సందీప్ రెడ్డిని ఆ హీరోలు మోసం చేశారా?
| 'అర్జున్ రెడ్డి' తర్వాత సందీప్ రెడ్డి వంగాకు టాలీవుడ్‌లో ఎన్నో అవకాశాలు లభించాయి.
కేవలం ఒకటి రెండు సినిమాలు మాత్రమే తెరకెక్కించినా నేషనల్ వైడ్‌గా సెన్సేషన్ అవడం అసలు సాధ్యం అయ్యే పని కాదు. కానీ, దీన్ని కొందరు సుసాధ్యం చేసి చూపించారు. అలాంటి వారిలో తెలుగు దర్శకుడు సందీప్ రెడ్డి వంగా ఒకడు. ‘అర్జున్ రెడ్డి’ సినిమాతో డైరెక్టర్‌గా జర్నీని మొదలు పెట్టిన అతడు.. ఆ తర్వాత అదే చిత్రం రీమేక్‌తో బాలీవుడ్‌లోకి సైతం వెళ్లి అక్కడి బాక్సాఫీస్‌ను ఓ రేంజ్‌లో షేక్ చేసేశాడు.
‘అర్జున్ రెడ్డి’ తర్వాత సందీప్ రెడ్డి వంగాకు టాలీవుడ్‌లో ఎన్నో అవకాశాలు లభించాయి. కానీ, ఇక్కడ ప్రాజెక్టులను పట్టాలెక్కించకుండా బాలీవుడ్ స్టార్ రణ్‌బీర్ కపూర్‌తో ‘యానిమల్’ మూవీ చేశాడు. ఇది ఏ మేర హిట్ అయిందో ప్రత్యేకంగా చెప్పనక్కర్లేదు. అప్పటి నుంచి అతడి స్థాయి మరింతగా పెరిగింది. ఈ ఊపులోనే ఇప్పుడు సందీప్ రెడ్డి వంగా.. ప్రభాస్‌తో ‘స్పిరిట్’ అనే సినిమాను చేస్తున్న విషయం తెలిసిందే.
వరుసగా హై ఓల్టేజ్ స్టోరీలతో పాన్ ఇండియా చిత్రాలనే చేస్తూ దేశంలోనే గొప్ప దర్శకుడిగా పేరు తెచ్చుకుంటోన్న సందీప్ రెడ్డి వంగా గురించి తాజాగా టాలీవుడ్ ఫేమస్ రైటర్ కోన వెంకట్ సంచలన వ్యాఖ్యలు చేశారు. ఈ క్రమంలోనే అతడిని ఇద్దరు హీరోలు దారుణంగా మోసం చేశారని చెప్పారు. దీంతో ఇప్పుడు ఆయన చేసిన వ్యాఖ్యలు ఇండియా వ్యాప్తంగా సెన్సేషన్ అవుతున్నాయి.
తాజా ఇంటర్వ్యూలో కోన వెంకట్ మాట్లాడుతూ.. ‘సందీప్ రెడ్డి వంగా అర్జున్ రెడ్డి కథను పట్టుకుని ఓ హీరో ఆఫీస్‌లో మూడు సంవత్సరాల పాటు తిరిగాడు. అతడికి కథ నచ్చడంతో తన ఆఫీస్‌లోనే స్టోరీపై వర్క్ చేయమని చెప్పాడు. దీంతో సందీప్ రెడ్డి ఓ మూలన కూర్చుని వర్క్ చేసుకున్నాడు. ఆ సమయంలో ఆ హీరో టీమ్ అతడికి ఓ పూట భోజనం మాత్రమే పెట్టింది. అలా మూడేళ్లు గడిచిన తర్వాత ఈ సినిమా చేయలేనని ఆ హీరో హ్యాండిచ్చాడు’ అంటూ చెప్పుకొచ్చారు.
కోన వెంకట్ కంటిన్యూ చేస్తూ.. ‘మొదటి హీరో మూడేళ్లు తప్పించుకున్న తర్వాత సందీప్ రెడ్డి వంగా మరో హీరో దగ్గరకు వెళ్లాడు. ఆయన కూడా రెండేళ్ల పాటు సినిమా చేస్తానని చెప్పి చేయలేదు. దీంతో సందీప్ రెడ్డి అన్నయ్యే అతడి బాధను చూసి ‘అర్జున్ రెడ్డి’ సినిమాను నిర్మించారు. అలా ఈ దర్శకుడు తెరపైకి వచ్చాడు’ అని వెల్లడించారు.
మొత్తానికి కోన వెంకట్ ఈ వ్యాఖ్యలు చేయడంతో సందీప్ రెడ్డి వంగాను మోసం చేసిన హీరోలు ఎవరా అని అందరూ చర్చించుకుంటున్నారు. అదే సమయంలో అతడికి జరిగిన అవమానాలే ఇప్పుడు ఇంత గొప్ప దర్శకుడిని చేశాయి అని చెప్పుకుంటున్నారు.