బిగ్ బాస్ ఫైనల్ గొడవ.. వాళ్లకు నోటీసులు..!

ఆరు సీజన్లు జరిగినా సరే బిగ్ బాస్ సీజన్ 7 ఫైనల్ నాడు జరిగిన రచ్చ ఏనాడు జరగలేదు. బిగ్ బాస్ తెలుగు సీజన్ 7 ఫైనల్ ఎపిసోడ్ నాడు పల్లవి ప్రశాంత్ ఫ్యాన్స్ పబ్లిక్, ప్రైవేట్ వహనాలపై దాడి తెలిసిందే. పరిస్థితి ముందు ఊహించే పోలీసులు పల్లవి ప్రశాంత్ ని ఎలాంటి ర్యాలీలు లేకుండా వెళ్లాలని చెప్పినా వినకుండా ఉత్సాహపడ్డాడు. అందుకే అతన్ని 3 రోజులు జైలులో ఉంచారు. అయితే విచారణ అనంతరం షరతులతో కూడిన బెయిల్ ఇచ్చి బయటకు పంపించారు.

పల్లవి ప్రశాంత్ అయితే రిలీజ్ అయ్యాడు కానీ ఆరోజు గొడవలకు కారణమైన కొందరు ఆకతాయిలను మాత్రం పోలీసులు కస్టడీలోనే ఉంచుకున్నారు. ఈ వ్యవహారంలో పల్లవి ప్రశాంత్ తప్పు లేదనే పోలీసులు, కోర్ట్ నమ్ముతుంది. ఇదిలా ఉంటే ఈ గొడవ వల్ల బిగ్ బాస్ షో నిర్వాహకులకు కూడా పోలీసులు నోటీసులు జారీ చేశారు. బిగ్ బాస్ ఫైనల్ డే నాడు జరిగిన గొడవపై బిగ్ బాస్ టీం ని వివరణ ఇవ్వాల్సిందిగా ఆదేశించారు.

బిగ్ బాస్ సీజన్ 7 ఫైనల్ ఎపిసోడ్ రోజు అన్నపూర్ణ స్టూడియో దగ్గర అభిమానులు భారీగా వచ్చారన్న విషయాన్ని తమకు సమాచారం ఎందుకు ఇవ్వలేదని బిగ్ బాస్ షో నిర్వాహకులైన ఎండెమోల్ షైన్ ఇండియా ప్రైవేట్ లిమిటెడ్ కు పోలీసులు నోటీసులు ఇచ్చారు. ఈ గొడవపై వారి నుంచి కూడా పూర్తి వివరణ కోరుతున్నారు పోలీసులు.

షో పూర్తైన తర్వాత ఎలాంటి పబ్లిక్ ప్రాపర్టీస్ ఆటంకం కలగకుండా చూసుకోవాల్సిన బాధ్యత షో నిర్వాహకుల మీద ఉంది. కానీ బిగ్ బాస్ టీం ఆ విషయంలో పూర్తిగా ఫెయిల్ అయ్యింది. ఒకవేళ వారు ముందుగానే పోలీసులకు ఇన్ఫర్మేషన్ అందించి ఉంటే ఇంత గొడవ జరిగి ఉండేది కాదని పోలీసుల వాదన. మొత్తానికి సీజన్ 7 గొడవ వల్ల బిగ్ బాస్ షో నిర్వాహకులకు కూడా పోలీసుల నుంచి షాక్ తగిలిందని చెప్పొచ్చు.

ఇక సీజన్ 7 ఫైనల్ నాడు జరిగిన ఈ గొడవలపై కొందరు నేతలు, ప్రముఖులు తమ స్పందన తెలియచేశారు. బిగ్ బాస్ షో మీద దాదాపు వారంతా దుమ్మెత్తిపోశారు. ఇంత హడావుడి జరుగుతున్నా కూడా బిగ్ బాస్ టీం నుంచి ఎలాంటి రెస్పాన్స్ రాలేదు. సీజన్ 7 గొడవలపై హోస్ట్ నాగార్జున సైలెంట్ గా ఉండటం కూడా ఆడియన్స్ ని సర్ ప్రైజ్ చేసింది.