మురుగ‌దాస్ తో అంత‌కు మించి ప్లాన్ చేస్తున్నారా?

'ద‌ర్బార్' ప్లాప్ త‌ర్వాత ముర‌గ‌దాస్ మూడ‌ళ్ల పాటు మేకింగ్ కి దూరంగా ఉన్న సంగ‌తి తెలిసిందే. ఇటీవ‌లే శివ కార్తికేయ‌న్ హీరోగా ఓ కొత్త సినిమా ప‌ట్టాలెక్కించారు. మ‌రి ఇంత గ్యాప్ ఎందుకిచ్చాడు? శివ కార్తికేయ‌న్ లాంటి టైర్-2 హీరోతో సినిమా చేయాల్సిన ప‌రిస్థితులు ఏంటి? అన్న దానిపై ఇప్ప‌టికీ చ‌ర్చ సాగుతూనే ఉంది. హీరోలంతా ఇత‌ర ప్రాజెక్ట్ ల‌తో బిజీగా ఉండ‌టం వ‌ల్ల డేట్లు స‌ర్దుబాటు కాలేదా? లేక వాళ్ల‌కు దూరంగా ముర‌గ‌దాస్ ఉన్నాడా? లేక స్టార్ హీరోల్ని మెప్పించే క‌థ‌లు లేక‌నా? అన్న‌ది తెలియ‌దుగానీ.. ముర‌గ‌దాస్ ప్రాజెక్ట్ తో శివ కార్తికేయ‌న్ మాత్రం మ‌రింత ఫేమ‌స్ అవుతున్నాడు.

అత‌డిలో న‌టుడ్ని గుర్తించి ముర‌గ‌దాస్ అవకాశం ఇవ్వ‌డం ప‌ట్ల ఎంతో సంతోషంగా ఉన్నాడు. స‌రిగ్గా ఇదే స‌మ‌యంలో ముర‌గ‌దాస్ మ‌రోసారి బాలీవుడ్ కి వెళ్ల‌బోతున్నాడు అన్న వార్త వైర‌ల్ అవుతోన్న సంగ‌తి తెలిసిందే. స‌ల్మాన్ ఖాన్ హీరోగా ముర‌గ‌దాస్ కిక్-2 చిత్రాన్ని తెర‌కెక్కించ‌నున్నార‌ని వెలుగులోకి వ‌చ్చింది. సాజిద్ న‌డియా వాలా ఈ చిత్రాన్ని నిర్మిస్తున్న‌ట్లు ప్ర‌చారం సాగుతోంది. 'కిక్' చిత్రాన్ని నేరుగా సాజిద్ నే తెర‌కెక్కించినా..ఇప్పుడు మేకింగ్ బాధ్య‌త‌ల నుంచి త‌ప్పుకుని ముర‌గ‌దాస్ కి కిక్-2 సినిమా అప్ప‌గించి న‌ట్లు వైర‌ల్ అవుతుంది.

అయితే తాజాగా ఈ ప్ర‌చారాన్ని సాజిద్ న‌డియావాల చిత్ర నిర్మాణ సంస్థ కొట్టి పారేసింది. కిక్-2 చిత్రానికి ముర‌గ‌దాస్ ద‌ర్శ‌క‌త్వం వ‌హించ‌లేద‌ని వెల్ల‌డించారు. అయితే ఆ సినిమాకి బధులుగా ముర‌గ‌దాస్ తో మ‌రో చిత్రాన్ని తెర‌కెక్కిస్తున్న‌ట్లు ఈ సంద‌ర్భంగా ప్ర‌క‌టించారు. ముర‌గ‌దాస్ తో ఓ ప్రత్యేక ప్రాజెక్ట్ ప్లాన్ చేస్తున్న‌ట్లు తెలిపారు. దీంతో ఈ సినిమాకి సంబంధించిన విష‌యం లీక్ అవ్వ‌డంతో అది మార్కెట్ లోకిక్-2గా బ‌య‌ట‌కు వ‌చ్చిన‌ట్లు తెలుస్తోంది.

'కిక్' లాంటి కామెడీ చిత్రాలు తెర‌కెక్కించ‌డం అన్న‌ది ముర‌గ‌దాస్ కి చేత‌కాద‌నే చెప్పాలి. ఆయ‌న స్టైల్ వేరు..ఆయ‌న మేకింగ్ వేరు. ఇప్ప‌టివ‌కూ ఆయ‌న యాక్ష‌న్ బ్యాక్ డ్రాప్ చిత్రాల్నే రూపొందించారు. వాటిలో తాను స్పెష‌లిస్ట్ అని ప్రూవ్ చేసుకున్నారు. ఇప్ప‌టికే ముర‌గ‌దాస్ బాలీవుడ్ లో 'గ‌జ‌నీ' రీమేక్ తో హిందీ మార్కెట్ లోకి అడుగు పెట్టిన సంగ‌తి తెలిసిందే. అలాగే నిర్మాత‌గానూ సినిమాలు నిర్మిస్తున్నారు.