తారల ఇంట అల్లరి చేసే ముద్దుల పిల్లులు!

నేడు ప్రపంచవ్యాప్తంగా అంతర్జాతీయ పిల్లుల దినోత్సవాన్ని అత్యంత ఉత్సాహంగా జరుపుకుంటున్నారు. ఈ ప్రత్యేక సందర్భం కేవలం వీధి పిల్లుల సంరక్షణ గురించే కాకుండా ఇళ్లలో భాగమైపోయిన పెంపుడు మూగజీవాల పట్ల ప్రేమను చాటుకోవడానికి చక్కటి వేదికగా నిలుస్తోంది. బిజీ షెడ్యూల్స్ మధ్య క్షణం తీరిక లేకుండా గడిపే సినీ సెలబ్రిటీలు సైతం తమ ఇళ్లలో పిల్లులను ఎంతో అల్లారుముద్దుగా పెంచుకుంటూ వాటితో తమకున్న అనుబంధాన్ని ఎప్పటికప్పుడు అభిమానులతో పంచుకుంటూ ఉంటారు.

బాలీవుడ్‌లో జంతు ప్రేమికురాలిగా ముందుండే ప్రముఖ నటి అలియా భట్ తన పెంపుడు పిల్లి ఎడ్వర్డ్‌తో గడిపే క్షణాలను సోషల్ మీడియాలో తరచూ పంచుకుంటారు. అలియాకు ఎడ్వర్డ్ అంటే ప్రాణమని, షూటింగ్ లేని సమయంలో ఎక్కువ సమయం దానితోనే గడుపుతానని పలు సందర్భాల్లో తెలిపారు. సోషల్ మీడియాలోనూ క్యూట్ క్యాట్‌కు విపరీతమైన ఫ్యాన్ ఫాలోయింగ్ ఉంది. అలియా జీవితంలో ఈ పిల్లి కేవలం ఒక మూగజీవి మాత్రమే కాదు. తన కుటుంబంలో ముఖ్యమైన సభ్యుడిగా మారిపోయింది.

అలాగే గ్లామర్ తార జాక్వెలిన్ ఫెర్నాండెజ్ కూడా పిల్లులంటే అమితమైన ప్రేమ. ఆమె ఇంట్లో పెంచుకుంటున్న మియు మియు అనే పర్షియన్ జాతి పిల్లి ఆమెతో పాటే ఇంట్లో హడావుడి చేస్తుంటుంది. జిమ్ వర్కవుట్లు, యోగా చేసే సమయంలో కూడా జాక్వెలిన్ పెంపుడు పిల్లితో సరదాగా గడుపుతుంటారు. జంతు సంరక్షణ పట్ల ఎప్పుడూ ముందుండే జాక్వెలిన్, మూగజీవాల రక్షణ కోసం తన వంతుగా ఎన్నో సామాజిక కార్యక్రమాలకు మద్దతు ఇస్తుంటారు.

బాలీవుడ్‌లో తనకంటూ ప్రత్యేక గుర్తింపు తెచ్చుకున్న రిచా చద్దాకు కూడా పిల్లులంటే విపరీతమైన ఇష్టం. ఆమె తన ఇంట్లో `కమ్లి`, `జుగ్ని` అనే పేర్లతో రెండు పిల్లులను ఎంతో అప్యాయంగా పెంచుకుంటున్నారు. షూటింగ్ ప్రదేశాల నుండి ఇంటికి రాగానే = పిల్లులతో ఆడుకుంటూ అలసటను మర్చిపోతానని రిచా చెబుతుంటారు. స్ట్రీట్ క్యాట్స్‌ను దత్తత తీసుకోవడంలోనూ వాటిని సంరక్షించడంలోనూ తోటి నటీనటులకు ఆదర్శంగా నిలుస్తున్నారు.

మరోవైపు ఫిట్‌నెస్ ఐకాన్‌గా పేరు తెచ్చుకున్న శిల్పా శెట్టి కూడా పిల్లులను పెంచుకోవడంలో ముందున్నారు. ఆమె ఇంట్లో అల్లరి చేసే సింబా అనే పెంపుడు పిల్లి ఫోటోలు, వీడియోలు తరచూ నెట్టింట వైరల్ అవుతుంటాయి. ఇంట్లోని కుటుంబ సభ్యులతో పాటు పిల్లి చేసే అల్లరి పనులు పిల్లలను ఎంతగానో ఆకట్టుకుంటాయని శిల్పా శెట్టి పేర్కొన్నారు. సెలబ్రిటీలు ఈ విధంగా పిల్లులపై చూపే మమకారం చూస్తుంటే వారికి మూగజీవాల పట్ల ఉన్న నిజమైన ప్రేమ ఇట్టే అర్థమవుతుంది.

ఆ విధంగా ఇటు వెండితెరపై అలరిస్తూనే, అటు ఇళ్లలో పిల్లులతో ఎమోషనల్ బాండింగ్ కొనసాగిస్తున్న తారలు నేటితరం యువతకు ఆదర్శంగా నిలుస్తున్నారు. రంగుల ప్రపంచపు ఒత్తిళ్ల నుంచి విరామం తీసుకుని ఇలాంటి పెంపుడు జంతువులతో గడపడం మానసిక ప్రశాంతతను ఇస్తుందని నిరూపిస్తున్నారు. అంతర్జాతీయ పిల్లుల దినోత్సవం సందర్భంగా తారలు ఇస్తున్న సందేశం సమాజంలో మూగజీవాల పట్ల మరింత బాధ్యతను పెంచుతోంది.