బలగం వేణు.. ఆ ఇద్దరిలో ఎవరు?
| ఇటీవలి కాలంలో దర్శకులు కొత్త ప్రయోగాలు చేస్తూ.. స్వచ్చమైన కథలతో సినిమాలు చేయడం మొదలెట్టారు.
ఇటీవలి కాలంలో దర్శకులు కొత్త ప్రయోగాలు చేస్తూ.. స్వచ్చమైన కథలతో సినిమాలు చేయడం మొదలెట్టారు. అలా వచ్చిన దర్శకుల్లో వేణు ఎల్దండి ఒకడు. కమెడియన్ నుంచి డైరెక్టర్‌గా మారి అతడు తెరకెక్కించిన సినిమానే ‘బలగం’. తెలంగాణ ప్రాంతంలోని సంప్రదాయాలకు అద్దం పట్టే సహజ సిద్ధమైన కథతో రూపొందిన ఈ మూవీ సంచలన విజయాన్ని సొంతం చేసుకుని ప్రశంసలు కూడా అందుకుంది.
మొదటి సినిమా బ్లాక్ బస్టర్ హిట్ అయినా వేణు ఎల్దండి ఇప్పటి వరకూ రెండో చిత్రాన్ని పట్టాలెక్కించలేదు. వాస్తవానికి అతడు నేచురల్ స్టార్ నానితో ‘ఎల్లమ్మ’ అనే సినిమా చేస్తున్నట్లు, దీన్ని శ్రీ వెంకటేశ్వర క్రియేషన్స్ బ్యానర్‌పై దిల్ రాజు నిర్మిస్తున్నట్లు ప్రకటన వచ్చింది. ఆ వెంటనే దీనికి సంబంధించిన షూటింగ్ కూడా త్వరలోనే ప్రారంభం అవుతుందని ఆ మధ్య జోరుగా వార్తలు వచ్చాయి.
నేచురల్ స్టార్ నానితో వేణు ఎల్దండి సినిమా ఎప్పుడు మొదలవుతుందా అని అందరూ వేయి కళ్లతో వేచి చూశారు. కానీ, దీనిపై ఎలాంటి క్లారిటీ మాత్రం రాలేదు. అయితే, దిల్ రాజు మాత్రం ఈ ప్రాజెక్టు కచ్చితంగా ఉంటుందని చెప్పారు. ఆ తర్వాత వేణు ఎల్దండి.. తన ప్రాజెక్టును ఆపేశాడని ప్రచారం జరిగింది. ఈ పరిస్థితుల్లో ఈ టాలెంటెడ్ డైరెక్టర్ నితిన్‌తో ఈ సినిమాను చేస్తున్నట్లు టాక్ వచ్చింది.
‘బలగం’ వంటి బంపర్ హిట్ కొట్టినా వేణు ఎల్దండి రెండో సినిమా స్టార్ట్ కాకపోవడం టాలీవుడ్‌లో హాట్ టాపిక్ అవుతోంది. ఈ పరిస్థితుల్లో ఇప్పుడు అతడు హీరోను మళ్లీ మార్చేశాడని తాజాగా ఓ న్యూస్ బయటకు వచ్చింది. దీని ప్రకారం.. ఈ చిత్రంలో హనుమాన్‌తో సెన్సేషనల్ హిట్ కొట్టిన తేజ సజ్జా హీరోగా నటిస్తున్నాడట. దీనికి సంబంధించిన ప్రకటన అతి త్వరలోనే రాబోతుందని అంటున్నారు.
తేజ సజ్జాతో వేణు ఎల్దండి తెరకెక్కించే సినిమా ‘ఎల్లమ్మ’ స్టోరీతోనే అని కూడా ఓ న్యూస్ వైరల్ అవుతోంది. అంటే నేచురల్ స్టార్ నాని ఒప్పుకున్న కథనే ఇప్పుడు ఈ యంగ్ హీరో చేయబోతున్నాడని సమాచారం. ఒకవైపు నితిన్, మరోవైపు నాని తమ తమ కొత్త ప్రాజెక్టులతో బిజీగా ఉన్నారు. వాళ్ల కమిట్‌మెంట్లు అయ్యే సరికి చాలా సమయం పట్టేలా ఉండడం వల్ల వేణు కొత్త హీరోను చూసుకున్నాడని చెప్తున్నారు.
మరోవైపు, తేజ సజ్జా ఇప్పుడు ‘మిరాయ్’ అనే ఫుల్ లెంగ్త్ యాక్షన్ సినిమాలో నటిస్తున్న విషయం తెలిసిందే. కార్తీక్ ఘట్టమనేని తెరకెక్కిస్తోన్న ఈ చిత్రానికి సంబంధించిన షూటింగ్ శరవేగంగా సాగుతోంది. దీని తర్వాత తేజ సజ్జా ‘ఎల్లమ్మ’నే చేస్తాడని టాక్. దీంతో ఈ ప్రాజెక్టుపై అంచనాలు పెరిగిపోతోన్నాయి.