ఆ ఒక్క పాట వచ్చి ఉంటే.. సినిమాకు 1000 కోట్లు వచ్చేవా..

2010లో ‘రోబో’ రిలీజ్ అయినప్పుడు ఇండియన్ బాక్సాఫీస్ ఇప్పటిలా లేదు. రూ.500 కోట్ల సినిమా కూడా అప్పటికి రాలేదు. అయినా రజనీకాంత్ శంకర్ సినిమా ప్రపంచవ్యాప్తంగా దాదాపు రూ.290 కోట్ల వరకు వెళ్లింది. ఇప్పుడు చూస్తే ఆ నెంబర్ నార్మల్ గా అనిపించొచ్చు. కానీ అప్పటి టికెట్ రేట్లు, స్క్రీన్లు, ఓవర్సీస్ మార్కెట్ చూసుకుంటే అది చాలా పెద్ద రన్. అలాంటి సినిమాకు మైఖేల్ జాక్సన్ పాట కూడా చేరి ఉంటే రేంజ్ ఇంకెంత పెరిగేదో అనిపించకుండా ఉండదు.

తమన్ లేటెస్ట్ గా చెప్పిన విషయం ఇదే. ‘రోబో’ కోసం ఏఆర్ రెహమాన్ మైఖేల్ జాక్సన్‌తో ఒక పాట చేయాలని ప్లాన్ చేశారట. మే నెలలో ఒప్పందం కూడా జరిగిందని, జూన్‌లో జాక్సన్ మరణించడంతో ఆ అవకాశం మిస్ అయిందని తమన్ గుర్తు చేశారు. రెహమాన్ కూడా గతంలో మైఖేల్ జాక్సన్‌ను 2009లో కలిసిన విషయాన్ని చెప్పారు. శంకర్ ఈ కాంబినేషన్‌ను సినిమాలోకి తీసుకురావాలని అనుకున్నట్టు అప్పుడే బయటపెట్టారు.

2009లో మైఖేల్ జాక్సన్ ప్రపంచంలోనే అత్యంత గుర్తింపు ఉన్న పాప్ స్టార్‌లలో ఒకరు. తమిళ సినిమాలో ఆయన పాట ఉంటే ఇండియాలో మాత్రమే కాదు, విదేశాల్లో కూడా ‘రోబో’ పేరుకు ముందే భారీ ప్రచారం దొరికేది. రజనీకాంత్‌కు జపాన్ సహా కొన్ని విదేశీ మార్కెట్లలో అప్పటికే అభిమానులు ఉన్నారు. జాక్సన్ పేరు చేరితే సినిమా వెళ్లే దేశాలు, అక్కడి ప్రేక్షకుల ఫోకస్ కూడా పెరిగే అవకాశం ఉండేది.

పైగా ‘రోబో’లో అప్పటికి కొత్తగా అనిపించే టెక్నికల్ పని చాలానే ఉంది. గ్రాఫిక్స్ కోసం విదేశీ టెక్నిషియన్స్ వర్క్ చేశారు. విజువల్ ఎఫెక్ట్స్, రోబో క్లైమాక్స్, చిట్టి వందల రూపాల్లో కనిపించే సన్నివేశాల గురించి అప్పట్లోనే చాలా మాట్లాడుకున్నారు. మైఖేల్ జాక్సన్ పాట సెట్టయ్యి ఉంటే అది సినిమాకు సంబంధం లేని అదనపు బూస్ట్ లా కాకుండా, శంకర్ అప్పటికే ప్లాన్ చేసిన స్కేల్‌లోనే మరో భాగంగా ఉండేది.

అందుకే ఇప్పుడు “ఆ పాట జరిగి ఉంటే రూ.1000 కోట్లు చేసేదా?” అనే ఊహ రావడం రాకుండా ఉండదు. కానీ 2010 మార్కెట్‌లో అది ఎంతవరకు సాధ్యమయ్యేదో చెప్పడం కష్టం. భారతీయ సినిమా రూ.1000 కోట్ల మార్క్‌ను చాలా ఏళ్ల తర్వాత చేరింది. అయితే ‘రోబో’ అప్పటికే దాదాపు రూ.300 కోట్ల వరకు వెళ్లింది. జాక్సన్ పాటతో ఓవర్సీస్‌లో మరిన్ని మార్కెట్లు దొరికుంటే కలెక్షన్స్ ఇంకా పైకి వెళ్లే అవకాశం మాత్రం ఉండేది.

చివరకు ఆ పాట జరగలేదు. ‘రోబో’ మాత్రం తన బాక్సాఫీస్ రన్‌తో ఆ ఏడాది భారీ వసూళ్లు సాధించిన ఇండియన్ సినిమాల్లో ముందుండింది. ఇప్పుడు తమన్ చెప్పిన మాటలతో ఆ పాత ప్లాన్ మళ్లీ బయటకొచ్చింది. రజనీకాంత్ స్క్రీన్‌పై ఉండగా మైఖేల్ జాక్సన్ వాయిస్ వినిపించే పాట నిజంగా వచ్చి ఉంటే, ఆ సినిమా ప్రమోషన్ ఎలా ఉండేదో.. విదేశాల్లో ఇంకెంత దూరం వెళ్లేదో అనేది ఇప్పుడు ఫ్యాన్స్ ఊహించుకుంటున్నారు.