సోషల్ మీడియా దాడులతో రీల్ తొలగించిన RJ ప్రిన్సీ పారిఖ్

ఒక చిన్న సరదా రీల్.. కొన్ని సెకన్ల వినోదం. కానీ అదే వీడియో ఆర్జే ప్రిన్సీ పారిఖ్ జీవితాన్ని ఒక్కసారిగా ఊపేసింది. క్రీడా స్ఫూర్తిని, అభిమానాన్ని పంచుకోవాలనుకున్న ఆమె నిర్ణయం, సోషల్ మీడియాలోని విద్వేషపు కోరల్లో చిక్కుకుంది. కేవలం ఒక క్రికెట్ మ్యాచ్‌కు సంబంధించిన రీల్, అత్యాచార బెదిరింపులు మరియు బాడీ షేమింగ్ వరకు ఎలా దారితీసింది? మన డిజిటల్ ప్రపంచంలో మనం ఎంత సురక్షితంగా ఉన్నాం? అనే ప్రశ్నలను ఈ ఘటన మరోసారి తెరపైకి తెచ్చింది.

రీల్ నుంచి కన్నీటి దాకా: సైబర్ వేధింపుల చీకటి కోణం:

అహ్మదాబాద్ నరేంద్ర మోదీ స్టేడియం.. టీ20 వరల్డ్ కప్ మ్యాచ్. మైదానంలో ఉత్కంఠ, గ్యాలరీలో వేల సంఖ్యలో అభిమానుల సందడి. దక్షిణాఫ్రికా జట్టు భారత్ పై గెలిచిన ఆ క్షణంలో, ఆర్జే ప్రిన్సీ పారిఖ్ ఒక చిన్న రీల్ చేశారు. దక్షిణాఫ్రికా స్టార్ డేవిడ్ మిల్లర్ చుట్టూ తిరుగుతూ, “Waah Shampy Waah” అనే ఆడియోతో సరదాగా ఆమె చేసిన ఆ వీడియో క్షణాల్లోనే వైరల్ అయ్యింది. కానీ ఆ వైరల్ వెనుక ఆమె ఊహించని నరకం మొదలైంది.

ఎందుకు ఈ విద్వేషం? :మ్యాచ్‌లో భారత్ ఓడిపోయిందన్న బాధ, అభిమానుల భావోద్వేగాలను రెచ్చగొట్టింది. నెటిజన్లు దాన్ని క్రీడా స్ఫూర్తితో చూడాల్సింది పోయి, ఆమె వ్యక్తిత్వంపై దాడికి దిగారు. బాడీ షేమింగ్, అసభ్యకరమైన పదజాలం, కేవలం ఒక వీడియో చేసిందని, ఒక మహిళపై ఇన్ని దాడులు చేయాలా? ఇది విమర్శనా లేక సైబర్ దాడినా? ఒక డిజిటల్ కంటెంట్ క్రియేటర్‌గా ఆమెకు ఉన్న 'ఆ వ్యక్తి స్వేచ్ఛ' ఎక్కడ దెబ్బతిన్నది?

అదృశ్యం కావాలనుకునేంతలా:

“అత్యంత అసహ్యకరమైన బెదిరింపులు తట్టుకోలేక వీడియో తొలగించాను, ఇప్పుడు ప్రపంచానికి దూరంగా ఎక్కడికైనా వెళ్లిపోవాలనిపిస్తుంది” అంటూ ఆమె పెట్టిన పోస్ట్, సోషల్ మీడియాలో మహిళలు ఎదుర్కొంటున్న మానసిక వేదనకు అద్దం పడుతోంది. ఎంతో మంది నెటిజన్లు ఆమెకు అండగా నిలిచినప్పటికీ, ఆ క్షణాన ఆమె అనుభవించిన మానసిక వ్యధను ఎవరూ తీర్చలేరు.

నిజమైన 'క్రింజ్' ఏది? నిజానికి 'క్రింజ్' (Cringe) అనేది ఆ వీడియోలో లేదు, ఆ వీడియోను చూసి అసభ్యకరంగా స్పందించిన వారి ఆలోచనల్లో ఉంది. సోషల్ మీడియాలో విమర్శించడం వేరు, ఒకరి ప్రాణాలను, గౌరవాన్ని పణంగా పెట్టి బెదిరించడం వేరు. మనం గెలిచినప్పుడు గర్వపడతాం, ఓడినప్పుడు బాధపడతాం. కానీ ఆ బాధను పక్కన వారిని అవమానించే ఆయుధంగా మార్చుకోవడం ఎంతవరకు సమంజసం?

ఈ ఘటన మనకు ఒక హెచ్చరిక. స్మార్ట్‌ఫోన్ చేతిలో ఉందని, మనకు నచ్చని వారిని ఏమైనా అనే హక్కు మనకు లేదు. ఇంటర్నెట్ అంటే మన వ్యక్తిత్వాన్ని ప్రదర్శించే వేదిక కావాలి, కానీ పక్కన వారిని బలితీసుకునే కత్తుల అడ్డా కాకూడదు అని నేటిజన్స్ అభిప్రాయపడుతున్నారు.