'ఈషా' ట్రైలర్: ఆత్మలు ఉన్నాయని నిరూపిస్తే..

హార్రర్ థ్రిల్లర్ జానర్ కు ఎప్పుడూ ఒక సెపరేట్ ఫ్యాన్ బేస్ ఉంటుంది. రొటీన్ గా భయపెట్టే దెయ్యం కథల కంటే, కాస్త కొత్త పాయింట్ తో, లాజిక్ తో వస్తే ఆడియెన్స్ కచ్చితంగా ఆదరిస్తారు. ఇప్పుడు అదే ప్రయత్నంతో 'ఈషా' అనే చిత్రం ప్రేక్షకుల ముందుకు రాబోతోంది. లేటెస్ట్ గా విడుదలైన ఈ సినిమా ట్రైలర్ ను గమనిస్తే, రెగ్యులర్ హార్రర్ ఫార్ములాకు కాస్త భిన్నంగా, ఒక ఇంట్రెస్టింగ్ ట్విస్ట్ తో కథను నడిపించినట్లు కనిపిస్తోంది.

దెయ్యాలు, ఆత్మలు లేవని బలంగా నమ్మే స్నేహితుల చుట్టూ ఈ కథ తిరుగుతుంది. సమాజంలో ఉన్న మూఢనమ్మకాలను, దొంగ బాబాలను ఎక్స్ పోజ్ చేయడానికి బయలుదేరిన వీరికి, బాబ్లూ పృథ్వీరాజ్ రూపంలో ఒక సవాలు ఎదురవుతుంది. "ఆత్మలు ఉన్నాయని నిరూపిస్తే.." అంటూ ఆయన విసిరే ఛాలెంజ్ తో వీరు ఒక చీకటి ప్రపంచంలోకి అడుగుపెడతారు. సైన్స్ కు, అతీంద్రియ శక్తులకు మధ్య జరిగే క్లాష్ దీన్ని ఆసక్తికరంగా మలిచారు.

ట్రైలర్ లోని విజువల్స్ చాలా వరకు బ్లూ అండ్ డార్క్ థీమ్ లో సాగాయి. ముఖ్యంగా ఆ పాడుబడిన బంగ్లా, అక్కడ నేల మీద వేసి ఉన్న యంత్రాలు, క్షుద్ర పూజల సెటప్ సినిమాలోని మూడ్ ని ఎలివేట్ చేశాయి. కెమెరామెన్ సంతోష్ లైటింగ్ వాడిన విధానం, దానికి ఆర్ఆర్ ధృవన్ అందించిన బ్యాక్ గ్రౌండ్ స్కోర్ తోడై కొన్ని చోట్ల ఉలిక్కిపడేలా చేశాయి. సౌండ్ డిజైన్ హార్రర్ సినిమాలకు ఎంత ముఖ్యమో ఇందులో మరోసారి వినిపించింది.

ఇందులో త్రిగున్, హెబ్బా పటేల్, సిరి హన్మంత్ ప్రధాన పాత్రల్లో కనిపిస్తున్నారు. ట్రైలర్ లో వీరి హావభావాలు, ముఖ్యంగా భయంతో వణికిపోయే సన్నివేశాల్లో వారి నటన సహజంగా ఉంది. హెబ్బా పటేల్ కు దెయ్యం పట్టడం, ఆమె వింతగా ప్రవర్తించే షాట్స్ ఆసక్తిని రేపుతున్నాయి. కేవలం గ్లామర్ కోసమే కాకుండా, కథలో వీరి పాత్రలకు ప్రాధాన్యత ఉన్నట్లు అర్థమవుతోంది.

ఈ ప్రాజెక్ట్ కు ఉన్న ప్రధాన బలం దీని వెనుక ఉన్న నిర్మాతలు. బన్నీ వాస్, వంశీ నందిపాటి వంటి జడ్జిమెంట్ ఉన్న నిర్మాతలు ఈ సినిమాను రిలీజ్ చేస్తున్నారు. ఇటీవల చిన్న సినిమాలను ఎంకరేజ్ చేస్తూ కంటెంట్ ఉన్న చిత్రాలను అందిస్తున్న వీరు, ఈ సినిమాను ప్రజెంట్ చేస్తున్నారంటే కథలో ఏదో పాయింట్ ఉండే ఉంటుందని భావించవచ్చు. హెచ్ వి ఆర్ ప్రొడక్షన్స్ నిర్మించిన ఈ చిత్రంలో ప్రొడక్షన్ వాల్యూస్ డీసెంట్ గా ఉన్నాయి.

డిసెంబర్ 12న ఈ సినిమా థియేటర్లలోకి రానుంది. ట్రైలర్ చివర్లో వచ్చే ట్విస్ట్ లు, ఫాస్ట్ కట్స్ సినిమా మీద ఒక క్యూరియాసిటీని అయితే క్రియేట్ చేశాయి. మరీ ఓవర్ హైప్ లేకుండా, ఒక పక్కా హార్రర్ థ్రిల్లర్ ను చూడాలనుకునే వారికి ఇదొక మంచి ఛాయిస్ అయ్యేలా ఉంది. థియేటర్ లో ఆ సౌండ్ ఎఫెక్ట్స్ తో ఈ దెయ్యం కథ ఏ మేరకు భయపెడుతుందో చూడాలి.