ఆయన తిన్నాకే తినేవాడిని.. ధ‌నుష్ తో బాండింగ్ పై విఘ్నేష్ కామెంట్స్!

సినీ పరిశ్రమలో స్నేహాలు, విభేదాలు ఎంత వేగంగా మారుతాయో మరోసారి స్పష్టమైంది. డైరెక్ట‌ర్ విఘ్నేష్ శివన్ తాజాగా చేసిన వ్యాఖ్యలు, హీరో ధనుష్ కి, తన మధ్య ఏర్పడిన దూరంపై ఎమోష‌న‌ల్ యాంగిల్ ను బయటపెట్టాయి. వ్యక్తిగతంగా ఎంతో గౌరవించే వ్యక్తిని కోల్పోయాననే బాధను ఆయన వ్యక్తం చేయడం, ఈ వివాదానికి కొత్త దృక్కోణాన్ని అందిస్తోంది.

ధ‌నుష్ లో నా తండ్రిని చూసుకుంటా

రీసెంట్ గా ఓ ఇంటర్వ్యూలో మాట్లాడిన విఘ్నేష్ శివన్, ధనుష్‌ను కేవలం యాక్ట‌ర్ గా లేదా నిర్మాతగా కాకుండా, త‌న లైఫ్ లో ఒక ముఖ్యమైన వ్యక్తిగా భావించానని తెలిపారు. ధ‌నుష్ బ‌ర్త్ డే, త‌న తండ్రి మరణించిన రోజు ఒకటే కావడం వల్ల, అత‌నిలో త‌న‌కు ఒక తండ్రి పోలిక కనిపిస్తుంద‌ని చెప్పడం, వారి బంధం ఎంత ప‌ర్స‌న‌ల్ లెవెల్ కు వెళ్లిందో చూపిస్తుంది. ఓ సినిమా టైమ్ లో రెండు సంవత్సరాలు ధ‌నుష్ తో కలిసి పని చేసిన అనుభవాన్ని గుర్తుచేసుకుంటూ, ఆ టైమ్ లో ఆయన తిన్న త‌ర్వాతే తాను తినేవాడిన‌ని చెప్పడం, వారి మ‌ధ్య బాండింగ్ ను ప్రతిబింబిస్తుంది.

అయితే, ఈ స్నేహం 2024లో వచ్చిన వివాదంతో చీలిపోయింది. నయనతార రిలీజ్ చేసిన ఓపెన్ లెటర్ ఈ విభేదాలను పబ్లిక్‌లోకి తీసుకొచ్చింది. ధనుష్ .. తనపై మరియు తన భర్త విఘ్నేష్ శివన్‌పై లీగల్ చర్యలు తీసుకోవడాన్ని విమర్శిస్తూ, కాపీరైట్ విషయంలో చట్టపరంగా సరైనదైనా, నైతికంగా మాత్రం ఆయన తప్పు వైపు ఉన్నారని ఆమె వ్యాఖ్యానించారు. ఈ వివాదం ప్రధానంగా 2015లో వచ్చిన నానుమ్ రౌడీ దాన్ సినిమాకు సంబంధించిన మూడు సెకన్ల క్లిప్‌ను నెట్‌ఫ్లిక్స్ డాక్యుమెంటరీ ట్రైలర్‌లో ఉపయోగించడం చుట్టూ తిరిగింది.

ఈ సినిమా విఘ్నేష్ శివన్ దర్శకత్వంలో తెరకెక్కగా, ధనుష్ నిర్మించారు. ఈ సినిమా షూటింగ్ టైమ్ లోనే నయనతార, విఘ్నేష్ శివన్ మధ్య ప్రేమ మొదలై, తర్వాత వివాహానికి దారి తీసింది. అందువల్ల ఈ ప్రాజెక్ట్ వారికి వ్యక్తిగతంగా కూడా ఎంతో ప్రాధాన్యం కలిగినది. కానీ అదే ప్రాజెక్ట్ ఇప్పుడు విభేదాలకు కేంద్రబిందువుగా మారడం విశేషం. ఇప్పటికీ ధనుష్ ఈ వివాదంపై పబ్లిక్‌గా స్పందించకపోయినా, లీగల్ మార్గాన్ని ఎంచుకోవడం ద్వారా తన వైఖరిని స్పష్టంచేశారు. మరోవైపు విఘ్నేష్ శివన్ మాత్రం, ఈ విభేదంలో ఎక్కడో తప్పు జరిగిందనే భావనతో, కోల్పోయిన స్నేహంపై విచారం వ్యక్తం చేస్తున్నారు. ఇది సినీ రంగంలో వ్యక్తిగత సంబంధాలు, ప్రొఫెషనల్ నిర్ణయాల మధ్య ఉన్న సున్నితమైన గీతను మరోసారి గుర్తు చేస్తోంది.

ఇక ప్రొఫెషనల్ పరంగా చూస్తే, విఘ్నేష్ శివన్ దర్శకత్వం వహించిన ల‌వ్ ఇన్సూరెన్స్ కంపెనీ త్వరలో రిలీజ్‌కు రెడీ అవుతోంది. ఈ సైన్స్ ఫిక్షన్ రొమాంటిక్ డ్రామాలో ప్రదీప్ రంగనాథన్, కృతి శెట్టి ప్రధాన పాత్రల్లో నటించారు. మరోవైపు నయనతార, ధనుష్ ఇద్దరూ తమ తమ ప్రాజెక్టులతో బిజీగా ఉన్నారు. వ్యక్తిగత విభేదాలు ఉన్నప్పటికీ, ప్రొఫెషనల్‌గా ముందుకు సాగుతున్న ఈ ముగ్గురూ, భవిష్యత్తులో ఈ విభేదాలను పక్కనపెట్టి మళ్లీ కలిసి పనిచేస్తారా అన్నది ఇప్పుడు ఆసక్తికరంగా మారింది.