సినిమా చూడలేని, వినలేని వారి కోసం సరికొత్త రూల్

ఇకపై వెండితెరపై బొమ్మ పడాలంటే కేవలం డైలాగులు, పాటలు ఉంటే సరిపోదు. సినిమాలోని ప్రతి దృశ్యాన్ని వివరించే 'ఆడియో' అలాగే ప్రతి మాటను చూపించే 'అక్షరాలు' (క్యాప్షన్స్) ఖచ్చితంగా ఉండాల్సిందే. వినికిడి లోపం ఉన్నవారికి, కంటి చూపు సరిగా లేని వారికి కూడా సినిమా అనుభూతిని పంచాలనే ఉద్దేశంతో సెన్సార్ బోర్డు ఈ విప్లవాత్మక మార్పుకు శ్రీకారం చుట్టింది. మార్చి 15 నుంచి ఈ నిబంధనను అతిక్రమిస్తే, ఆ సినిమాకు సెన్సార్ సర్టిఫికెట్ ఇవ్వబోమని బోర్డు తేల్చి చెప్పింది.

సాధారణంగా మనం విదేశీ సినిమాలు చూస్తున్నప్పుడు కింద అక్షరాలు సబ్ టైటిల్స్ రావడం గమనిస్తుంటాం. కానీ ఇప్పుడు మన దేశంలోని ప్రతి ప్రాంతీయ సినిమాకు 'క్లోజ్డ్ క్యాప్షన్స్' తప్పనిసరి. కేవలం మాటలే కాదు, బ్యాక్‌గ్రౌండ్‌లో వచ్చే శబ్దాలను కూడా అక్షర రూపంలో చూపించాలి. అలాగే చూపు లేని వారి కోసం, సినిమాలో ఏం జరుగుతుందో వివరించే 'ఆడియో డిస్క్రిప్షన్' ఫైల్ కూడా జత చేయాలి. అంతర్జాతీయ ప్రమాణాలకు అనుగుణంగా ఇండియన్ సినిమాను మార్చాలనే లక్ష్యంతో కేంద్ర సమాచార మరియు ప్రసార మంత్రిత్వ శాఖ ఈ దిశగా అడుగులు వేస్తోంది.

నిజానికి ఇది దివ్యాంగుల హక్కుల కోసం తీసుకున్న గొప్ప నిర్ణయం అయినప్పటికీ, నిర్మాతలకు మాత్రం ఇది ఒక అదనపు భారంగా మారింది. షూటింగ్ పూర్తి చేసి, భారీగా వడ్డీలు కడుతూ రిలీజ్ కోసం చూసే చిన్న సినిమాల మేకర్స్‌కు ఈ కొత్త టెక్నికల్ నిబంధనలు తలనొప్పిగా మారాయి. ఈ క్యాప్షన్స్ ఆడియో ఫైల్స్ తయారు చేయడానికి అదనపు ఖర్చుతో పాటు సమయం కూడా వృథా అవుతుందని వారు ఆందోళన చెందుతున్నారు. కానీ, ప్రభుత్వం మాత్రం ఈ విషయంలో ఎక్కడా తగ్గడం లేదు.

టెక్నికల్ పరంగా చూస్తే, డిజిటల్ సినిమా ప్యాకేజీలో ఈ మార్పులు చేయడం ఇప్పుడు తప్పనిసరి. ఇప్పటికే పలు ప్రాంతీయ సెన్సార్ కార్యాలయాలు ఈ మేరకు నోటీసులు జారీ చేశాయి. అంటే మార్చి 15 తర్వాత సెన్సార్‌కు వెళ్లే ఏ సినిమాకైనా ఈ 'యాక్సెసిబిలిటీ ఫీచర్స్' లేకపోతే అప్లికేషన్‌ను కనీసం అంగీకరించరు. దీనివల్ల పొరపాటున ఎవరైనా ఈ రూల్ మర్చిపోతే, సినిమా విడుదల తేదీలు అప్పటికప్పుడు మారిపోయే ప్రమాదం ఉంది.

ఈ మార్పు వల్ల సినిమా చూసే విధానంలో ఒక కొత్త ట్రెండ్ మొదలవబోతోంది. ఇప్పటివరకు థియేటర్లకు వెళ్లలేని కోట్లాది మందికి ఇది ఒక వరంగా మారుతుంది. సమాజంలోని ప్రతి వ్యక్తికి వినోదాన్ని సమానంగా అందించాలనే ఉద్దేశం బాగున్నా, అది ఆచరణలో నిర్మాతలకు ఎంతవరకు సహకరిస్తుందనేది చూడాలి. కేవలం పెద్ద సినిమాలే కాకుండా, బడ్జెట్ తక్కువగా ఉండే ఆర్ట్ సినిమాలు, డాక్యుమెంటరీలు కూడా ఈ నిబంధనను పాటించాల్సిందే.