నా రోల్ మోడ‌ల్ని డైరెక్ట్ చేస్తున్నా

కెప్టెన్ కూల్ ధోని అభిమాని కానిది ఎవ‌రు? కోట్ల‌లో అభిమానులు సంపాదించుకున్న గొప్ప క్రీడాకారుడు అత‌ను. రిటైర్మెంట్ త‌ర్వాత కూడా అదే రేంజ్ లో ఫాలోయింగ్ సంపాదించుకుంటోన్న ఏకైక క్రికెట‌ర్ ధోని. ముఖ్యంగా ఐపీఎల్ చెన్నై సూప‌ర్ కింగ్స్ కి ప్రాతినిధ్యం వ‌హించ‌డం ధోనికి బాగా క‌లిసొచ్చిన అంశంగా చెప్పాలి. ఆయ‌న ఫ్యాన్ ఫాలోయింగ్ మ‌రింత పెరిగింది అక్క‌డ నుంచి.

త‌మిళ నాడు నుంచి చాలా మంది ప్ర‌ముఖులు ధోని అభిమానులుగా ఉన్నారు. అలాగే సెల‌బ్రిటీలు కూడా చాలా మంది అభిమానిస్తారు. అందులో డైరెక్ట‌ర్..న‌య‌న‌తార భర్త విగ్నేష్ శివ‌న్ కూడా ఒక‌రు. ఈయ‌న కూడా చెవికోసేసుకునే అభిమాని. తాజాగా ధోనీతో ఉన్న ఓ ఫోటోని విగ్నేష్ శివ‌న్ ట్విట‌ర్లో షేర్ చేసాడు. అయితే ఇది యాదృశ్చికంగా జ‌రిగింది కాదు. ఆ అభిమాన క్రికెట‌ర్ ని డైరెక్ట్ చేసే అవ‌కాశం రావ‌డంతో..ఇద్ద‌రు క‌లిసి ఓ రియ‌ల్ ఎస్టేట్ యాడ్ కోసం ప‌నిచేస్తున్నారు. ఈ సంద‌ర్భంగా విగ్నేష్ ఇలా రాసుకొచ్చాడు.

'నా ఐడల్‌కి దర్శకత్వం వహించడం .. “యాక్షన్” చెప్పడం ఊహించ‌లేక‌పోతున్నా. ఇదినాకెంతో సంతోషాన్ని ఇచ్చే సంద‌ర్భం. వివరణకు మించి నేను ఇష్టపడే స్టార్. నా రియ‌ల్ రోల్ మోడల్! కెప్టెన్ కూల్` అని ఆ చిత్రాన్ని పంచుకుంటూ విఘ్నేష్ రాశాడు. ఈ ఏడాది జూలైలో విఘ్నేష్ శివన్ టీ షర్ట్‌పై ధోనీ సంతకం చేసిన వీడియో సోషల్ మీడియాలో వైరల్‌గా మారిన సంగ‌తి తెలిసిందే.

అప్పుడే ధోని కి ఎంత అభిమానో చాలా మందికి తెలిసింది. ఇప్పుడు ఏకంగా ధోనినే డైరెక్ట్ చేస్తున్నాడు. ఇలాంటి అద్భుతాలు జ‌ర‌గాలంటే పెట్టి పుట్టాలి. ఇక విగ్నేష్ శివ‌న్ సినిమాల‌తోనూ బిజీగా ఉన్న సంగ‌తి తెలిసిందే. ఓవైపు ద‌ర్శ‌క‌త్వం చేస్తూనే నిర్మాణం వైపు వేగంగా క‌దులుతున్నారు. మ‌రోవైపు భార్య న‌య‌న‌తార కోసం స‌మ‌యం కేటాయించాల్సి వ‌స్తోంది. వృత్తి..వ్య‌క్తిగ‌త విష‌యాలు అన్ని విగ్నేష్ ద‌గ్గ‌రుండి చూసుకోవాల్సి వ‌స్తోంది