శేఖర్ గారి నమ్మకం చూస్తుంటే భయంగా ఉంది: ధనుష్

కోలీవుడ్ స్టార్ హీరో ధనుష్.. కుబేర మూవీతో పాన్ ఇండియా లెవెల్ లో సందడి చేసేందుకు సిద్ధమవుతున్న విషయం తెలిసిందే. టాలీవుడ్ ప్రముఖ దర్శకుడు శేఖర్ కమ్ముల తెరకెక్కించిన ఆ సినిమాలో ధనుష్ తో పాటు సీనియర్ హీరో నాగార్జున, నేషనల్ క్రష్ రష్మిక మందన్న కూడా లీడ్ రోల్స్ లో కనిపించనున్నారు.

ఇప్పటికే విడుదలైన కుబేర ప్రమోషనల్ కంటెంట్ కు ట్రెమండస్ రెస్పాన్స్ వచ్చిన విషయం తెలిసిందే. మేకర్స్ రిలీజ్ చేసిన పోయిరా మామ, పీపీ డమ్ డమ్ సాంగ్స్ చార్ట్ బస్టర్ రెస్పాన్స్ తో టాప్ ట్రెండింగ్ ఉన్నాయి. టీజర్ మంచి బజ్ క్రియేట్ చేయగా.. రీసెంట్ గా మేకర్స్ రిలీజ్ చేసిన ట్రైలర్ అందరినీ ఆకట్టుకుని దూసుకుపోతోంది.

జూన్ 20న ప్రపంచ వ్యాప్తంగా గ్రాండ్ గా కుబేర విడుదల కానుండగా.. మేకర్స్ ప్రీ రిలీజ్ ఈవెంట్ నిర్వహించారు. దర్శక ధీరుడు ఎస్ ఎస్ రాజమౌళి చీఫ్ గెస్ట్ గా హాజరైన ఆ వేడుకకు ధనుష్ కూడా వచ్చారు. శేఖర్ కమ్ముల సినిమా కోసం చాలా హార్డ్ వర్క్ చేశారని, హెల్త్ ను కూడా లెక్క చేయకుండా కష్టపడ్డారని ధనుష్ చెప్పారు.

అందుకే ఆయన విషయంలో తాను చాలా కంగారు పడ్డట్టు తెలిపారు. కుబేర తనకు 52వ తమిళ్ సినిమా, రెండో తెలుగు సినిమా అని తెలిపారు. అయితే సార్ మూవీకి ముందే డైరెక్టర్ తనకు కుబేర కథ చెప్పినట్లు వెల్లడించారు. ఆయనతో వర్క్ చేయడం చాలా ఆనందంగా ఉందని, అద్భుతమైన క్యారెక్టర్ ఇచ్చినందుకు థ్యాంక్స్ చెప్పారు.

నాగార్జున సర్ తో వర్క్ చేయడం ఫెంటాస్టిక్ ఎక్స్పీరియన్స్ అని ధనుష్ తెలిపారు. ఆయన నుంచి చాలా విషయాలు నేర్చుకున్నట్లు చెప్పారు. నాగ్ సర్ మూవీలు చూస్తూ పెరిగానని, ఇప్పుడు ఆయనతోనే స్క్రీన్ షేర్ చేసుకోవడం మ్యాజికల్ ఎక్స్పీరియన్స్ అని చెప్పారు. రష్మిక హార్డ్ వర్క్ చేసి ఈ స్థాయికి వచ్చిందని ప్రశంసించారు.

నిర్మాతలకు చాలా థ్యాంక్స్ అని, వారు లేకపోతే మూవీ లేదని అన్నారు ధనుష్. కుబేర స్పెషల్ ఫిల్మ్ గా చెప్పారు. శేఖర్‌ కమ్ములకు ఉన్న నమ్మకం చూస్తుంటే తనకు భయంగా ఉందన్నారు. AV చూస్తున్నప్పుడు నాన్న గుర్తు కొచ్చారని, తమను ప్రయోజకులను చేయడానికి ఎంతగానో కష్టపడ్డారని గుర్తు చేసుకున్నారు. ఈరోజు తాను ఇక్కడ ఇక్కడ ఉండటానికి కారణం ఆయన కష్టమని చెప్పారు. నాన్నకు కృతజ్ఞతలు చెప్పే అవకాశాన్ని ఈ వేదిక కల్పించినందుకు ఆనందంగా ఉందని పేర్కొన్నారు.