మూవీ ప్రమోషన్స్.. సోషల్ మీడియా మార్చిందేంటి?

సినిమా ప్రమోషన్ అంటే ఒకప్పుడు పోస్టర్లు, పాటలు, టీజర్, ట్రైలర్.. ఆ తర్వాత ప్రీ రిలీజ్ ఈవెంట్. కానీ ఇప్పుడు పరిస్థితి మారింది. సినిమా నుంచి అసలు కంటెంట్ బయటకు రాకముందే నెట్టింట చర్చ మొదలవుతోంది. హీరో లుక్ నుంచి షూటింగ్ స్పాట్ ఫొటోల వరకు ఏ చిన్న అప్డేట్ అయినా వెంటనే వైరల్ అవుతోంది. దీంతో సినిమా ప్రమోషన్‌ లో సోషల్ మీడియా మెయిన్ గా మారింది.

పెద్ద సినిమా ప్రకటించిన వెంటనే అభిమానుల్లో హైప్ మొదలవుతోంది. టైటిల్, హీరో లుక్, దర్శకుడి పేరు, మ్యూజిక్ డైరెక్టర్ వంటి వివరాలపై సోషల్ మీడియాలో చర్చ జరుగుతోంది. అఫీషియల్ గా పెద్దగా కంటెంట్ ఇవ్వకపోయినా ఫ్యాన్స్ పోస్టులు, ఎడిట్స్, ఫ్యాన్ మేడ్ పోస్టర్లతో సినిమాను ట్రెండింగ్ లోకి తీసుకొస్తున్నారు. ముఖ్యంగా స్టార్ హీరోల సినిమాలకు ఆ హడావుడి ఎక్కువగా కనిపిస్తోంది.

సినిమా నుంచి అఫీషియల్ పోస్టర్ వచ్చేలోపే అభిమానులు తమకు నచ్చిన డిజైన్లతో పోస్టర్లు తయారు చేస్తున్నారు. దీంతో మూవీ టీమ్ రిలీజ్ చేసే ప్రతి అప్డేట్‌ కు మరింత రెస్పాన్స్ వస్తోంది. గతంలో షూటింగ్ సమయంలో బయటకు వచ్చే ఫొటోలు తక్కువే. ఇప్పుడు పరిస్థితి అలా లేదు. సినిమా ఏ లొకేషన్‌ లో షూట్ చేస్తున్నారు, హీరో ఎలాంటి లుక్‌ లో కనిపించబోతున్నారు, సెట్స్ ఎలా ఉన్నాయనే విషయాలు హాట్ టాపిక్ గా మారుతున్నాయి.

కొన్నిసార్లు యూనిట్ మెంబర్స్ లేదా అభిమానులు షేర్ చేసే చిన్న వీడియోలు కూడా వైరల్ అవుతున్నాయి. అధికారిక కంటెంట్ రాకముందే సినిమా ఎలా ఉండొచ్చనే ఆసక్తిని ఇవి పెంచుతున్నాయి. సోషల్ మీడియా వల్ల ప్రచారం పెరుగుతున్నట్టే కొన్ని ఇబ్బందులు కూడా ఉన్నాయి. షూటింగ్ ఫొటోలు, వీడియోలు బయటకు రావడం మూవీ టీమ్స్ కు సమస్యగా మారుతోంది.

ముఖ్యమైన సీన్స్ లేదా లుక్స్ ముందే బయటపడితే సినిమాకు సంబంధించిన సస్పెన్స్ తగ్గే అవకాశం ఉంటుంది. అందుకే షూటింగ్ ప్రాంతాల్లో సేఫ్టీపై టీమ్స్ ప్రత్యేకంగా దృష్టి పెడుతున్నాయి. ఇప్పుడు సినిమా ప్రమోషన్ ఒక టీజర్ లేదా ట్రైలర్‌ తో మాత్రమే పరిమితం కావడం లేదు. సినిమా అనౌన్స్మెంట్ నుంచి రిలీజ్ వరకు వచ్చే ప్రతి చిన్న అప్డేట్ ప్రమోషన్స్ లో భాగమవుతోంది. ఫస్ట్ లుక్, గ్లింప్స్, పాట, మేకింగ్ వీడియో, హీరో బర్త్‌ డే పోస్టర్.. ఇలా ప్రతి కంటెంట్‌ కు నెట్టింట ప్రత్యేక స్థానం దక్కుతోంది.

దీంతో మూవీ టీమ్స్ కూడా ప్రమోషన్‌ను ముందుగానే ప్లాన్ చేస్తున్నాయి. ఏ కంటెంట్‌ ను ఎప్పుడు విడుదల చేయాలి, అభిమానులను ఎలా ఎంగేజ్ చేయాలనే దానిపై దృష్టి పెడుతున్నాయి. అలా ఇప్పుడు సినిమా ప్రమోషన్ థియేటర్లలో మొదలవడం లేదు. సినిమా అనౌన్స్ అయిన రోజే సోషల్ మీడియాలో మొదలవుతోంది. టీజర్ విడుదలయ్యే సమయానికి ప్రేక్షకుల్లో ఆ సినిమాపై ఓ రేంజ్ లో ఇంట్రెస్ట్ ఇప్పటికే పెరుగుతోంది. ఇదే సోషల్ మీడియా టాలీవుడ్ సినిమా ప్రమోషన్స్ లో తీసుకొచ్చిన బిగ్ ఛేంజ్.