ఆర్తి అగ‌ర్వాల్‌లా లైపో విక‌టించి..!

వినోద‌రంగం నుంచి మరో విషాద వార్త వినాల్సి వచ్చింది. ప్రముఖ పాప్ సింగర్ సౌంద‌ర్య సాధ‌న చికిత్స విక‌టించి మృతి చెందినట్లు వార్తలు వస్తున్నాయి. బ్రెజిల్‌కు చెందిన ప్రముఖ పాప్ స్టార్ డానీ లీ 42 ఏళ్ల వయసులో అనూహ్యంగా ఈ ప్రపంచానికి వీడ్కోలు పలికారు. డానీ లీ ఇటీవలే లైపోసక్షన్ సర్జరీ చేయించుకోగా అది విక‌టించి మ‌ర‌ణించార‌ని చెబుతున్నారు. ఈ విషాద మ‌ర‌ణం ప్ర‌ముఖ టాలీవుడ్ హీరోయిన్ ఆర్తి అగ‌ర్వాల్ మర‌ణాన్ని గుర్తు చేసింది. దివ్య‌మైన తార ఆర్తి నాడు లైపో స‌క్స‌న్ చికిత్స విక‌టించ‌డం వ‌ల్ల మ‌ర‌ణించిన సంగ‌తి తెలిసిందే. ఆర్తి త‌ర్వాత చాలా మంది సెల‌బ్రిటీలు లైపో విక‌టించి మ‌ర‌ణించిన వార్త‌లు క‌ల‌వ‌ర‌ప‌రిచాయి.

లైపో అంటే.. శరీరంలోని కొన్ని భాగాల నుండి అదనపు కొవ్వును తొలగించే శస్త్రచికిత్స. ఊబకాయాన్ని తగ్గించుకోవడానికి ఇదొక టెక్నిక్. ఇందులో ముఖం, రొమ్ము, నడుము మొదలైన భాగాల నుండి అదనపు కొవ్వును తొలగించడం ద్వారా స్లిమ్ లుక్ సాధ్య‌మ‌వుతుంది. అయితే చికిత్స స‌మ‌యంలో ర‌క్తం గ‌డ్డ‌క‌ట్టి అది మ‌ర‌ణానికి దారి తీయ‌డం విషాదక‌రం.

ఊబ‌కాయం నుంచి బ‌య‌ట‌ప‌డేందుకు బ్రెజిలియ‌న్ పాప్ గాయ‌ని డానీ లీ లైపోసక్షన్ సర్జరీ చేయించుకోవడానికి వెళ్ళార‌ని తెలిసింది. ఆ తర్వాత త‌న‌కు కొన్ని సమస్యలు వచ్చాయి. చికిత్స విక‌టించిన‌ కారణంగా జీవితాన్ని కోల్పోయారు. ప్రస్తుతం గాయని మృతికి అసలు కారణాన్ని తెలుసుకునేందుకు పోలీసులు ప్రయత్నిస్తున్నారు.

ఒక కుమార్తెకు తల్లి

డానీ లీ వివాహం చేసుకుని సంతోషంగా ఉన్నారు. స‌ద‌రు గాయ‌నికి 7 సంవత్సరాల కుమార్తె కూడా ఉంది. కానీ ఇలాంటి పరిస్థితిలో ఆకస్మిక మరణం ఆ కుటుంబంలో విషాదం నింపింది. డానీ లీ మరణం తరువాత త‌న‌ కుటుంబం ఇటీవల ఆమె ఇన్‌స్టాగ్రామ్‌లో ఒక ప్రకటన ద్వారా సంతాపాన్ని తెలిపింది. అలాగే డానీ లీకి నివాళులు అర్పించాలని కోరుకునే అభిమానులందరికీ వేడుక నిర్వహించనున్నట్లు సమాచారం.

బ్రెజిలియన్ సంగీత ప్ర‌పంచంలో డానీ లీ పాపుల‌ర్ నేమ్. 5 సంవత్సరాల వయస్సులో పాడటం ప్రారంభించిన మేటి గాయ‌ని. Eu sou da Amazonia అంటే I am from the Amazon అనే పాటల‌తో గొప్ప‌ ప్రజాదరణ పొందారు.