పెద్ది.. థియేటర్ల గొడవపై నిర్మాత ఏమన్నారంటే?

టాలీవుడ్‌లో ఇప్పుడు ‘పెద్ది’ రిలీజ్ డేట్ గురించే చర్చ నడుస్తోంది. జూన్ 4న రామ్ చరణ్ థియేటర్లలోకి వస్తున్నాడని క్లారిటీ రావడంతో అంతా ఖుషీగా ఉన్నారు. అయితే గత కొన్ని రోజులుగా తెలంగాణలో ఎగ్జిబిటర్లకు, డిస్ట్రిబ్యూటర్లకు మధ్య జరుగుతున్న వివాదం ఈ పెద్ద సినిమాపై ఎలాంటి ప్రభావం చూపుతుందోనన్న అనుమానాలు అందరిలోనూ ఉన్నాయి. తాజాగా జరిగిన ‘జెట్ లీ’ సక్సెస్ మీట్‌లో నిర్మాత చెర్రీ ఈ అంశంపై స్పందిస్తూ ఇండస్ట్రీలో నెలకొన్న ప్రస్తుత పరిస్థితులపై ఓపెన్ అయ్యారు.

ప్రస్తుతం రెంటల్ సిస్టమ్ వద్దు, పర్సంటేజ్ విధానం కావాలని ఎగ్జిబిటర్లు పట్టుబడుతున్న మాట వాస్తవమేనని చెర్రీ పేర్కొన్నారు. “ఈ సమస్య కేవలం ఒక్కరిది కాదు, మొత్తం ఇండస్ట్రీకి సంబంధించింది” అని ఆయన అభిప్రాయపడ్డారు. సింగిల్ స్క్రీన్ యజమానులు తమ ఇబ్బందులు చెబుతుంటే, నిర్మాతలు తమ వెర్షన్ వినిపిస్తున్నారని, దీనివల్ల ఒక రకమైన పరిస్థితి ఏర్పడిందని ఆయన వివరించారు. ముఖ్యంగా ‘పెద్ది’ వంటి భారీ చిత్రాలకు ఎక్కువ థియేటర్లు అవసరం కాబట్టి, ఈ సమస్య పరిష్కారం కావడం ఇప్పుడు చాలా కీలకంగా మారింది.

అసలు విషయం ఏంటంటే, ఈ నెల 8వ తేదీన ఇండస్ట్రీలోని కీలక వ్యక్తులందరూ కలిసి ఒక పెద్ద మీటింగ్ నిర్వహించబోతున్నారు. ఆ సమావేశంలో అందరికీ ఆమోదయోగ్యమైన ఒక నిర్ణయం వస్తుందని చెర్రీ ధీమా వ్యక్తం చేశారు. “మేము ఎవరికీ వ్యతిరేకం కాదు, అందరం ఒకే ఇండస్ట్రీకి చెందిన వాళ్లం. కాబట్టి అందరికీ లాభం చేకూరేలా ఒక పరిష్కారం ఖచ్చితంగా దొరుకుతుంది” అని ఆయన చాలా స్పష్టంగా చెప్పారు. ఈ పాయింట్ తో అటు ఎగ్జిబిటర్లకు, ఇటు డిస్ట్రిబ్యూటర్లకు ఆయన ఒక పాజిటివ్ సిగ్నల్ ఇచ్చారు.

ఇక ‘జెట్ లీ’ విషయంలో జరిగిన ఇబ్బందుల గురించి మాట్లాడుతూ, మే 1న వచ్చిన హాలిడేను వాడుకోలేకపోవడం కొంత బాధ కలిగించిందన్నారు. “నోటి దగ్గరి కూడు తినలేకపోయినట్లు ఉంది ఆ పరిస్థితి” అని ఆయన తన ఆవేదనను పంచుకున్నారు. ఆ ఒక్క రోజు మల్టీప్లెక్స్‌లలో సినిమా ఆగిపోవడం వల్ల కలెక్షన్లపై ప్రభావం పడిందని, అయితే ఇప్పుడు సమస్య సర్దుమణిగిందని ఆయన తెలిపారు. ‘పెద్ది’ రిలీజ్ సమయానికి ఇలాంటి ఇబ్బందులు రాకుండా జాగ్రత్త పడతామని ఆయన హామీ ఇచ్చారు.

చెర్రీ మాటలను బట్టి చూస్తుంటే, ‘పెద్ది’ విడుదలకు ముందే థియేటర్ల గొడవ సర్దుమణుగుతుందని అర్థమవుతోంది. బాక్సాఫీస్ వద్ద చరణ్ సినిమా సృష్టించబోయే రికార్డులకు ఎలాంటి అడ్డంకులు లేకుండా ఉండాలని మైత్రీ టీమ్ పక్కాగా ప్లాన్ చేస్తోంది. జూన్ 4 నాటికి అందరూ ఏకాభిప్రాయానికి వస్తేనే, ‘పెద్ది’ మాస్ వైబ్ వెండితెరపై ప్రశాంతంగా సాగుతుంది. మే 8న జరిగే ఆ మీటింగ్ లో ఏయే అంశాలు తేలతాయో చూడాలి.