మైక్రోసాఫ్ట్‌లో 60 వేల మందికి వాలంటరీ ఎగ్జిట్ ఆఫర్?

ప్రపంచ టెక్ దిగ్గజం మైక్రోసాఫ్ట్ కీలక నిర్ణయం తీసుకుంది. సుమారు 60 వేల మంది ఉద్యోగులకు స్వచ్ఛందంగా కంపెనీని వీడే అవకాశం కల్పిస్తోంది. ఖర్చులను తగ్గించుకుంటూనే ఆర్టిఫిషియల్ ఇంటెలిజెన్స్‌ (ఏఐ) రంగంలో భారీగా పెట్టుబడులు పెడుతున్న నేపథ్యంలో ఈ నిర్ణయం తీసుకుంది. కంపెనీ మొత్తం ఉద్యోగుల్లో దాదాపు 27 శాతం మందికి ఈ ఆఫర్ వర్తించే అవకాశం ఉంది.

అమెరికా, కెనడా, భారత్, బ్రిటన్‌లోని ఎంపిక చేసిన విభాగాల్లో వైస్ ప్రెసిడెంట్ స్థాయి కంటే దిగువన ఉన్న ఉద్యోగులు ఈ పథకానికి అర్హులు. అయితే డేటా సెంటర్లు, సేల్స్, మార్కెటింగ్ సహా కొన్ని విభాగాల ఉద్యోగులకు ఈ అవకాశం ఉండదు. ఉద్యోగులు తమ భవిష్యత్తుపై నిర్ణయం తీసుకునేందుకు మరింత వెసులుబాటు కల్పించడమే ఈ పథకం ఉద్దేశమని కంపెనీ చీఫ్ పీపుల్ ఆఫీసర్ అమీ కోల్‌మన్ ఉద్యోగులకు పంపిన మెమోలో పేర్కొన్నారు.

ఈ ఏడాది మైక్రోసాఫ్ట్ వాలంటరీ ఎగ్జిట్ ఆఫర్ ప్రకటించడం ఇది రెండోసారి. గత ఏప్రిల్‌లో అమెరికాలోని సుమారు 7 శాతం మంది ఉద్యోగులకు ముందస్తు పదవీ విరమణ అవకాశం కల్పించినట్లు వార్తలు వచ్చాయి. అర్హులైన వారిలో దాదాపు 30 శాతం మంది ఆ పథకాన్ని ఎంచుకున్నట్లు సీఎన్‌బీసీ నివేదించింది.

మైక్రోసాఫ్ట్‌లో గత ఏడాది చివరికి 2.28 లక్షల మంది ఉద్యోగులు ఉండగా, జూన్ చివరి నాటికి ఆ సంఖ్య 2.23 లక్షలకు తగ్గింది. ఈ వారం కంపెనీ త్రైమాసిక ఆర్థిక ఫలితాలు ప్రకటించనున్న నేపథ్యంలో ఈ పరిణామం ప్రాధాన్యం సంతరించుకుంది. ఏఐపై పెరుగుతున్న పెట్టుబడులు టెక్ రంగంలోని ఉద్యోగాలపై ఎలాంటి ప్రభావం చూపుతాయన్న చర్చకు ఈ నిర్ణయం మరింత ఊతమిస్తోంది.