పాన్ ఇండియాలో గొడ‌వ‌లొస్తే ప‌రిష్కారం ఎలా?

ప్రస్తుతం భారతీయ సినిమా మార్కెట్ సరిహద్దులు చెరిగిపోయాయి. ఒక భాషలో విజయం సాధించిన చిత్రం మరో భాషలోకి అనువాదమవ్వడం (డబ్బింగ్) లేదా రీమేక్ కావడం సర్వసాధారణమైపోయింది. అయితే ఈ ప్రక్రియలో అనేక సంక్లిష్టతలు తలెత్తుతున్నాయి. స‌రికొత్త స‌మ‌స్య‌లు పుట్టుకొస్తున్నాయి. కొన్ని వివాదాలుగా మారుతున్నాయి. ముఖ్యంగా సెన్సార్ షిప్ (సీబీఎఫ్‌సి), సినిమాల విడుదల, ప్రదర్శన విషయంలో దక్షిణాది చిత్రాలకు ఉత్తరాదిలో తరచుగా అనేక చిక్కులు ఎదురవుతున్నాయి. ఇటువంటి జాతీయ స్థాయి సమస్యలను పరిష్కరించడానికి ఒక శక్తివంతమైన వేదిక ఉందనే విషయం మన ప్రాంతీయ నిర్మాతలకు చాలా తక్కువగా తెలుసు. అందిరికీ గాడ్ `ప్రొడ్యూసర్స్ గిల్డ్ ఆఫ్ ఇండియా` (PGI) అందుబాటులో ఉన్న విష‌యం చాలా మందికి తెలీదు.

టాలీవుడ్ లేదా కోలీవుడ్.. ఇత‌ర భాష‌ల‌ నిర్మాతలకు జాతీయ స్థాయిలో ఏదైనా సమస్య ఎదురైతే వారి పక్షాన నిలబడేందుకు ఈ సంస్థ అండగా ఉంటుంది. కేవలం బాలీవుడ్‌కే పరిమితం కాకుండా.. దేశవ్యాప్తంగా చలనచిత్ర, టెలివిజన్ , డిజిటల్ కంటెంట్ తయారీదారుల కోసం పనిచేసే ఒక స్వయంప్రతిపత్తి కలిగిన అత్యున్నత సంస్థ ఇది. ప్రాంతీయ భాషా చిత్రాల రీమేక్ హక్కుల విషయంలో గానీ, డబ్బింగ్ వర్షన్ల పంపిణీలో గానీ వివాదాలు తలెత్తినప్పుడు స్థానిక నిర్మాతలు ఈ సంస్థను ఆశ్రయించి సత్వర పరిష్కారాన్ని పొందవచ్చు.

సాధారణంగా టాలీవుడ్ లో అయితే, ప్రాంతీయ సమస్యలను స్థానిక సంస్థలైన తెలుగు ఫిలిం ప్రొడ్యూసర్స్ కౌన్సిల్ (TFPC) వంటివి చూసుకుంటాయి. కానీ సమస్య రెండు వేర్వేరు భాషా పరిశ్రమల మధ్య ఉన్నప్పుడు (ఉదాహరణకు ఒక టాలీవుడ్ నిర్మాతకు, బాలీవుడ్ డిస్ట్రిబ్యూటర్ లేదా నటుడికి మధ్య గొడవ) స్థానిక సంస్థల పరిధి పరిమితంగా ఉంటుంది. అటువంటి సమయంలో పీజీఐ ఒక సమర్థవంతమైన మధ్యవర్తిగా వ్యవహరించి న్యాయం చేస్తుంది. పీజీఐలో సభ్యత్వం ఉంటే అంతర్గత- బాహ్య వాణిజ్య వివాదాలను జాతీయ స్థాయి ఒత్తిడితో పరిష్కరించడం సులువవుతుంది.

రీమేక్, డబ్బింగ్ హక్కుల రక్షణలో పీజీఐ పాత్ర అత్యంత కీలకం. ఒక ప్రాంతీయ సినిమా కథను అనుమతి లేకుండా ఇతర భాషల్లో వాడుకున్నప్పుడు లేదా కాపీరైట్ ఉల్లంఘనలు జరిగినప్పుడు పీజీఐ చాలా కఠినంగా వ్యవహరిస్తుంది. బాధితుడైన నిర్మాత ఫిర్యాదు చేస్తే, నిందితుడైన నిర్మాతపై ఒత్తిడి తీసుకురావడమే కాకుండా, సెన్సార్ బోర్డు (సీబీఎఫ్‌సి) వద్ద ఆ సినిమా క్లియరెన్స్‌ను ఆపేలా సిఫార్సు చేసే అధికారం ఈ సంస్థకు ఉంది. అలాగే వేర్వేరు భాషల్లో ఒకే టైటిల్ విషయంలో వచ్చే వివాదాలను కూడా ఇది క్రమబద్ధీకరిస్తుంది.

కేవలం వివాదాలే కాకుండా.. ప్రభుత్వ పరమైన ప్రయోజనాలను పొందడంలో కూడా పీజీఐ కీలక పాత్ర పోషిస్తుంది. జీఎస్టీ (జీఎస్టీ) వంటి పన్నుల విషయంలో, సినిమా సబ్సిడీలు లేదా పైరసీ వంటి సమస్యలపై కేంద్ర ప్రభుత్వంతో చర్చలు జరిపేటప్పుడు పీజీఐ అన్ని భాషల నిర్మాతల ఉమ్మడి గొంతుకగా నిలుస్తుంది. ప్రాంతీయ సినిమాలు విదేశాల్లో విడుదలయ్యేటప్పుడు ఎదురయ్యే ఇబ్బందులు లేదా ఫారిన్ షూటింగ్ పర్మిషన్ల విషయంలో పీజీఐ తన నెట్‌వర్క్ ద్వారా అపారమైన సహాయాన్ని అందిస్తుంది.

టాలీవుడ్‌లో యాక్టివ్ తెలుగు ఫిల్మ్ ప్రొడ్యూసర్స్ గిల్డ్ ఉన్నా కానీ.. అది టాలీవుడ్ వ‌ర‌కే పరిమితం. కానీ పీజీఐ అనేది `పాన్ ఇండియా` స్థాయి సంస్థ. ఒక స్టార్ హీరోకి, నిర్మాతకి మధ్య గొడవ జరిగినా లేదా ఓటీటీ (OTT) ఒప్పందాల్లో చిన్న నిర్మాతలు మోసపోకుండా ఉండాలన్నా పీజీఐ మార్గదర్శకాలు ఎంతో మేలు చేస్తాయి. అందుకే నేషనల్ లెవల్‌లో తమ సినిమాను ప్రమోట్ చేయాలనుకునే లేదా ఇతర భాషల్లో వ్యాపారం చేయాలనుకునే ప్రతి ప్రాంతీయ నిర్మాతకు ఈ సంస్థలో సభ్యత్వం ఉండటం ఒక రక్షణ కవచం లాంటిది.