మీమ్ ఫెస్టివల్: ఇంటర్వెల్లో స్నాక్స్ సరిపోవు..ఫుల్ మీల్స్ ఆర్డరివ్వాలి
రణవీర్ సింగ్, ఆదిత్య ధర్ కాంబినేషన్లో దురంధర్ సంచలనాల గురించి తెలిసిందే.;
రణవీర్ సింగ్, ఆదిత్య ధర్ కాంబినేషన్లో దురంధర్ సంచలనాల గురించి తెలిసిందే. ఇప్పుడు ఈ సినిమా సీక్వెల్ `దురంధర్ 2`పై అంచనాలు భారీగా ఉన్నాయి. ఈ సినిమా నిడివి ఏకంగా 3 గంటల 55 నిమిషాలు ఉంటుందని వార్తలు వస్తున్నాయి. ఇంత సుదీర్ఘ నిడివి ఉన్నా ప్రేక్షకులు టికెట్ల కోసం పోటీ పడుతున్నారు. షో టైమింగ్స్ వింతగా ఉన్నా ఓపెనింగ్ డే షోలు అన్నీ అప్పుడే అమ్ముడయ్యాయి. కంటెంట్ బాగుంటే రన్టైమ్ అస్సలు సమస్య కాదని ఈ సినిమా మరోసారి నిరూపించబోతోంది.
గతంలో సందీప్ రెడ్డి వంగా తీసిన యానిమల్ సినిమా కూడా సుదీర్ఘ నిడివితో వచ్చి సంచలనం సృష్టించింది. ఆ సినిమా 3 గంటల 21 నిమిషాల నిడివితో బాక్సాఫీస్ వద్ద రికార్డులు కొల్లగొట్టింది. ఇప్పుడు దురంధర్ 2 ఆ రికార్డును కూడా అధిగమించబోతోంది. బాలీవుడ్ చరిత్రలో లగాన్, మేరా నామ్ జోకర్, సంగం వంటి చిత్రాలు కూడా భారీ నిడివితో వచ్చి విజయాలు సాధించాయి. అదే బాటలో ఇప్పుడు ఈ స్పై థ్రిల్లర్ పయనిస్తోంది.
ఈ సినిమా రన్టైమ్ పై సోషల్ మీడియాలో మీమ్స్ ఫెస్టివల్ నడుస్తోంది. నెటిజన్లు రకరకాల సెటైర్లు వేస్తూ జోకులు పేలుస్తున్నారు. సుదీర్ఘ నిడివిపై ఇన్స్టాగ్రామ్ ఇన్ఫ్లుయెన్సర్లు ఫన్నీ రీల్స్ చేస్తున్నారు. థియేటర్ కి వెళ్లే వారు రాత్రి అక్కడే బస చేయడానికి సిద్ధపడాలంటూ ట్రోల్ చేస్తున్నారు. ఈ మీమ్స్ వల్ల సినిమాకు నెగిటివిటీ కంటే పబ్లిసిటీనే ఎక్కువగా లభిస్తోంది.
కొన్ని వైరల్ వీడియోలలో ఫ్యామిలీ మెంబర్స్ సూట్కేసులు సర్దుకుని థియేటర్కు వెళ్తున్నట్లు చూపిస్తున్నారు. నాలుగు గంటల సినిమా అంటే ఒక తరం మారిపోతుందంటూ వెరైటీ జోకులు పేలుతున్నాయి. ఇంటర్వెల్ సమయంలో కేవలం స్నాక్స్ సరిపోవని, ఏకంగా ఫుల్ మీల్స్ ఆర్డర్ చేసుకోవాలని కొందరు సలహాలు ఇస్తున్నారు. ఈ వైరల్ మీమ్స్ కు నిర్మాణ సంస్థలు కూడా సరదాగా స్పందించడం విశేషం.
నిడివి విషయంలో విమర్శలు వస్తున్నా దురంధర్ 2 క్రేజ్ మాత్రం తగ్గడం లేదు. టికెట్ ధరలు ఎక్కువగా ఉన్నా ప్రేక్షకులు వెనకాడటం లేదు. భారతీయ సినిమాలో ఇదొక అరుదైన దృశ్యంగా ట్రేడ్ విశ్లేషకులు చెబుతున్నారు. యానిమల్, దురంధర్ సినిమాలు నిడివి సమస్య కాదని ఇప్పటికే నిరూపించాయి. మరి దురంధర్ 2 బాక్సాఫీస్ వద్ద ఎలాంటి ప్రభంజనం సృష్టిస్తుందో చూడాలి.