సాయి పల్లవి పైనే అందరి చూపు… ‘ఒక రోజు’ మూవీ రిజల్ట్ ఎలా వుండబోతుంది?

సౌత్ సినిమాల్లో తనకంటూ ఒక ప్రత్యేక ముద్ర వేసుకున్న నేచురల్ బ్యూటీ సాయి పల్లవి, ఇప్పుడు బాలీవుడ్ ఎంట్రీకి సిద్ధమైంది. అమీర్ ఖాన్ కుమారుడు జునైద్ ఖాన్‌తో కలిసి ఆమె నటించిన 'ఏక్ దిన్' (తెలుగులో 'ఒక రోజు') మే 1న విడుదల కాబోతోంది. అయితే, సినిమా రిలీజ్ దగ్గరపడుతున్నా కనీస స్థాయి బజ్ కూడా లేకపోవడం ఇప్పుడు ఇండస్ట్రీలో హాట్ టాపిక్ అయింది. సాయి పల్లవి క్రేజ్ ఈ సినిమాను గట్టెక్కిస్తుందా లేక షాక్ ఇస్తుందా అనేది ఆసక్తికరంగా మారింది. ఆ వివరాలు చూద్దాం..

అంచనాలు లేవు.. బుకింగ్స్‌లో నీరసం:

సాధారణంగా సాయి పల్లవి సినిమా అంటే ప్రేక్షకుల్లో మంచి అంచనాలు ఉంటాయి. కానీ, ఆమె తొలి హిందీ సినిమా ‘ఒక రోజు’ విషయంలో పరిస్థితి అందుకు భిన్నంగా ఉంది. సినిమా విడుదలకు నెల రోజుల ముందే బుకింగ్స్ ఓపెన్ చేసినా, బుక్ మై షోలో కేవలం 9 వేల ఇంటరెస్టులు మాత్రమే నమోదు కావడం ట్రేడ్ వర్గాలను విస్మయానికి గురిచేస్తోంది. ఇక ట్రైలర్ విడుదలైనప్పటి నుంచే సోషల్ మీడియాలో ట్రోలింగ్ మొదలైంది. ఇలాంటి బలహీనమైన కథలతో ఎక్కువ డబ్బుని వృథా చేస్తున్నారంటూ నెటిజన్లు పెదవి విరుస్తున్నారు.

ఒక్క రోజు ప్రేమకథ.. అసలు విషయం ఇదీ:

ఈ సినిమా కథ విషయానికి వస్తే.. హీరో రోహన్, హీరోయిన్ మీరాని తొలి చూపులోనే ప్రాణంగా ప్రేమిస్తాడు. కానీ మీరాకు ఆ ఫీలింగ్ ఉండదు. తన ప్రేమను ఎలా చెప్పాలో తెలియక రోహన్ కుమిలిపోతుంటాడు. అయితే, ఒక ప్రమాదం వల్ల మీరా తన గతాన్ని 24 గంటల పాటు మర్చిపోతుంది. ఆ ఒక్క రోజు ఆమెతో గడిపి, తన ప్రేమను గెలిపించుకోవాలని హీరో చేసే ప్రయత్నమే ఈ ‘ఒక రోజు’. పాయింట్ వినడానికి కాస్త కొత్తగా ఉన్నా, మేకింగ్ పరంగా ట్రైలర్ ప్రేక్షకులను అంతగా ఆకట్టుకోలేకపోయింది.

అమీర్ ఖాన్ వారసుడికి తప్పని కష్టాలు:

బాలీవుడ్ మిస్టర్ పర్ఫెక్ట్ అమీర్ ఖాన్ తన కొడుకు జునైద్ ఖాన్‌ను హీరోగా నిలబెట్టేందుకు తీవ్రంగా ప్రయత్నిస్తున్నారు. జునైద్ చేసిన ఓటిటీ డెబ్యూ ఆశించిన ఫలితాన్ని ఇవ్వలేదు. ఇక 'లవ్ టుడే' రీమేక్ ప్రయత్నాలు కూడా బెడిసికొట్టాయి. ఇక ఇప్పుడు ఈ ‘ఒక రోజు’ సినిమాపైనే జునైద్ ఆశలన్నీ ఉన్నాయి. సాయి పల్లవి లాంటి స్టార్ హీరోయిన్ తోడైతే తన కొడుకు సెటిల్ అయిపోతాడని అమీర్ భావించారు. కానీ, ప్రమోషన్లు కూడా అంతంత మాత్రంగానే జరుగుతుండటంతో అమీర్ ఖాన్ వారసుడికి మరో ఎదురుదెబ్బ తగులుతుందేమోనన్న అనుమానాలు సినీ వర్గాలలో వ్యక్తమవుతున్నాయి.

సాయి పల్లవికి స్వీట్ సర్ప్రైజ్ దక్కుతుందా:

ఇక సాయి పల్లవి ప్రస్తుతం అత్యంత ప్రతిష్టాత్మకమైన ‘రామాయణ’ సినిమాలో నటిస్తూ పాన్ ఇండియా స్థాయిలో ఎదుగుతోంది. ఇలాంటి సమయంలో ఆమె నుంచి వస్తున్న తొలి బాలీవుడ్ మూవీ ఫలితం ఆమె కెరీర్‌పై ప్రభావం చూపే అవకాశం ఉంది. సినిమా విడుదల కావడానికి ఇంకా ఐదు రోజులు మాత్రమే సమయం ఉంది. ఇక సరైన ప్రమోషన్లు లేకపోవడం, కథపై విమర్శలు రావడం ఈ సినిమాకు పెద్ద మైనస్. మరి థియేటర్లలో సాయి పల్లవి తన నటనతో ఏదైనా మ్యాజిక్ చేసి సినిమాను గట్టెక్కిస్తుందో లేదో చూడాలి.

సినిమా అంటే కేవలం భారీ బడ్జెట్ మాత్రమే కాదు, ప్రేక్షకులను కట్టిపడేసే కథ ఉండాలి. సాయి పల్లవి మీద ఉన్న నమ్మకంతో థియేటర్లకు వచ్చే ఆడియన్స్‌ను ఈ ‘ఒక రోజు’ ఎంతవరకు మెప్పిస్తుందనేది ప్రశ్నార్థకమే. జునైద్ ఖాన్ అదృష్టాన్ని ఈ సినిమా మారుస్తుందో లేదో తెలియాలంటే మే 1 వరకు వేచి చూడాల్సిందే. సాయి పల్లవి ఫ్యాన్స్ మాత్రం ఆమె బాలీవుడ్ ఎంట్రీ ఘనంగా ఉండాలని కోరుకుంటున్నారు!