AI కంపెనీపై ఊర్వ‌శి దావా.. దేశంలో ఇలాంటి టాప్-10కేసులు ఇవే

కృత్రిమ మేధస్సు (AI) సాంకేతిక‌త‌ వేగంగా అభివృద్ధి చెందుతున్న తరుణంలో పాపుల‌ర్ సెలబ్రిటీల వ్యక్తిగత హక్కులకు భంగం వాటిల్లుతోంది. డీప్ ఫేక్ ల బెడ‌ద ఎక్కువైపోయింది. ఇది తార‌ల‌కు తీర‌ని అవ‌మానం లేదా న‌ష్టాన్ని మిగిల్చే దుశ్చ‌ర్య‌. తాజాగా ప్రముఖ బాలీవుడ్ నటి ఉర్వశి రౌతేలా తన అనుమతి లేకుండా పేరు, ఫోటోలు, వీడియోలను వాణిజ్య ప్రయోజనాల కోసం ఉపయోగించిన లాస్ ఏంజెల్స్‌కు చెందిన ఒక AI కంపెనీపై చట్టపరమైన చర్యలు ప్రారంభించారు. ఈ అనధికారిక వాడకం ద్వారా ఆ కంపెనీ బిలియన్ల డాలర్ల వ్యాపార విలువను సృష్టించిందని.. దీనికి సంబంధించి ప్రస్తుతం రూ. 7000 కోట్ల నష్టపరిహారాన్ని అంచనా వేస్తున్నట్లు ఆమె బృందం స్పష్టం చేసింది.

ఏఐ టెక్నాలజీని అభివృద్ధి చేయడం లేదా వ్యాపారాన్ని నిర్మించడం అంటే ఏ వ్యక్తి గుర్తింపునైనా అనుమతి లేకుండా వాణిజ్యపరంగా దోచుకునే హక్కును ఇవ్వదని ఉర్వశి టీమ్ గట్టిగా తేల్చిచెప్పింది. మీ AI కంపెనీని నిర్మించుకోండి.. మీ బ్రాండ్‌ను పెంచుకోండి.. కానీ అనుమతి లేకుండా ఉర్వశి పేరును మీ వ్యాపారంలోకి లాగొద్దు.. అంటూ ఆ సంస్థను వారు హెచ్చరించారు. గతంలో మహిళా నటులను ఒకరికొకరు వ్యతిరేకంగా చిత్రీకరించే AI సృష్టిలను ఆమె బహిరంగంగా ఖండించిన విషయం తెలిసిందే.

ఇది కేవ‌లం ఊర్వ‌శికి మాత్రమే సంబంధించిన కేసు కాదు. ప్రపంచవ్యాప్తంగా.. మన దేశంలో ప్రముఖ నటీనటులు తమ వ్యక్తిగత హక్కుల పరిరక్షణ కోసం డిజిటల్ ప్లాట్‌ఫామ్‌లు- AI కంపెనీలపై పోరాటం చేస్తున్న సందర్భాలు అనేకం ఉన్నాయి. మోహన్‌లాల్‌కు సంబంధించి 2026లో వచ్చిన ఒక కేసులో ఆయన వ్యక్తిత్వాన్ని అనధికారికంగా వాణిజ్యపరంగా దోచుకోవడాన్ని వ్యతిరేకిస్తూ న్యాయస్థానం రక్షణ.. తగిన ఆదేశాలు జారీ చేసింది. అలాగే వరుణ్ ధావన్, రవి కిషన్ వంటి నటులు కూడా తమ పేరు, ఇమేజ్, లైక్‌నెస్‌లను అనధికారికంగా వాడుకుంటున్న డిజిటల్ పద్ధతులపై న్యాయపరమైన రక్షణను కోరారు.

సెలబ్రిటీల ప్రొఫైళ్లను అనుమతి లేకుండా వాడటం ద్వారా ఏఐ కంపెనీలు బిలియన్ల కొద్దీ విలువను సృష్టిస్తున్నాయని.. దీనివల్ల నటీనటులు తీవ్రంగా నష్టపోతున్నారని న్యాయవాదులు వాదిస్తున్నారు. సెలబ్రిటీల పేర్లు, ఫోటోలు, డిజిటల్ రూపాలను అనుమతి లేకుండా సృష్టించడం లేదా డీప్‌ఫేక్స్ ద్వారా దుర్వినియోగం చేయడంపై ఢిల్లీ హైకోర్టు పలువురు నటులకు అనుకూలంగా రక్షణ ఆదేశాలు మంజూరు చేసింది. ఈ నేపథ్యంలో సెలబ్రిటీల బృందాలు ఏఐ సంస్థలకు క‌చ్చితమైన అనుమతి తప్పనిసరి అనే బలమైన సందేశాన్ని ఇస్తున్నాయి.

భారతదేశంలో మోహన్‌లాల్, వరుణ్ ధావన్, రవి కిషన్ వంటి ప్రముఖ నటులకు సంబంధించిన వ్యక్తిత్వ హక్కులు.. డీప్‌ఫేక్స్... AI-జనరేటెడ్ కంటెంట్‌పై పెరుగుతున్న లిటిగేషన్ల నేపథ్యంలో ఉర్వశి రౌతేలా తీసుకున్న ఈ చట్టపరమైన నిర్ణయం ప్రాధాన్యత సంతరించుకుంది. సెలబ్రిటీల వ్యక్తిగత గుర్తింపునకు భద్రత కల్పించే దిశగా ఇలాంటి కేసులు భవిష్యత్తులో డిజిటల్- ఏఐ రంగాలకు కఠినమైన నిబంధనలను తెచ్చే అవకాశం ఉంది.