వెయ్యి కోట్ల టార్గెట్ వైపు జైలర్2

సినిమా రిలీజ్ కు ఇంకా టైమ్ ఉన్నప్పటికీ, ట్రేడ్ వర్గాల్లో ఇప్పటికే భారీ డిస్క‌ష‌న్ కు కారణమవుతున్న ప్రాజెక్ట్‌గా జైలర్2 నిలుస్తోంది. మొద‌టి భాగం సాధించిన క‌మ‌ర్షియ‌ల్ స‌క్సెస్ తో పాటు, సీక్వెల్‌పై ఏర్పడిన అంచనాలు ఇప్పుడు ప్రీ రిలీజ్ బిజినెస్‌ను నెక్ట్స్ లెవెల్ కు తీసుకెళ్తున్నాయనే అభిప్రాయం ఇండస్ట్రీలో వ్యక్తమవుతోంది. రిలీజ్ కు ముందే డిస్ట్రిబ్యూషన్ రైట్స్ కోసం వివిధ ఏరియాల నుంచి ఇంట్రెస్ట్ పెరగడం ఈ సినిమాపై ఉన్న మార్కెట్ నమ్మకాన్ని స్పష్టంగా చూపిస్తోంది.

ప్రత్యేకంగా కేరళ మార్కెట్‌లో జైలర్2కు అనూహ్యమైన డిమాండ్ కనిపిస్తోందని ట్రేడ్ వర్గాలు చెబుతున్నాయి. మొద‌టి భాగం అక్కడ బెస్ట్ క‌లెక్ష‌న్లు నమోదు చేయడంతో, జైల‌ర్ రైట్స్ ను సొంతం చేసుకోవడానికి ప్రముఖ డిస్ట్రిబ్యూషన్ సంస్థలు పోటీపడుతున్నట్లు సమాచారం. అడ్వాన్స్ డీల్స్ విషయంలోనూ భారీ ఆఫర్లు వినిపిస్తున్నాయని ప్రచారం జరుగుతోంది. ఇది సినిమా రిలీజ్‌కు ముందే రికార్డు స్థాయి బిజినెస్‌కు సంకేతంగా భావిస్తున్నారు.

దీనికి మరో ప్రధాన కారణంగా మల్టీస్టారర్ ఎట్రాక్ష‌న్ ను ట్రేడ్ విశ్లేషకులు పేర్కొంటున్నారు. ముఖ్యంగా మోహన్‌లాల్ ప్రభావం కేరళ మార్కెట్‌లో సినిమాకు మరింత బలాన్ని చేకూరుస్తుందని అంచనా వేస్తున్నారు. ఆయనకు ఉన్న అభిమాన వర్గం, రజినీకాంత్‌కు ఉన్న విశాలమైన మార్కెట్ కలిసి ఈ సినిమాను సౌత్‌లో అత్యంత క్రేజ్ ఉన్న ప్రాజెక్టుల లిస్టులో నిలబెడుతున్నాయి. రీసెంట్ గా రిలీజైన రిలీజ్ డేట్ గ్లింప్స్ కూడా సినిమాపై హైప్‌ను మరింత పెంచింది. సోషల్ మీడియాలో గ్లింప్స్‌కు వచ్చిన రెస్పాన్స్, ఫ్యాన్స్ డిస్క‌ష‌న్స్, ట్రేడ్ వర్గాల్లో పెరిగిన ఆసక్తి కలిసి జైలర్2పై అంచనాలను మరింత బలపరిచాయి. సినిమా కంటెంట్‌కు సంబంధించిన వివరాలు పూర్తిగా బయటకు రాకముందే ఈ రేంజ్ బజ్ రావడం విశేషంగా చెప్పబడుతోంది.

తెలుగు మార్కెట్‌లోనూ పరిస్థితి ఇదే విధంగా కనిపిస్తోంది. జైల‌ర్ కు లభించిన ఆదరణ కారణంగా రెండో భాగం థియేట్రికల్ రైట్స్ పై కూడా మంచి ఆసక్తి నెలకొనే అవకాశాలున్నాయని ట్రేడ్ వర్గాలు భావిస్తున్నాయి. తమిళంతో పాటు తెలుగు, మలయాళం, కన్నడ మార్కెట్లలో ఒకేసారి స్ట్రాంగ్ బిజినెస్‌ను టార్గెట్ గా పెట్టుకుని రిలీజ్ ప్లాన్స్ రూపొందుతున్నాయనే చర్చ సాగుతోంది. డైరెక్ట‌ర్ నెల్సన్ దిలీప్ కుమార్, సూపర్ స్టార్ రజినీకాంత్ కాంబినేషన్ మరోసారి రిపీట్ కావడం కూడా ఈ ప్రాజెక్ట్‌కు ప్రధాన బలంగా మారింది. తొలి భాగంలో మాస్ ఎంటర్‌టైనర్‌ను అందించిన ఈ జోడీపై డిస్ట్రిబ్యూటర్లు, ఎగ్జిబిటర్లు గట్టి నమ్మకం ఉంచుతున్నట్లు తెలుస్తోంది. అందుకే ప్రీ రిలీజ్ దశలోనే సినిమా బిజినెస్ ఊహించిన దానికంటే వేగంగా ముందుకు సాగుతోందని ట్రేడ్ వర్గాల అంచనా.

ఇప్పటికే ఇండస్ట్రీలో వినిపిస్తున్న డిస్క‌ష‌న్స్ ప్రకారం, జైలర్2 కేవలం సీక్వెల్ మాత్రమే కాదు, పాన్ సౌత్ స్థాయిలో భారీ క‌మ‌ర్షియ‌ల్ ప్రాజెక్ట్‌గా రూపుదిద్దుకుంటోంది. రిలీజ్‌కు ముందే కనిపిస్తున్న మార్కెట్ రెస్పాన్స్ చూస్తే, తొలి భాగం నెలకొల్పిన రికార్డులను అధిగమించే దిశగా ఈ సినిమా అడుగులేస్తోందని విశ్లేషకులు అభిప్రాయపడుతున్నారు. అదే జోరు కంటిన్యూ అయితే రూ. 1000 కోట్ల క్లబ్‌ను టార్గెట్ గా పెట్టుకున్న సినిమాల్లో జైలర్2 కూడా ఒకటిగా నిలిచే అవకాశాలను ట్రేడ్ వర్గాలు కొట్టిపారేయడం లేదు.