రావు ర‌మేష్ కు ఇంత చిన్న క్యారెక్ట‌రా?

భారీ అంచనాల మధ్య రిలీజైన‌ రామ్ చరణ్ పెద్ది బాక్సాఫీస్ వద్ద స‌క్సెస్‌ఫుల్ గా దూసుకుపోతున్నప్పటికీ, సినిమా చూసిన ప్రేక్షకుల మధ్య ఒక ఆసక్తికరమైన చర్చ ఇప్పుడు సోషల్ మీడియాలో జోరుగా సాగుతోంది. ఆ చర్చ మొత్తం ప్రముఖ నటుడు రావు రమేష్ పాత్ర చుట్టూనే తిరుగుతోంది. తెలుగు సినీ పరిశ్రమలో తనదైన నటనతో ప్రత్యేక గుర్తింపు సంపాదించుకున్న రావు రమేష్‌కు ఈ సినిమాలో ఆశించిన స్థాయిలో ప్రాధాన్యం దక్కలేదనే అభిప్రాయం వ్యక్తమవుతోంది.

సాధారణంగా ఏ సినిమాలో నటించినా తన పాత్రకు ప్రత్యేకమైన గుర్తింపు తీసుకురావడంలో రావు రమేష్ ముందుంటారు. ముఖ్యంగా పాత్రల ఎంపిక విషయంలో కూడా ఆయనకు మంచి ట్రాక్ రికార్డ్ ఉంది. అందుకే పెద్దిలో ఆయన కనిపించిన తీరు ఇప్పుడు చర్చనీయాంశంగా మారింది. ఈ సినిమాలో రావు రమేష్ హీరోయిన్ తండ్రి పాత్రతో పాటు రాజకీయ నాయకుడిగా కనిపిస్తారు. కథలో ఆ పాత్రకు ఉన్న నేపథ్యం చూస్తే కీలక మలుపులు ఇచ్చే అవకాశం ఉన్నట్టే అనిపించినా, తెరపై మాత్రం ఆ స్థాయిలో ప్రభావం కనిపించలేదని ప్రేక్షకులు భావిస్తున్నారు.

సినిమా మొత్తం మీద ఆయన పాత్ర కొన్ని సన్నివేశాలకు మాత్రమే పరిమితమైందని, పాత్ర ద్వారా కథకు లేదా ప్రధాన పాత్రల ప్రయాణానికి పెద్దగా బలం చేకూరలేదని సోషల్ మీడియాలో అభిప్రాయాలు వ్యక్తమవుతున్నాయి. ముఖ్యంగా గతంలో డైరెక్ట‌ర్ సుకుమార్, త్రివిక్రమ్ శ్రీనివాస్ వంటి డైరెక్ట‌ర్లు రావు రమేష్ నటనను అద్భుతంగా ఉపయోగించుకున్న సందర్భాలను అభిమానులు గుర్తు చేస్తున్నారు. చిన్న పాత్ర అయినా దానికి బలమైన డైలాగులు, భావోద్వేగాలు లేదా కథను మలుపు తిప్పే బాధ్యత ఇచ్చినప్పుడు రావు రమేష్ తన నటనతో ప్రత్యేక ముద్ర వేస్తారని, కానీ పెద్దిలో అలాంటి అవకాశం కనిపించలేదని అంటున్నారు.

ఇక డైరెక్ట‌ర్ బుచ్చిబాబు కథలో ప్రధానంగా రామ్ చరణ్, శివ రాజ్‌కుమార్, జగపతిబాబు పాత్రల చుట్టూ కథనాన్ని నడిపించడంపై ఎక్కువ దృష్టి పెట్టార‌ని, ఆ ప్రక్రియలో మిగతా పాత్రలకు, ముఖ్యంగా రావు రమేష్ వంటి అనుభవజ్ఞుడైన యాక్ట‌ర్ కు సరైన ప్రాధాన్యం దక్కలేదనే అభిప్రాయం వ్యక్తమవుతోంది. ఇదే సమయంలో మరో సందేహం కూడా ప్రేక్షకుల్లో వ్యక్తమవుతోంది. షూటింగ్ టైమ్ లో రావు రమేష్‌కు సంబంధించిన మరికొన్ని సీన్స్ తీసి, తర్వాత ఎడిటింగ్ టేబుల్ వద్ద ఏమైనా వాటిని తొలగించాల్సి వ‌చ్చిందా? లేక మొదటి నుంచే ఆయ‌న పాత్ర పరిధి అంత వరకే పరిమితమా? అనే ప్రశ్నలు కూడా నెట్టింట చర్చకు వస్తున్నాయి.

మొత్తంగా చూస్తే ఒక సినిమాలో ఎంత పెద్ద స్టార్ క్యాస్టింగ్‌ను తీసుకువచ్చామన్నది మాత్రమే కాదు, ఆ యాక్ట‌ర్ల టాలెంట్ ను కథలో ఎంత సమర్థంగా వినియోగించుకున్నామన్నదే ప్రేక్షకులకు ముఖ్యమని పెద్ది సందర్భంగా మరోసారి చర్చకు వచ్చింది. రావు రమేష్ లాంటి టాలెంటెడ్ యాక్ట‌ర్ కు పెద్దిలో మరింత బలమైన పాత్ర ఉండాల్సిందనే అభిప్రాయం ప్రేక్షకులలో వినిపిస్తుండటం ప్రస్తుతం సినీ వర్గాల్లో హాట్ టాపిక్‌గా మారింది.