పేరుకే తెలుగమ్మాయి.. భాష రాదా.. ఈ యంగ్ బ్యూటీ అవస్థలు చూశారా?

నటి మానస చౌదరి తాజాగా తన క్యూట్ యాక్ట్‌తో అందరినీ నవ్వించారు. తరుణ్ భాస్కర్ హీరోగా వస్తున్న ‘గాయపడ్డ సింహం’ సినిమా ప్రీ రిలీజ్ ఈవెంట్‌లో ఆమె స్పీచ్ ఇస్తూ కాస్త ఇబ్బంది పడ్డారు. తానూ తెలుగు అమ్మాయినే అని చెబుతూనే, పూర్తిగా తెలుగులో మాట్లాడటం రాక.. స్పీచ్ మొత్తాన్ని చేతిపై రాసుకుని వచ్చారు. మైక్ ముందు నిలబడి చేతిని చూసుకుంటూ ఆమె తెలుగులో మాట్లాడటానికి పడ్డ కష్టానికి సంబంధించిన వీడియో ఇప్పుడు సోషల్ మీడియాలో తెగ వైరల్ అవుతోంది. ఆ విశేషాలు చూద్దాం..

చేతిపై స్పీచ్.. స్టేజ్ మీద ఫన్:

ఇక ఏదైనా ఫంక్షన్ జరిగినప్పుడు హీరోయిన్లు ఇంగ్లీష్‌లో మాట్లాడటం మనం చూస్తుంటాం. కానీ మానస మాత్రం తెలుగులోనే మాట్లాడాలని గట్టిగా ఫిక్స్ అయ్యారు. అయితే మరిచిపోతానన్న భయంతోనో ఏమో కానీ, ముఖ్యమైన పాయింట్లన్నీ చేతిపై రాసేసుకున్నారు. స్టేజ్ మీద మాట్లాడుతున్నంత సేపు ఆమె తన చేతిని చూసుకుంటూ అవస్థలు పడటం చూసి అక్కడున్న వారంతా నవ్వుకున్నారు. ఇక ఈ చిన్న ‘చీటింగ్’ పని ఆమెలోని అమాయకత్వాన్ని, తెలుగుపై ఉన్న ఇష్టాన్ని చూపిస్తోందని నెటిజన్లు కామెంట్స్ చేస్తున్నారు.

గాయపడ్డ సింహం.. ఇది ఒక పొలిటికల్ సటైర్:

ఇక సినిమా విషయానికి వస్తే.. ‘గాయపడ్డ సింహం’ ఒక వైవిధ్యమైన పొలిటికల్ సటైర్ మూవీ. తరుణ్ భాస్కర్ హీరోగా నటిస్తున్న ఈ చిత్రాన్ని కొత్త దర్శకుడు కశ్యప్ శ్రీనివాస్ తెరకెక్కించారు. ఈ కథ అమెరికా మాజీ అధ్యక్షుడు డొనాల్డ్ ట్రంప్ తీసుకున్న డిపోర్టేషన్ నిర్ణయాల నేపథ్యంలో సాగుతుందట. ఇక సీరియస్ సమస్యలను కూడా చాలా కామెడీగా, వ్యంగ్యంగా ఈ సినిమాలో చూపించబోతున్నారు.

భారీ తారాగణం.. సర్‌ప్రైజ్ ఎంట్రీలు:

ఈ సినిమాలో హీరోయిన్లుగా మానస చౌదరితో పాటు ‘జాతి రత్నాలు’ ఫేమ్ ఫరియా అబ్దుల్లా కూడా నటిస్తోంది. ఇక విలన్‌గా విలక్షణ నటుడు జెడి చక్రవర్తి కనిపిస్తుండటం సినిమాపై అంచనాలు పెంచుతోంది. వీటన్నింటికీ మించి యంగ్ హీరో శ్రీవిష్ణు ఒక స్పెషల్ రోల్‌లో మెరవబోతున్నారు. ఇక స్వీకర్ అగస్తీ అందించిన సంగీతం ఇప్పటికే యూత్‌ను ఆకట్టుకుంటోంది.

ఇక ఇప్పటికే సెన్సార్ పనులు పూర్తి చేసుకున్న ఈ సినిమాకు U/A సర్టిఫికేట్ లభించింది. అన్ని హంగులు పూర్తి చేసుకున్న ఈ ‘గాయపడ్డ సింహం’ మే 1న థియేటర్లలో గర్జించడానికి సిద్ధమైంది. సినిమా ప్రమోషన్స్ చాలా వెరైటీగా చేస్తుండటంతో ఆడియెన్స్‌లో మంచి క్యూరియాసిటీ ఏర్పడింది. ఇక రాజకీయ వ్యంగ్యంతో పాటు కావాల్సినంత వినోదాన్ని పంచేందుకు ఈ టీమ్ గట్టిగానే ప్లాన్ చేసింది.

హీరోయిన్ మానస చేసిన పని వల్ల సినిమాకు మంచి పబ్లిసిటీ దక్కిందనే చెప్పాలి. తెలుగమ్మాయి అయి ఉండి కూడా తెలుగు కోసం ఆమె పడ్డ తాపత్రయం ఫ్యాన్స్‌కు నచ్చింది. మరి ఈ 'గాయపడ్డ సింహం' మే 1న బాక్సాఫీస్ వద్ద ఎలాంటి మ్యాజిక్ చేస్తుందో చూడాలి. తరుణ్ భాస్కర్ మార్క్ కామెడీ ఈ సినిమాను ఏ రేంజ్‌కు తీసుకెళ్తుందో వేచి చూడాల్సిందే!