బిగ్‌ బాస్ షోలో మొదలు కాబోతున్న 'పవర్ ఆఫ్ పీపుల్'

బిగ్‌ బాస్ పదో సీజన్ మొదటి వారం మొత్తం రోహిత్ వర్సెస్ త్రిగుణ్ పోరు చుట్టూనే తిరిగింది. వారం పొడవునా రోహిత్‌ను టార్గెట్ చేస్తూ రచ్చ లేపిన త్రిగుణ్, షోకి కావాల్సిన డ్రామాను అందించి నాగార్జున వద్ద ప్రశంసలు సైతం పొందాడు. అయితే, ఎవరూ ఊహించని విధంగా తొలి వారంలోనే జరిగిన డబుల్ ఎలిమినేషన్ హౌస్‌మేట్స్‌కు గట్టి షాకిచ్చింది. షో ఇంకా పూర్తి గ్రిప్‌లోకి రానప్పటికీ, రాబోయే రోజుల్లో సమీకరణాలు ఎలా మారబోతున్నాయో ఒక స్పష్టత వస్తోంది.

త్రిగుణ్, రోహిత్‌లు భవిష్యత్తులో చేతులు కలిపి కలిసి ఆడతారేమో అన్న సంకేతాలు కనిపించినా, తాజా నామినేషన్ల ప్రోమో చూస్తే వారి మధ్య మంటలు ఇంకా చల్లారలేదని అర్థమవుతోంది. హౌస్‌లోని సెలబ్రిటీలంతా రోహిత్‌ను ఒంటరిని చేసే పంథానే కొనసాగించేలా ఉన్నారు. శనివారం జరిగిన గొడవ తర్వాత ముఖేష్ పూర్తిగా రోహిత్‌కు బద్ధ శత్రువుగా మారే అవకాశముంది.

మరోవైపు, 'అగ్నిపరీక్ష' నుంచే స్నేహితుడైన అమన్ సైతం రోహిత్‌పై తిరగబడేందుకు అదను చూస్తున్నాడు; త్రిగుణ్ నూరిపోస్తున్న మాటలు అమన్‌పై స్పష్టంగా ప్రభావం చూపుతున్నాయి.

శాలిని తన జోరును కొనసాగించేలా ఉండగా, వర్షిణి తన ఆటను మరింత మెరుగుపరుచుకునే ప్రయత్నాల్లో ఉంది. అందరితో మంచిగా ఉంటూ హౌస్‌లో ఆదరణ పొందుతున్న దేబ్జానీ, తన గేమ్‌తో రాబోయే రోజుల్లో సర్‌ప్రైజ్ ప్యాకేజీగా మారి సేఫ్ జోన్‌లోకి వెళ్లేలా కనిపిస్తోంది.

యూట్యూబర్ సుధీర్ నెమ్మదిగా తన కంఫర్ట్ జోన్ దాటి బయటకు వస్తున్నాడు; వీకెండ్ టాస్కులో ఎంతో కాన్ఫిడెంట్‌గా ఆడి ఆకట్టుకున్నాడు. ఎలిమినేషన్ ముప్పు తప్పించుకున్న సృష్టిలోనూ కాస్త ఆత్మవిశ్వాసం పెరిగింది. జబర్దస్త్ ద్వయం రాంప్రసాద్, నరేష్ తమ సహజశైలి వినోదంతో సేఫ్‌గా సాగిపోతున్నారు.

టెంపర్ వంశీ ఇంకా మౌన ముద్రలోనే ఉన్నాడు; ఇలాగే సైలెంట్‌గా ఉంటే హౌస్‌లో ఎక్కువ కాలం నెగ్గుకు రావడం కష్టం. ఇక గేమ్‌లో ఏమాత్రం ప్రభావం చూపించలేక పోతున్న ఝాన్సీ, ఎలాంటి ఇంపాక్ట్ లేని కృష్ణుడు వచ్చే వారం కచ్చితంగా డేంజర్ జోన్‌లో నిలిచే అవకాశాలు స్పష్టంగా కనిపిస్తున్నాయి.

ఇకపోతే బిగ్‌ బాస్ షో లో రెండో వారం లో ఆట ఇంట్రెస్టింగ్ గా సాగేందుకు జనాలనే కెప్టెన్సీ క్యాండిడేట్స్ ని ఎంచుకోమని బిగ్‌ బాస్ చెప్పారు. ఈ ప్రక్రియ పేరు, పవర్ ఆఫ్ పీపుల్. ఈ రెండో వారం లో జరిగే ఆట ఇదే.