అగ్ర హీరోల పాన్ ఇండియా ప్లానింగ్!

భారతీయ చలనచిత్ర పరిశ్రమలో పాన్-ఇండియా ట్రెండ్ ఊపందుకున్న తర్వాత టాలీవుడ్ స్టార్ హీరోల ఆలోచనా విధానం పూర్తిగా మారిపోయింది. స్థానిక మార్కెట్‌పైనే కాకుండా గ్లోబల్ స్థాయిలో ప్రేక్షకులను ఆకట్టుకునేలా కథల ఎంపిక నుండి రిలీజ్ స్ట్రాటజీ వరకు ప్రతి అంశాన్ని అత్యంత వ్యూహాత్మకంగా ప్లాన్ చేస్తున్నారు. ఈ పాన్-ఇండియా రేసులో ప్రతి హీరో తనదైన ప్రత్యేకమైన శైలిని అనుసరిస్తూ బాక్సాఫీస్ పై దండయాత్ర చేసేందుకు సిద్ధ మవుతున్నారు. అగ్ర హీరోల సరికొత్త ప్రణాళికలు ఇప్పుడు సినీ వర్గాల్లో చర్చనీయాంశంగా మారుతున్నాయి.

ఈ జాబితాలో రెబల్ స్టార్ ప్రభాస్ మార్కెట్ ఎప్పుడూ ఒక రేంజ్‌లో ఉంది. ఏమాత్రం విశ్రాంతి లేకుండా వరుస పాన్-ఇండియా సినిమాలను లైన్‌లో పెట్టడం ఆయన స్టైల్. ప్రస్తుతం హను రాఘవపుడి దర్శకత్వంలో `ఫౌజీ`, సందీప్ రెడ్డి వంగా దర్శకత్వంలో `స్పిరిట్` షూటింగ్‌లతో బిజీగా ఉన్న ప్రభాస్ త్వరలోనే `కల్కి 2`, `సలార్ 2` వంటి మోస్ట్ అవేటెడ్ సీక్వెల్స్‌ను కూడా సెట్స్ పైకి తీసుకువెళ్లనున్నారు. ఒక్కో సినిమా కోసం ఏళ్ల తరబడి సమయం వృధా చేయకుండా ప్యారలల్‌గా భారీ ప్రాజెక్ట్‌లను ఫినిష్ చేస్తూ బాక్సాఫీస్ వద్ద సునామీ సృష్టించేందుకు డార్లింగ్ పక్కా ప్రణాళికతో ముందుకెళ్తున్నారు.

మరోవైపు ఐకాన్ స్టార్ అల్లు అర్జున్ స్ట్రాటజీ కూడా నెక్స్ట్ లెవెల్‌లో ఉంది. `పుష్ప 2` తో దేశవ్యాప్తంగా మార్కెట్‌ను భారీగా పెంచుకున్న బన్నీ తదుపరి ప్రాజెక్ట్‌ల విషయంలో మరింత ఆచితూచి అడుగులు వేస్తున్నారు. ప్రస్తుతం అట్లీ దర్శకత్వంలో `రాకా` సినిమా చేస్తున్న బ‌న్నీ ఆ తర్వాత లోకేష్ కనగరాజ్, బాసిల్ జోసెఫ్, సంజయ్ లీలా భన్సాలీ వంటి క్రేజీ డైరెక్టర్లతో సినిమాలు చేసేందుకు సన్నాహాలు చేసుకుంటున్నారు. తన పాన్-ఇండియా స్టార్‌డమ్‌ను మరింత గ్లోబల్ స్థాయికి తీసుకువెళ్లేలా పక్కా లైనప్‌ను సిద్ధం చేసుకుంటున్నారు.

యంగ్ టైగర్ ఎన్టీఆర్ - మెగా పవర్ స్టార్ రామ్ చరణ్ కూడా క్యాలిక్యులేటెడ్ అప్రోచ్‌ను ఫాలో అవుతున్నారు. `దేవర`, `వార్ 2` చిత్రాల తర్వాత తారక్ ప్రశాంత్ నీల్ దర్శకత్వంలో `డ్రాగన్` మూవీని స్టార్ట్ చేశారు. ఆ తర్వాత `గాడ్ ఆఫ్ వార్` సినిమాను పట్టాలెక్కించేందుకు సన్నాహాలు చేస్తున్నారు. ఇక రామ్ చరణ్ విషయానికి వస్తే తదుపరి చిత్రాన్ని స్టార్ డైరెక్టర్ సుకుమార్ దర్శకత్వంలో చేయబోతున్నట్లు తెలుస్తోంది. ఈ ప్రాజెక్ట్‌లపై భారీ అంచనాలు నెలకొనడంతో ఇద్దరు హీరోలు తమ ఇమేజ్‌కు తగిన కథలతోనే ముందుకు వెళ్తున్నారు.

అగ్ర హీరోలందరూ అనుసరిస్తున్న గ్లోబల్ ప్లానింగ్ టాలీవుడ్ స్థాయిని పెంచడమే కాకుండా ఇండియన్ సినిమా సత్తాను ప్రపంచ వేదికపై చాటేలా చేస్తోంది. విభిన్న జానర్లు, ప్రముఖ దర్శకుల కలయిక , భారీ బడ్జెట్ నిర్మాణ విలువలతో ప్రాజెక్ట్‌లు తెరకెక్కుతుండటం విశేషం. ఈ మూడు నాలుగేళ్ల‌లో బాక్సాఫీస్ రికార్డులను తిరగరాయడానికి ఈ స్టార్ల లైనప్ ఎంతగానో దోహదపడుతుందని ట్రేడ్ వర్గాలు బ‌లంగా నమ్ముతున్నాయి.

టాలీవుడ్ స్టార్ హీరోలు కేవలం ప్రాంతీయ పరిమితులకు పరిమితం కాకుండా ప్రపంచ స్థాయి ప్రేక్షకులను టార్గెట్ చేస్తూ సాగుతున్న తీరు అభినందనీయం. ఎవరికి వారు ప్రత్యేకమైన స్ట్రాటజీలతో బాక్సాఫీస్ పై ఆధిపత్యం చెలాయించేందుకు సిద్ధమవుతున్న తరుణంలో రాబోయే రోజుల్లో బాక్సాఫీస్ వద్ద సరికొత్త రికార్డులు బద్దలవడం ఖాయంగా కనిపిస్తోంది.