డెవిల్ సెన్సార్.. డోస్ మామూలుగా లేదు

కళ్యాణ్ రామ్ హీరోగా అభిషేక్ నామా నిర్మాతగా స్వీయ దర్శకత్వంలో తెరకెక్కించిన చిత్రం డెవిల్. ఈ సినిమా డిసెంబర్ 29న ప్రపంచ వ్యాప్తంగా పాన్ ఇండియా లెవల్ లో ఐదు భాషలలో రిలీజ్ అవుతోంది. ఇప్పటికే ప్రేక్షకుల ముందుకి వచ్చిన ట్రైలర్ ఆకట్టుకుంది. బ్రిటిష్ ఇండియాలో పనిచేసే ఇండియన్ సీక్రెట్ ఏజెంట్ గా ఈ చిత్రంలో కళ్యాణ్ రామ్ కనిపించబోతున్నాడు.

అతని కెరియర్ లోనే హైయెస్ట్ బడ్జెట్ తో 1947 కంటే ముందు జరిగిన కథగా డెవిల్ సినిమాని చూపించబోతున్నారు. ఈ మూవీలో సంయుక్త మీనన్ హీరోయిన్ గా నటిస్తోంది. మాళవిక నయ్యర్ కీలక పాత్రలో కనిపిస్తోంది. పవర్ యాక్షన్ సీక్వెన్స్ తో అద్భుతమైన విజువల్ ఎఫెక్ట్స్ తో ట్రైలర్ ఆకట్టుకుంది. ట్రైలర్ తోనే సినిమాపై ఎక్స్ పెక్టేషన్స్ పెంచేశారు.

ఇదిలా ఉంటే తాజాగా మూవీ సెన్సార్ పూర్తి చేసుకుంది. ఈ చిత్రానికి యూ/ఏ సర్టిఫికెట్ సెన్సార్ సభ్యులు ఇచ్చారు. దీనిని చిత్ర యూనిట్ అఫీషియల్ గా కన్ఫర్మ్ చేసింది. ప్రేక్షకులని థ్రిల్ చేసే పవర్ ఫుల్ యాక్షన్ మూవీ చూడటానికి ఎదురుచూడాలని పేర్కొన్నారు. ఇక ఈ సినిమాకు ట్రైలర్ తరువాత అంచనాలు మరింత పెరిగాయి. ఇక దిల్ రాజు కూడా సినిమా డిస్ట్రిబ్యూషన్ లో బాగమయ్యారు. ఇక హైప్ డోస్ ఎక్కువవుతోంది.

బింబిసారాతో కళ్యాణ్ రామ్ గత ఏడాది బ్లాక్ బస్టర్ హిట్ ని ఖాతాలో వేసుకున్నారు. తరువాత అమిగోస్ అంటూ డిఫరెంట్ కాన్సెప్ట్ తో మూవీ చేశారు. అయితే ఈ సినిమా అనుకున్న స్థాయిలో ప్రేక్షకులకి కనెక్ట్ కాలేదు. కొంత గ్యాప్ తీసుకొని డెవిల్ మూవీతో ఇప్పుడు రాబోతున్నారు. ఈ సినిమాపై కళ్యాణ్ రామ్ చాలా హోప్స్ తో ఉన్నారు. పీరియాడిక్ బ్యాక్ డ్రాప్ స్టోరీ కావడంతో కచ్చితంగా ప్రేక్షకులకి నచ్చుతుందని అంచనా వేస్తున్నారు.

ఈ ఏడాది విరూపాక్ష మూవీతో సంయుక్త మీనన్ హీరోయిన్ గా సక్సెస్ అందుకుంది. ఆ సినిమాలో రెండు విభిన్నమైన షేడ్స్ ఉన్న రోల్ లో మెప్పించింది. డెవిల్ మూవీలో మంచి పెర్ఫార్మెన్స్ కి స్కోప్ ఉన్న పాత్రలోనే ఆమె కనిపించబోతోందని తెలుస్తోంది. నిర్మాతగా సక్సెస్ అయిన అభిషేక్ నామా ఈ మూవీతో దర్శకుడిగా తన అదృష్టం పరీక్షించుకుంటున్నారు.