మూడు నెలల బాక్సాఫీస్ జోరు.. సెప్టెంబర్ లో మాత్రం..

జూలై, ఆగస్టు రెండు నెలలు టాలీవుడ్‌కు బాగా కలిసొచ్చాయి. మా ఇంటి బంగారం, లెనిన్, చెన్నై లవ్ స్టోరీ, కొరియన్ కనకరాజు, విశ్వనాథ్ అండ్ సన్స్, ఇరుముడి వరుసగా థియేటర్లలో నిలబడి మంచి రన్ తెచ్చుకున్నాయి. పెద్ద స్టార్ సినిమాలే కాకుండా వేర్వేరు జోనర్లలో వచ్చిన సినిమాలు కూడా ఆడియన్స్‌ను థియేటర్లకు రప్పించడంతో బాక్సాఫీస్‌కు మళ్లీ జోష్ వచ్చింది. రెండు నెలల్లో ఆరు సినిమాలు హిట్లుగా నిలవడంతో అదే ఊపు సెప్టెంబర్‌లోనూ కొనసాగుతుందని ఇండస్ట్రీలో అంచనాలు వచ్చాయి. కానీ నెల పూర్తయ్యేసరికి ఆ లెక్క పూర్తిగా మారిపోయింది.

రోమాంచకం, ఐ యామ్ గేమ్, రాంబా ఊర్వశి మేనక, సర్దార్ 2, ఎపిక్ ఫస్ట్ సెమిస్టర్, మహేంద్రగిరి వారాహి, హ్యాపీ జర్నీ, మిస్సింగ్ మేఘన ఇలా వరుసగా సినిమాలు థియేటర్లలోకి వచ్చాయి. ఇందులో కొన్ని సినిమాలకు రిలీజ్‌కు ముందు ప్రమోషన్స్ కూడా బాగానే జరిగాయి. కానీ ఫస్ట్ వీకెండ్ తర్వాత షోలు నిలబెట్టుకున్నవి చాలా తక్కువ. ఒక సినిమాకు టాక్ కాస్త పాజిటివ్‌గా వచ్చినా, అది పెద్ద కలెక్షన్ రన్‌గా మారలేదు.

డబ్బింగ్ సినిమాలు కూడా ఈ గ్యాప్‌ను పూర్తిగా ఫిల్ చేయలేకపోయాయి. కొన్ని చిత్రాలకు హైదరాబాద్, ఇతర నగరాల్లోని మల్టీప్లెక్సుల్లో ఓ మోస్తరు రెస్పాన్స్ కనిపించింది. కానీ తెలుగు రాష్ట్రాల మొత్తం మార్కెట్‌ను పట్టుకునే సినిమా మాత్రం రాలేదు. వీకెండ్స్‌లో కొంత కదలిక కనిపించినా, వీక్ డేస్‌కు వచ్చేసరికి చాలా చోట్ల ఆక్యుపెన్సీలు మళ్లీ తగ్గిపోయాయి.

నెలాఖరులో నాని ది ప్యారడైజ్ రావడంతో పరిస్థితి మారుతుందేమో అనిపించింది. ఓపెనింగ్స్ మాత్రం నాని కెరీర్‌లోనే పెద్ద స్థాయిలో వచ్చాయి. నైజం ఏరియాలో జోరు బాగానే కనిపించింది. కానీ డివైడ్ టాక్ రావడంతో మిగతా ప్రాంతాల్లో అదే స్పీడ్ కొనసాగలేదు. భారీ బిజినెస్‌తో వచ్చిన సినిమా కావడంతో కలెక్షన్స్ పెద్ద నంబర్లలో ఉన్నా, అన్ని ఏరియాల్లో డిస్ట్రిబ్యూటర్లు వెంటనే లాభాల్లోకి వెళ్లే పరిస్థితి రాలేదు.

విచిత్రం ఏంటంటే సెప్టెంబర్‌లో సినిమాలు లేవు అనే సమస్యే లేదు. రిలీజ్‌లు చాలానే ఉన్నాయి. కానీ ఆడియన్స్‌ను రెండో వారానికి కూడా పట్టుకుని ఉంచిన సినిమా కనిపించలేదు. ఒక సినిమా మీద టాక్ తగ్గేలోపే మరో రిలీజ్ వచ్చేది. అది కూడా కొన్ని రోజులు మాత్రమే నిలబడేది. దీంతో థియేటర్లకు కంటిన్యూగా వచ్చే ఫుట్‌ఫాల్‌లో పెద్ద గ్యాప్ కనిపించింది.

ఇప్పుడు అక్టోబర్ మొదటివారంలోనే మరో బ్యాచ్ సినిమాలు వస్తున్నాయి. గాంధీ జయంతి సెలవుతో డోంట్ ట్రబుల్ ది ట్రబుల్, సిగ్మా, డోరతి, అనకాపల్లి లాంటి సినిమాలకు మంచి డేట్ దొరికింది. సెప్టెంబర్‌లో మిస్ అయిన బాక్సాఫీస్ ఊపును వీటిలో ఏ సినిమా పట్టుకుంటుందో చూడాలి.