మేము సేఫ్.. కంగారు పడొద్దు.. అభిమానుల కోసం మంచు విష్ణు పోస్ట్!

ఇరాన్, ఇజ్రాయెల్ మధ్య జరుగుతున్న భీకర యుద్ధం కారణంగా గల్ఫ్ దేశాల్లో యుద్ధ మేఘాలు కమ్ముకున్నాయి. ఈ క్రమంలో దుబాయ్‌లో చిక్కుకున్న టాలీవుడ్ నటుడు మంచు విష్ణు, తన కుటుంబం క్షేమంగానే ఉన్నట్లు సోషల్ మీడియా ద్వారా వెల్లడించారు. క్షిపణుల శబ్దాలు దూరం నుంచి వినిపిస్తున్నా, ప్రస్తుతం అంతా ప్రశాంతంగానే ఉందని ఆయన పేర్కొన్నారు. తమ భద్రత కోసం ప్రార్థించిన అభిమానులకు, శ్రేయోభిలాషులకు విష్ణు ఈ సందర్భంగా హృదయపూర్వక కృతజ్ఞతలు తెలిపారు.

యుద్ధ వాతావరణంలో మంచు ఫ్యామిలీ:

ఇరాన్ ప్రయోగించిన క్షిపణులు దుబాయ్ గగనతలంలో వెళ్తున్న దృశ్యాలను చూసి మంచు విష్ణు తీవ్ర ఆందోళన వ్యక్తం చేశారు. ఆ భయానక దృశ్యాలను ఎక్స్‌లో పోస్ట్ చేస్తూ.. "ఏ చిన్నారి కూడా ఇలాంటి యుద్ధ వాతావరణంలో పెరగకూడదు" అంటూ ఆవేదన చెందారు. గల్ఫ్ ప్రాంతంలో విమాన సర్వీసులు నిలిచిపోవడంతో విష్ణు కుటుంబంతో పాటు మరికొందరు సినీ ప్రముఖులు కూడా అక్కడే చిక్కుకుపోయారు. ఈ క్లిష్ట సమయంలో దుబాయ్ ప్రభుత్వం తీసుకుంటున్న రక్షణ చర్యలు, భద్రతా ఏర్పాట్లు అద్భుతంగా ఉన్నాయని విష్ణు కొనియాడారు.

సోనాల్ చౌహాన్ రిక్వెస్ట్.. మోదీకి విజ్ఞప్తి:

ఇక అక్కడ మంచు విష్ణుతో పాటు టాలీవుడ్ నటి సోనాల్ చౌహాన్ కూడా చిక్కుకుపోయారు. అక్కడ నెలకొన్న అనిశ్చితిని చూసి భయపడిన ఆమె, తనను క్షేమంగా భారతదేశానికి చేర్చాలంటూ సోషల్ మీడియా వేదికగా ప్రధాని నరేంద్ర మోదీకి విజ్ఞప్తి చేశారు.ఇక విమాన సర్వీసులు రద్దు కావడంతో పాటు యుద్ధ భయం వెంటాడుతుండటంతో, అక్కడ ఉన్న భారతీయులంతా స్వదేశానికి వచ్చేందుకు ఎదురుచూస్తున్నారు. పరిస్థితి ఎప్పుడు చక్కబడుతుందో, విమానాలు ఎప్పుడు పునరుద్ధరిస్తారో తెలియని సస్పెన్స్ నెలకుంది.

అభిమానులకు ధైర్యం.. క్షేమంగా వచ్చేస్తామని భరోసా:

యుద్ధం ఎప్పుడు ఎటు మలుపు తిరుగుతుందో అన్న టెన్షన్ ఉన్నప్పటికీ, మంచు విష్ణు మాత్రం తన అభిమానులకు ధైర్యం చెప్పారు. "మేము సురక్షితంగా ఉన్నాం, కంగారు పడకండి" అంటూ ఆయన పెట్టిన పోస్ట్ వైరల్ అవుతోంది. ఇక గగనతలం క్లియర్ అయిన వెంటనే ఇండియాకు చేరుకుంటామని ఆయన ఆశాభావం వ్యక్తం చేశారు. ఇక యుద్ధం వల్ల సామాన్యులు పడే ఇబ్బందులను చూస్తుంటే మనసు కలచివేస్తోందని ఆయన పేర్కొన్నారు. మంచు విష్ణు ఫ్యామిలీతో పాటు అక్కడ ఉన్న భారతీయులంతా త్వరగా క్షేమంగా రావాలని నెటిజన్లు కోరుకుంటున్నారు.