శ్రీహరి వారసుడు.. ఈసారి భయపెట్టాలా థ్రిల్లర్ లుక్

రియల్ స్టార్ శ్రీహరి వారసుడు మేఘాంశ్ మరో డిఫరెంట్ కాన్సెప్ట్ తో తన అదృష్టాన్ని పరీక్షించుకోబోతున్నాడు. ఆ కొత్త సినిమా రీసెంట్ గానే మొదలైంది. ‘ఆస్మాన్’ అనే టైటిల్ కూడా ఫిక్స్ చేశారు. ఇక ఫస్ట్ లుక్, మోషన్ పోస్టర్‌ను లేటెస్ట్ గా శ్రీహరి జయంతి సందర్భంగా రిలీజ్ చేశారు. బ్లాక్ డ్రెస్‌లో చేతిలో పాత లాంతరు పట్టుకుని మేఘాంశ్ కనిపిస్తున్నాడు. లాంతరు చుట్టూ పగిలిపోతున్న గాజు, వెనుక చీకటి వాతావరణంతో లుక్‌ను రఫ్‌గా డిజైన్ చేశారు.

మోషన్ పోస్టర్‌లో ఫైర్, పెద్ది చేయి లాంటి విజువల్స్ కూడా చూపించారు. కథను చెప్పకుండా జానర్ మీద మాత్రం చిన్న హింట్ ఇచ్చేలా మొత్తం పోస్టర్ ఉంది. మేఘాంశ్‌కు ‘ఆస్మాన్’ కీలకమైన సినిమా. 2019లో ‘రాజ్‌దూత్’తో హీరోగా పరిచయమైన ఈ యువ హీరోకు ఆ తర్వాత పెద్ద గ్యాప్ వచ్చింది. ఇప్పుడు మళ్లీ లీడ్ రోల్‌తో ప్రేక్షకుల ముందుకు వస్తున్నాడు.

రెగ్యులర్ కథ కాకుండా థ్రిల్లర్ జానర్‌లో కొత్తగా ప్రయత్నించాలని ఫిక్స్ అయ్యాడు. ‘ఆస్మాన్’ను డిఫరెంట్ థ్రిల్లర్ కథతో తెరకెక్కిస్తున్నారు. సస్పెన్స్‌కు కూడా కథలో ఉంటుందని టీమ్ మొదటి నుంచే చెబుతోంది. ఫస్ట్ లుక్‌లో కనిపిస్తున్న లాంతరు, మోషన్ పోస్టర్‌లోని భారీ విజువల్స్ కూడా అదే మూడ్‌ను కొనసాగించాయి. అయితే మేఘాంశ్ పాత్ర ఏంటి, పురాణాలకు కథతో ఉన్న లింక్ ఏంటి అనే వివరాలను మాత్రం బయటపెట్టలేదు.

ఈ సినిమాతో రామ్ నందన్ తెలుగు దర్శకుడిగా పరిచయం అవుతున్నాడు. రామ్ మైథాలజీ, ఫాంటసీ సినిమాల్లో తనదైన ముద్ర వేసిన కోడి రామకృష్ణ దగ్గర అసిస్టెంట్ డైరెక్టర్‌గా కూడా పని చేశాడు. ఇప్పుడు అదే అనుభవంతో తెలుగు ప్రేక్షకులకు ‘ఆస్మాన్’ తీసుకొస్తున్నాడు. శ్రీ క్లిన్‌కారా సెల్యులోయిడ్స్ నిర్మిస్తున్న ఈ చిత్రానికి వెంకటేష్ కొండారు, శ్రీకాంత్ మన్నెం నిర్మాతలు.

ప్రశాంత్ ఆర్ విహారి సంగీతం అందిస్తుండగా షోయబ్ అహ్మద్ కెమెరామెన్ గా వర్క్ చేస్తున్నారు. తెలుగు మాత్రమే కాకుండా తమిళం, మలయాళం, కన్నడ, అరబిక్ భాషల్లోనూ సినిమాను తీసుకురావాలని మేకర్స్ ప్లాన్ చేశారు. ఇక ‘ఆస్మాన్’తో మాత్రం మేఘాంశ్ తనకంటూ ఒక గుర్తింపు తెచ్చుకునే ప్రయత్నం చేస్తున్నాడు. అందుకే ఫస్ట్ లుక్‌లోనూ గత సినిమాతో పోలిక లేకుండా కొత్త టోన్ ఎంచుకున్నారు. మరి అతని కెరీర్‌కు ఈ సినిమా ఎలాంటి సక్సెస్ ను ఇస్తుందో చూడాలి.