ఫ్లాప్ అయినా స్పెషల్ బొమ్మ.. రాజమౌళి గెస్ట్ రోల్ చేసిన ఆ సినిమా విశేషాలేంటో తెలుసా?

భారతీయ చలనచిత్ర రంగాన్ని ప్రపంచ స్థాయికి తీసుకెళ్లిన దర్శకుడు ఎస్.ఎస్. రాజమౌళి. ఆయన పేరు వింటేనే బాక్సాఫీస్ రికార్డులు ప్రకంపిస్తాయి. 'ఈగ'తో అద్భుతం సృష్టించి, 'బాహుబలి'తో చరిత్ర రాసి, నిన్నటి 'RRR'తో ఆస్కార్ వేదికపై తెలుగు జెండాను ఎగురవేసిన జక్కన్న.. రేపు మహేష్ బాబుతో రాబోయే 'SSMB29' (వారణాసి నేపథ్యంలో సాగే అడ్వెంచర్) సినిమాతో గ్లోబల్ మార్కెట్‌ను శాసించబోతున్నారు. అయితే, అపజయమే ఎరుగని ఈ ధీరుడు వెండితెరపై నటుడిగా కనిపించిన ఒక అరుదైన సినిమా ఉందన్న విషయం చాలామందికి తెలియదు. ఆ సినిమా గురించి ఇప్పుడు చూద్దాం..

ఇద్దరు దిగ్గజాల అరుదైన కలయిక:

దర్శకుడు వి.ఎన్. ఆదిత్య తెరకెక్కించిన ‘రెయిన్‌బో’ (2008) చిత్రం బాక్సాఫీస్ వద్ద ఆశించిన విజయం సాధించలేకపోయినా, ఈ సినిమా ఇప్పుడు ఒక స్పెషల్ మెమరీగా నిలిచిపోయింది. దీనికి కారణం మన గ్లోబల్ డైరెక్టర్ రాజమౌళి, అద్భుతాల దర్శకుడు దివంగత కోడి రామకృష్ణ. ఇందులో అతిథి పాత్రల్లో మెరవడమే. సాధారణంగా రాజమౌళి తన సినిమాల్లో చిన్న చిన్న క్యామియో రోల్స్ (ఉదాహరణకు బాహుబలిలో మద్యం అమ్మే వ్యక్తిగా, RRRలో ఎండ్ టైటిల్ సాంగ్‌లో) లో కనిపిస్తుంటారు. కానీ, వేరే దర్శకుడి సినిమాలో ఆయన ఇలా కనిపించడం నిజంగా విశేషం. ఈ చిత్రంలో వారు దర్శకులుగానే నటించడం మరో విశేషం.

అపజయం ఎరుగని ప్రయాణం:

రాజమౌళి గొప్పతనం ఏమిటంటే, ఆయన తీసిన ప్రతి సినిమా ఒక పాఠం. ఒక సాదాసీదా ఈగను హీరోగా పెట్టి సినిమా తీసినా, అల్లూరి సీతారామరాజు - కొమరం భీమ్ వంటి వీరులను కలిపి 'RRR' వంటి విజువల్ వండర్ సృష్టించినా అది ఆయనకే సాధ్యం. నిన్నటి వరకు లోకల్ హీరోగా ఉన్న తెలుగు సినిమాను నేడు ఇంటర్నేషనల్ బ్రాండ్‌గా మార్చిన ఘనత ఆయనది. అలాంటి లెజెండరీ డైరెక్టర్ కెరీర్ తొలినాళ్లలో ‘రెయిన్‌బో’ సినిమాలో ఒక చిన్న పాత్రలో నటించి అలరించారు. ఆ సినిమా ప్లాప్ అయినప్పటికీ, రాజమౌళి, కోడి రామకృష్ణ వంటి ఇద్దరు లెజెండ్స్ ఒకే ఫ్రేమ్‌లో కనిపించిన దృశ్యాలు ఇప్పుడు సోషల్ మీడియాలో నెటిజన్లను ఆశ్చర్యానికి గురిచేస్తున్నాయి.

స్టార్ డైరెక్టర్‌గా ఎదగకముందు రాజమౌళి చేసిన ఇలాంటి చిన్న ప్రయత్నాలు ఆయన సినీ ప్రయాణంలో ఒక భాగం. ‘రెయిన్‌బో’ సినిమా ఫలితం ఎలా ఉన్నా, జక్కన్న అభిమానులకు మాత్రం అది ఒక స్పెషల్ బొమ్మే. ప్రస్తుతం ఆయన మహేష్ బాబుతో తీయబోయే భారీ ప్రాజెక్ట్ కోసం ప్రపంచవ్యాప్తంగా సినీ ప్రేమికులు వెయ్యి కళ్లతో ఎదురుచూస్తున్నారు. రికార్డులు తిరగరాయడం రాజమౌళికి అలవాటే కాబట్టి, రాబోయే సినిమాతో ఆయన మరిన్ని అద్భుతాలు సృష్టించాలని సినీ లవర్స్ కోరుకుంటున్నారు.