రామ్ చ‌ర‌ణ్ బాడీ గార్డ్ కి రోజుకి నాలుగు ల‌క్ష‌లా!

భారతీయ చలనచిత్ర పరిశ్రమ గ్లోబల్ స్థాయికి చేరుకోవడంతో మ‌న స్టార్ హీరోల పాపులారిటీ క్రేజ్ ఊహించని రీతిలో పెరిగిపోయింది. వారు ఎక్కడికి వెళ్లినా వేలాది మంది అభిమానులు చుట్టుముట్టడ స‌ర్వ‌సాధారణంగా మారింది. ప్రస్తుతం మెగా పవర్ స్టార్ రామ్ చరణ్ `పెద్ది` ప్రమోషన్స్ కార్యక్రమాలలో బిజీగా ఉన్న సంగ‌తి తెలిసిందే. ప్ర‌మోష‌న్ పర్యటనలలో చ‌ర‌ణ్ భద్రత కోసం భారీ ఏర్పాట్లు చేయడం పరిశ్రమ వర్గాలలో హాట్ టాపిక్‌గా మారింది. 'పెద్ది' సినిమా ప్రమోషన్స్ వేదికల వద్ద రామ్ చరణ్ పక్కన ఎప్పుడూ ఓ ప్రత్యేకమైన బాడీ గార్డ్ అందరి దృష్టిని ఆకర్షిస్తున్నాడు.

అతనే చరణ్ వ్యక్తిగత బాడీగార్డ్ కెవిన్ కుంటా. చరణ్‌కు రక్షణ వలయంగా నిలుస్తూ అత్యంత ఇంటెన్స్ లుక్‌తో కనిపించే కెవిన్ సోషల్ మీడియాలో కూడా వైరల్ అవుతున్నాడు. ఒక బాడీగార్డ్‌లా కాకుండా అతని పర్సనాలిటీ, హుందాతనం చూసి అభిమానులు సైతం ఆశ్చర్యపోతున్నారు. నిజానికి కెవిన్ కుంటా సాధారణ సెక్యూరిటీ గార్డ్ మాత్రమే కాదు. అతను ఒక ప్రొఫెషనల్ మిక్స్‌డ్ మార్షల్ ఆర్ట్స్ ఫైటర్. శారీరక దృఢత్వంతో పాటు క్లిష్టమైన పరిస్థితులను చాకచక్యంగా ఎదుర్కొనే నైపుణ్యం అతనికి ఉంది. నేటి కాలంలో స్టార్ హీరోలు సాంప్రదాయ సెక్యూరిటీ ఏజెన్సీలపై కాకుండా ఇలాంటి అంతర్జాతీయ స్థాయి ఎలైట్ కాంబాట్ నిపుణులను రక్షణ కోసం ఎంచుకోవడానికి మొగ్గు చూపుతున్నారు.

ఈ హై-ప్రొఫైల్ సెక్యూరిటీ వెనుక ఉండే ఆర్థిక సమీకరణాలు అందరినీ నోరెళ్లబెట్టేలా చేస్తున్నాయి. రామ్ చరణ్ రక్షణ బాధ్యతలు చూస్తున్నందుకు గాను కెవిన్ కుంటాకు రోజుకు 2 లక్షల నుండి 4 లక్షల వరకు చెల్లిస్తున్నట్లు సమాచారం. ఒక బాడీగార్డ్‌కు రోజువారీ వేతనంగా ఇంత భారీ మొత్తాన్ని కేటాయించడం అనేది గ్లోబల్ స్టార్స్ రేంజ్ .. వారి బ్రాండ్ వ్యాల్యూ ఏ స్థాయిలో ఉందో తెలియజేస్తోంది. పాన్-ఇండియా చిత్రాల హవా పెరిగిన తర్వాత, సౌత్ సినిమాల మార్కెట్ పరిధి కూడా హాలీవుడ్ స్థాయికి విస్తరించింది. అందుకు తగ్గట్టుగానే హీరోల జీవనశైలి, ప్రమోషన్ల వ్యూహాలు ,రక్షణ ప్రమాణాలు కూడా అంతర్జాతీయ స్థాయికి అప్‌గ్రేడ్ అవుతున్నాయి.

రామ్ చరణ్ లాంటి గ్లోబల్ ఐకాన్ భద్రత విషయంలో చిత్రనిర్మాతలు ..పర్సనల్ మేనేజ్‌మెంట్ ఎలాంటి రాజీ పడకూడదనే ఉద్దేశంతోనే ఈ స్థాయి ఏర్పాట్లు చేస్తున్నట్లు తెలుస్తోంది. ఒక సూపర్ స్టార్ ఇమేజ్ వెనుక ఉండే లాజిస్టిక్స్ ఖర్చులు సామాన్యుల ఊహకు అందవు. `పెద్ది` చిత్రం బాక్సాఫీస్ వద్ద ఎలాంటి రికార్డులను సృష్టించబోతుందో కానీ ప్రమోషన్స్ దశలోనే ఇలాంటి ఆసక్తికరమైన విషయాలతో నిరంతరం వార్తల్లో నిలుస్తోంది. బాడీగార్డ్ కెవిన్ కుంటా వ్యవహారం చూశాక స్టార్డమ్ అనేది కేవలం కీర్తి ప్రతిష్టలతోనే కాదు. అంతే స్థాయి భారీ బాధ్యతలతో కూడుకున్నదని అర్థమవుతోంది.