విడాకుల తర్వాత ఫస్ట్‌ టైమ్‌ ఒకే స్టేజ్‌పై..!

ప్రముఖ సంగీత దర్శకుడు కమ్ హీరో అయిన జీవీ ప్రకాష్ తన 11 ఏళ్ల వైవాహిక జీవితానికి ఇటీవల ఫుల్‌ స్టాప్ పెట్టిన విషయం తెల్సిందే. గాయని సైంధవిని ప్రేమించి పెళ్లి చేసుకున్న జీవీ ప్రకాష్ 11 ఏళ్ల తర్వాత ఆమె నుంచి విడి పోయాడు. ఇద్దరి కాంబోలో గతంలో పలు పాటలు వచ్చాయి. ఇద్దరి కాంబినేషన్‌కి మంచి పేరు ఉంది. అందుకే విడాకులు తీసుకున్న వెంటనే ఫ్యాన్స్ తీవ్ర ఆవేదన వ్యక్తం చేశారు. ఇద్దరిలో ఎవరిది తప్పు అంటూ చర్చ జరిగింది. అయితే ఇద్దరు కలిసి జీవితం సాగించలేం అని నిర్ణయం తీసుకున్నప్పుడు విడిపోవడం ఉత్తమం అనే అభిప్రాయంను కొందరు వ్యక్తం చేశారు.

సంగీత దర్శకుడిగా జీవీ ప్రకాష్ చాలా బిజీగా ఉన్నారు. ఆయన తెలుగు, తమిళ సినిమాలకు సంగీతాన్ని అందించడంతో పాటు నటుడిగాను సినిమాలు చేస్తున్నారు. ఇలా బిజీ బిజీగా ఉన్న జీవీ ప్రకాష్ విడాకుల తర్వాత మొదటి సారి సైంధవితో స్టేజ్ షేర్‌ చేసుకున్నారు. ఒక ఈవెంట్‌ కోసం వీరిద్దరు కలిసి ఒకే పాటను స్టేజ్‌పై పాడి చాలా రోజుల తర్వాత ఫ్యాన్స్‌ను, ప్రేక్షకులను మెప్పించారు. వీరిద్దరి కాంబో పాటకు మంచి స్పందన వచ్చింది. వీరిద్దరూ కలిసి పాడుతున్న సమయంలో ఆడిటోరియం మొత్తం పెద్ద శబ్దాలు చేస్తూ అభిమానులు వారిపై తమ ప్రేమను చూపించారు.

జీవీ ప్రకాష్, సైంధవిల యొక్క విడాకుల తర్వాత స్టేజ్ షో వీడియో ప్రస్తుతం సోషల్‌ మీడియాలో వైరల్‌ అవుతోంది. తమిళనాట మాత్రమే కాకుండా తెలుగు నాట భారీ ఎత్తున అభిమానులను సొంతం చేసుకున్న జీవీ కుమార్‌, సైంధవిల పాటకు మంచి స్పందన రావడంతో వారిద్దరి కాంబోకి ఏ స్థాయి క్రేజ్ ఉందో ప్రత్యేకంగా చెప్పనక్కర్లేదు. విడిపోయిన తర్వాత కూడా ఇలా కలిసి స్టేజ్ పై కనిపించడం చాలా సంతోషంగా ఉందంటూ కొందరు ఫ్యాన్స్ అభిప్రాయం వ్యక్తం చేస్తే మరి కొందరు మాత్రం వీరిద్దరు విడిపోకుండా ఉంటే బాగుండేది కదా అంటూ తమ ఆవేదన వ్యక్తం చేస్తూ ఉన్నారు.

సంగీత దర్శకుడిగా జీవీ ప్రకాష్‌ ఇటీవల తెలుగులో వరుస సినిమాలు చేస్తూ వస్తున్నారు. తమిళనాట ఈయన గుడ్‌ బ్యాడ్‌ అగ్లీ సినిమాతో పాటు పలు పెద్ద సినిమాలకు సంగీతాన్ని అందిస్తున్నారు. ఒక వైపు స్టార్‌ హీరోల సినిమాలకు సంగీతాన్ని అందిస్తూ ఏడాదికి నాలుగు అయిదు హిట్స్ అందుకుంటున్న జీవీ ప్రకాష్ నటుడిగా ఇప్పటికే పలు సినిమాల్లో నటించారు. హీరోగా ఈయన నటించిన 15 సినిమాలు బాక్సాఫీస్ వద్ద మంచి విజయాన్ని సొంతం చేసుకుని విమర్శకుల ప్రశంసలు దక్కించుకున్నాయి.