మ్యూజిక్ వార్‌లో టాప్ గేర్ లో కోలీవుడ్.. ఇంకా సేఫ్ జోన్‌లోనే టాలీవుడ్?

దక్షిణ భారత సినీ పరిశ్రమల్లో తమిళ సినిమా సంగీత పరంగా చూపిస్తున్న బలం రీసెంట్ టైమ్స్ లో మరింత స్పష్టంగా కనిపిస్తోంది. ముఖ్యంగా మ్యూజిక్ డైరెక్టర్ల డెప్త్ విషయంలో తమిళ ఇండస్ట్రీ ప్రస్తుతం ముందంజలో ఉందనే అభిప్రాయం సినీ వర్గాల్లో వినిపిస్తోంది.

మ్యూజిక్ డైరెక్టర్ల డెప్త్ – స్పష్టమైన తేడా

తమిళ సినిమాలో ఒకరిద్దరు కాదు, దాదాపు పది మంది వరకు స్ట్రాంగ్ మ్యూజిక్ కంపోజర్లు సత్తా చాటుతున్నారు. అనిరుధ్ ర‌విచంద‌ర్, సంతోష్ నారాయ‌ణ‌న్, జి.వి ప్ర‌కాష్ కుమార్, ఏఆర్ రెహ‌మాన్, హారిస్ జ‌య‌రాజ్, యువ‌న్ శంక‌ర్ రాజా లాంటి మ్యూజిక్ డైరెక్ట‌ర్లు రెగ్యుల‌ర్ గా చార్ట్‌బస్టర్ ఆల్బమ్స్ అందిస్తున్నారు. వీరిలో ప్రతి ఒక్కరూ తమకంటూ ప్రత్యేక శైలి కలిగి ఉండటంతో సినిమాల మధ్య సంగీత పరమైన వైవిధ్యం కనిపిస్తోంది.

ఇక తెలుగు పరిశ్రమ విషయానికి వస్తే, ప్రస్తుతం ప్రధానంగా దేవీ శ్రీ ప్ర‌సాద్, త‌మ‌న్ పై ఎక్కువ‌గా ఆధారపడటం కనిపిస్తోంది. వీరిద్దరూ గతంలో అద్భుతమైన ఆల్బమ్స్ ఇచ్చినా, రీసెంట్ టైమ్స్ లో వారి క‌న్‌సిస్టెన్సీపై ప్రశ్నలు ఎదురవుతున్నాయి. అలా అని టాలీవుడ్ లో కొత్త సంగీత దర్శకులు రావ‌డం లేదా అంటే అలా ఏమీ లేదు. కొత్త వాళ్లు వస్తున్నప్పటికీ, పెద్ద స్టార్ల‌ సినిమాలను పూర్తిగా భుజాన వేసుకుని ముందుకు తీసుకెళ్లే స్థాయికి వారు ఇంకా చేరలేదనే అభిప్రాయం ఉంది. ఈ డెప్త్ వ‌ల్లే రెండు పరిశ్రమల మధ్య బాగా తేడా క‌నిపిస్తోంది.

వైరల్ సాంగ్ – సోషల్ మీడియా ఇంపాక్ట్

రీసెంట్ గా రిలీజైన ఆయా షేర్ సాంగ్ సోషల్ మీడియాలో భారీ స్థాయిలో ట్రెండ్ అవుతోంది. ది ప్యార‌డైజ్ సినిమా కోసం రూపొందిన ఈ సాంగ్ ద్వారా అనిరుధ్ మళ్లీ తన మాస్ అప్పీల్‌ను చాటుకున్నారు. సాంగ్ రిలీజైన కొన్ని గంటల్లోనే ఈ పాట రీల్స్, షార్ట్ వీడియోల రూపంలో వైరల్ కావడం గమనార్హం. తమిళ మ్యూజిక్ మార్కెట్, డిజిటల్ ప్లాట్‌ఫార్మ్స్‌ను ఎంత సమర్థంగా వినియోగించుకుంటుందో ఇది సూచిస్తోంది. సోషల్ మీడియా ట్రెండింగ్ ఇప్పుడు సినిమా హైప్‌ను నిర్ణయించే కీలక అంశంగా మారింది. తమిళ సంగీత దర్శకులు ఈ నూతన ట్రెండ్‌ను త్వరగా అర్థం చేసుకుని, యూత్‌ను ఆకట్టుకునే బీట్స్, క్యాచీ లిరిక్స్‌తో ముందుకు వస్తున్నారు. దీని వల్ల పాటలు ప్రాంతీయ సరిహద్దులను దాటి పాన్-ఇండియా స్థాయిలో చర్చకు వస్తున్నాయి.

ఇండస్ట్రీ కల్చర్ & రిస్క్ టేకింగ్

అంతేకాదు, కోలీవుడ్ లో సంగీత విషయంలో ఎక్స్‌పెరిమెంట్స్‌కు పెద్దపీట వేయడం గమనించదగ్గ విషయం. ఎప్ప‌టిక‌ప్పుడు కొత్త సౌండ్ డిజైన్, ఫ్యూజన్ శైలులు, జానర్ మిక్సింగ్ లాంటి అంశాల్లో అక్కడి మేకర్స్ రిస్క్ తీసుకోవడానికి వెనుకాడరు. యంగ్ డైరెక్ట‌ర్ల‌కు, కొత్త సంగీత దర్శకులకు అవకాశాలిస్తూ సృజనాత్మక స్వేచ్ఛను ప్రోత్సహిస్తున్నారు. కానీ టాలీవుడ్ లో మాత్రం సేఫ్ జోన్ ధోరణి ఎక్కువగా కనిపిస్తోంది. పెద్ద సినిమాలకు ఆల్రెడీ పేరున్న మ్యూజిక్ డైరెక్ట‌ర్ల‌కే అవకాశాలివ్వడం, ప్రయోగాలకు తక్కువ ప్రాధాన్యం ఇవ్వడం వల్ల మ్యూజిక్ లో వైవిధ్యం కొంత తగ్గిందనే విమర్శలు ఉన్నాయి. మొత్త‌మ్మీద మ్యూజిక్ డైరెక్టర్ల డెప్త్, సోషల్ మీడియా ప్రభావాన్ని సమర్థంగా వినియోగించడం, రిస్క్ తీసుకునే ఇండస్ట్రీ కల్చర్ వంటి అంశాల్లో ప్రస్తుతం తమిళ సినిమా ముందంజలో ఉందని విశ్లేషకులు అభిప్రాయపడుతున్నారు. తెలుగు పరిశ్రమ కూడా కొత్త ప్రతిభను ప్రోత్సహిస్తూ సంగీత వైవిధ్యాన్ని పెంచితే ఈ తేడాను తగ్గించే అవకాశం ఉంది.