ఒక కిడ్నీని అమ్మేస్తున్నారు. కొందరు బ్రోకర్లు ఈ పేదరికాన్ని ఆసరాగా చేసుకుని, వైద్యం కోసం వచ్చే ధనవంతులతో వీళ్ళను ముడిపెట్టి వ్యాపారం సాగిస్తున్నారు.

శరీరం సహకరించని జీవితాలు:

క్షణిక ఆవేశంలోనో, నిస్సహాయతతోనో కిడ్నీ అయితే అమ్మేసుకున్నారు కానీ, ఆ తర్వాత వారి జీవితాలు నరకప్రాయంగా మారాయి. సరైన వైద్యం, విశ్రాంతి లేకపోవడంతో సర్జరీ జరిగిన వారంతా తీవ్రమైన నడుము నొప్పి, నీరసంతో బాధపడుతున్నారు. రోజూ కూలి పనులతో జీవనం సాగించే ఆ పేదలు ఇప్పుడు కనీసం బరువులు కూడా ఎత్తలేని పరిస్థితికి చేరి, పూర్తిగా పనికిరాని స్థితిలోకి వెళ్లిపోతున్నారు.

ఒక వైపు ప్రాణం తీస్తున్న ఆకలి, మరోవైపు బతికించుకోవాలని చేసే పోరాటం మధ్య అఫ్గాన్ ప్రజలు నలిగిపోతున్నారు. కేవలం ఒక పూట కూడు కోసం, తమ శరీర భాగాలను కోల్పోవాల్సి రావడం మానవత్వానికే ఒక పెద్ద మచ్చ. అంతర్జాతీయ సమాజం స్పందించి, తగిన సాయం అందిస్తే తప్ప ఆ 'మూత్రపిండాల గ్రామం' లోని కన్నీళ్లు తుడవటం ఎవరికీ సాధ్యం కాదు.