'25 రోజుల ఛాలెంజ్'.. మెగాస్టార్ను అనిల్ ఎలా మెప్పించారంటే?
నిజానికి 'ఛాలెంజ్' సినిమాలో చిరంజీవి గారు ఒక రూపాయి నుంచి లక్షలు ఎలా సంపాదిస్తారో అదే స్పూర్తితో తాను కూడా కేవలం 25 రోజుల్లో కథను సిద్ధం చేసి బాస్కు వినిపించానని అనిల్ రావిపూడి చెప్పారు.;
మెగాస్టార్ చిరంజీవి నటించిన 'మన శంకర వరప్రసాద్ గారు' బాక్సాఫీస్ వద్ద రికార్డుల వేట కొనసాగిస్తోంది. అనిల్ రావిపూడి దర్శకత్వంలో రూపొందిన ఈ ఫ్యామిలీ ఎంటర్టైనర్ ప్రేక్షకులను ఎంతగా మెప్పించిందో చెప్పడానికి లేటెస్ట్ వసూళ్లే నిదర్శనం. ఈ సినిమా సక్సెస్ మీట్లో అనిల్ రావిపూడి షేర్ చేసుకున్న ఒక ఆసక్తికరమైన బ్యాక్ స్టోరీ ఇప్పుడు మెగా అభిమానుల్లో హాట్ టాపిక్గా మారింది.
ఈ సినిమా వెనుక చిరంజీవి గారు తనకు ఒక మిని ఛాలెంజ్ విసిరారని అనిల్ వెల్లడించారు. మెగాస్టార్తో సినిమా చేయాలనే తన చిరకాల కోరిక తీరబోతున్న సమయంలో ఆ ఛాన్స్ను దక్కించుకోవడానికి తాను ఒక అద్భుతమైన కథను చాలా వేగంగా సిద్ధం చేయాల్సి వచ్చిందని అనిల్ సక్సెస్ మీట్లో పేర్కొన్నారు. ఆ ఛాలెంజ్ను తాను ఎంతో స్పోర్టివ్గా తీసుకుని బాస్ను మెప్పించడానికి శ్రమించినట్లు వివరించారు.
చిరంజీవి గారు తనతో మాట్లాడుతూ.. సినిమా చేయడానికి తాను సిద్ధమని, అయితే ఒక పవర్ఫుల్ కథతో క్విక్గా రావాలని కోరారట. తను అందరికీ ఆన్సర్ చెప్పేలా ఒక అదిరిపోయే సబ్జెక్ట్ను రెడీ చేయమని తనకు ఒక చిన్న పరీక్ష పెట్టారని అనిల్ రావిపూడి సక్సెస్ మీట్ వేదికగా వెల్లడించారు. ఈ ఛాలెంజ్ను సవాల్గా తీసుకున్న తాను ఎట్టి పరిస్థితుల్లోనూ ఈ ప్రాజెక్ట్ మిస్ అవ్వకూడదని ఫిక్స్ అయినట్లు తెలిపారు.
నిజానికి 'ఛాలెంజ్' సినిమాలో చిరంజీవి గారు ఒక రూపాయి నుంచి లక్షలు ఎలా సంపాదిస్తారో అదే స్పూర్తితో తాను కూడా కేవలం 25 రోజుల్లో కథను సిద్ధం చేసి బాస్కు వినిపించానని అనిల్ రావిపూడి చెప్పారు. ఆ కథ విని మెగాస్టార్ ఫిదా అయిపోయి వెంటనే గ్రీన్ సిగ్నల్ ఇచ్చేశారని ఆయన సంతోషం వ్యక్తం చేశారు. అలా 25 రోజుల ఛాలెంజ్ నుంచి పుట్టిన ఈ సినిమా ఇప్పుడు బాక్సాఫీస్ వద్ద 120 కోట్ల కలెక్షన్లతో దూసుకుపోతోంది.
కేవలం కథ సిద్ధం చేయడమే కాదు వింటేజ్ చిరంజీవిని మళ్ళీ వెండితెరపైకి తీసుకురావాలనే తన కలను ఈ సినిమాతో నిజం చేసుకున్నట్లు అనిల్ రావిపూడి వెల్లడించారు. మెగాస్టార్ బాడీ లాంగ్వేజ్, కామెడీ టైమింగ్ను పర్ఫెక్ట్గా వాడుకోవడంతో ఫ్యాన్స్ కూడా ఫుల్ ఖుషీలో ఉన్నారని ఆయన తెలిపారు. అనిల్ మేకింగ్ స్టైల్, బాస్ ఎనర్జీ తోడవ్వడంతో ఈ సినిమా ఫ్యామిలీ ఆడియన్స్కు ఒక పర్ఫెక్ట్ పండుగ గిఫ్ట్గా నిలిచినట్లు ఆయన సక్సెస్ మీట్లో పేర్కొన్నారు.
ప్రస్తుతం MSG థియేటర్లలో రికార్డు స్థాయి వసూళ్లను రాబడుతోంది. ఇప్పటికే 10 లక్షల కంటే ఎక్కువ టికెట్లు అమ్ముడై సంక్రాంతి విన్నర్గా నిలిచినట్లు మేకర్స్ ప్రకటించారు. తాను తన సక్సెస్ ట్రాక్ను కంటిన్యూ చేయడమే కాకుండా తనపై వచ్చే విమర్శలకు బాక్సాఫీస్ రిజల్ట్తోనే సమాధానం ఇచ్చానని అనిల్ రావిపూడి స్పష్టం చేశారు. మెగాస్టార్, అనిల్ రావిపూడి కాంబినేషన్ రాబోయే రోజుల్లో మరిన్ని రికార్డులను తిరగరాయడం ఖాయంగా కనిపిస్తోంది.